ފްލިކް ހުރީ ބާސެލޯނާގެ މޮޅުވުން ޤަބޫލު ކުރަން ވެސް ދަތިވެފައި

ޔުއެފާ ޗެމްޕިއަންސް ލީގުގައި ބެންފީކާއާ ދެކޮޅަށް ކުޅުނު މެޗުން ބާސެލޯނާ ހޯދި މޮޅަކީ، ޤަބޫލު ކުރަން ވެސް ދަތި މޮޅެއް ކަމަށް އެ ޓީމަށް އިރުޝާދު ދެމުން އަންނަ ޖަރުމަނުގެ ހަންސީލ ފްލިކް ބުނެފި އެވެ.

ބެންފީކާގެ އަމިއްލަ ދަނޑުގައި ކުޅުނު އެ މެޗު ބާސެލޯނާ އިން ކާމިޔާބު ކުރީ، ބެންފީކާ އިން ކުރި ހޯދާފައި ވަނިކޮށެވެ. ފަހަތުން އަރައި ފަސް ލަނޑު ޖަހައިގެން ބާސެލޯނާ އެ މެޗުން މޮޅުވެފައިވާއިރު، މެޗުން ބާސެލޯނާ އަށް މޮޅެއް ލިބުނީ އެންމެ ފަހު ވަގުތުގައި ޖެހި ލަނޑުންނެވެ. މޮޅާއެކު ބާސެލޯނާ އިން ވަނީ ޗެމްޕިއަންސް ލީގުގެ ގަދަ 16 ވަނަ ބުރުން ޖާގަ ހޯދައިފަ އެވެ.

އެ މެޗަށް ފަހު ނޫސްވެރިންނާ ވާހަކަ ދައްކަމުން ފްލިކް ބުނީ، އެ މެޗަކީ ވަރަށް އާދަޔާ ޚިލާފު މެޗެއް ކަމަށެވެ. މެޗުގައި ބާސެލޯނާގެ ކުޅުންތެރިންގެ ފަރާތުން ފެނުނު އެންމެ ޕޮޒިޓިވް ކަމަކީ، ކުޅުންތެރިންގެ މެންޓާލިޓީ ކަމަށް ވެސް ފްލިކް ވަނީ ބުނެފަ އެވެ. މެޗުން ބާސެލޯނާ މޮޅުވީ ފަހަތުން އަރައި ލަނޑުތަކެއް ޖަހައިގެން ކަމަށާއި، މުޅި މެޗުގެ އެންމެ ޚާއްސަ ކަމަކީ އެއީ ކަމަށް ފްލިކް ބުންޏެވެ. ފުޓުބޯޅައިގައި އެ ފަދަ ޙާލަތްތައް ދިމާވާނެ ކަމަށް ވެސް ފްލިކް ބުންޏެވެ.

މީގެ އިތުރުން ފްލިކް ބުނީ އޭނާގެ ކޯޗިން ކެރިއަރުގައި މީގެ ކުރިން އެފަދަ ކަމެއް ތަޖުރިބާ ކޮށްފައި ނެތް ކަމަށެވެ. އެ މޮޅަކީ ޤަބޫލު ކުރަން ވެސް ދަތި މޮޅެއްކަން ފާހަގަކޮށް ފްލިކް ބުނީ، މެޗުގެ ފުރަތަމަ ހާފުގައި ބާސެލޯނާ އަށް އެންމެ އެކަށީގެންވާ ކުޅުން ނުދެއްކުނު ކަމަށެވެ. އެ ހާފުގައި ބެންފީކާ އިން ރަނގަޅަށް ކުޅެފައިވާއިރު، އެ ޓީމުން ދެ ލަނޑު ޖަހައިގެން ލީޑު ނެގިކަން ވެސް ފްލިކް ވަނީ ފާހަގަ ކޮށްފަ އެވެ.

މެޗުގެ ފުރަތަމަ ހާފުގައި ބާސެލޯނާ އަށް އެފަދަ ޙާލަތެއް ދިމާވީއިރު، އެކަމުގެ ސަބަބުން ދެ ވަނަ ހާފުގައި އިތުރު ހިތްވަރެއްލާން މަޖުބޫރުވި ކަމަށް ފްލިކް ވަނީ ބުނެފަ އެވެ. ދެ ވަނަ ހާފުގައި ބާސެލޯނާ އިން ކުޅުން ރަނގަޅު ކޮށްފައިވާއިރު، ކުޅުން ރަނގަޅުވުމުގެ އިތުރުން، އެ ހާފުގައި ގެނައި ބަަދަލުތަކުގެ ފައިދާ ވަރަށް ބޮޑަށް ޓީމަށް ކުރިކަމަށް ވެސް ފްލިކް ބުނެފައިވެ އެވެ.

ޗެމްޕިއަންސް ލީގުގެ ގަދަ 16 ވަނަ ބުރުން ބާސެލޯނާ ޖާގަ ޔަޤީންކޮށްފައިވާއިރު، މި ސީޒަނާ ދިމާކޮށް އެ ޓީމާ ހަވާލުވީ ފްލިކްގެ އިރުޝާދުގެ ދަށުން ބާސެލޯނާ އިން އަންނަނީ ޗެމްޕިއަންސް ލީގުގައި ރަނގަޅު ނަތީޖާތަކެއް ހޯދަމުންނެވެ.