މާލޭ ލީގުގައި ޔުނައިޓެޑް ވިކްޓްރީއާ ދެކޮޅަށް ކުޅޭ މެޗު ފަސޭހަކުރަން ބޭނުންނުވާ ކަމަށާއި، އެ މެޗުން މޮޅުވުން ވަރަށް މުހިންމު ކަމަށް ޓީސީ ސްޕޯޓްސް ކްލަބްގެ ކޯޗު މުހައްމަދު ނިޒާމް ބުނެފި އެވެ.  

މެޗުގެ ކުރިން އެފްއޭއެމް ހައުސްގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަމުން ނިޒާމްބެ ބުނީ ޓީސީއަކީ އަދިވެސް ލީގުގައި އޮތް ދެވަނަ އަށް އެންމެ ޅަ ޓީމު ކަމަށާއި، ޔޫވީއާ ދެކޮޅަށް ކުޅޭ މެޗަކީ ފުރަތަމަ ބުރުގައި ޓީސީ އަށް ވަރަށް މުހިންމު މެޗެއް ކަމަށެވެ.

އެގޮތުން ނިޒާމްބެ ބުނީ ޔޫވީއަކީ މިދިޔަ ސީޒަނުގައި ހުރިހާ އެންމެން ވެސް ވަރަށް ދަށްކޮށް ބެލި ޓީމެއް ކަމަށާއި، އެހެން ނަމަވެސް އެޓީމު ގަދަ ހަތަރެއްގައި ހިމެނި ބަލިކުރަން އުނދަގޫ ޓީމަކަށް ވެގެން ދިޔަ ކަމަށެވެ.

ޓީމުގައި މިވަގުތު ޔޫވީއާ ދެކޮޅަށް ނުކުޅެވޭނެކަން ކަށަވަރުވެފައި ވަނީ އިބްރާޙިމް މަހުދީ (އިއްބެ) ކަމަން ފާހަގަކުރަމުން ނިޒާމްބެ ބުނީ އޭނާގެ ސިއްހީ ހާލަތު އަދިވެސް މެޗު ކުޅޭ ވަރަށް ތަން ނުދޭ ކަމަށާއި، ފިޒިކަލީ ވެސް ދަށް ކަމަށެވެ.

ނިޒާމްބެ ބުނީ މި ސީޒަނުގައި ޔޫވީ ކުޅުނު ފުރަތަމަ މެޗަށް ވުރެ ދެވަނަ މެޗު ރަނގަޅުކޮށްފައިވާ ކަމަށާއި، ތިންވަނަ މެޗުގައި ޓީސީއާ ދެކޮޅަށް ނިކުންނައިރު، ކޯޗުގެ އިރުޝާދާއެކު ބަދަލުތަކެއް އަންނާނެ ކަމަށް ދެކޭ ކަމަށެވެ. އެގޮތުން މެޗު އެއްވެސް ވަރަކަށް ފަސޭހަކުރަން ބޭނުންނުވާ ކަމަށް ފާހަގަކުރަމުން އޭނާ ބުނީ ނަތީޖާ ކޮންމެ ގޮތަކަށް ވެސް ނިކުމެދާނެ ކަމަށެވެ.

ނިޒާމްބެ ބުނީ ފުރަތަމަ ބުރުގެ ބްރޭކަށް ދިއުމުގެ ކުރިން ކުޅޭ ހުރިހާ މެޗެއް ކާމިޔާބުކޮށް ގަދަ ހަތަރެއްގައި ހިމެނުމަކީ ވަރަށް މުހިންމު ކަމެއް ކަމަށާއި، އެކަމަށް ހުރިހާ ކުޅުންތެރިންވެސް މަސައްކަތް ކުރަން ޖެހޭ ކަމަށެވެ. އެގޮތުން ނިޒާމްބެ ބުނީ އެހެން ޓީމުތަކާ އަރާ ހަމަކުރަންޖެހޭ ކަމަށާއި، އެއީ މިހާރު އޮތް ޕްރެޝަރެއް ކަމަށެވެ.

ޝައިހް ކަމާލް އިންޓަނޭޝަނަލްކަޕްގެ ޗެމްޕިއަންކަން ހޯދައިގެން ރާއްޖެ އައި ޓީސީ ސީޒަނުގައި އަދި ކުޅުނީ އެންމެ މެޗެކެވެ. އެގޮތުން ކްލަބް ވެލެންސިއާއާ ދެކޮޅަށް ކުޅުނު އެ މެޗު ޓީސީން ވަނީ 0-3 ގެ ނަތީޖާއަކުން މޮޅުވެފައެވެ.