އަމޯރިމް ބުނީ މިއީ ޔުނައިޓެޑުގެ ތާރީޚުގައި ވެސް އެންމެ ދަށް ޓީމު ކަމަށް

މެންޗެސްޓަރ ޔުނައިޓެޑުގައި މިހާރު އޮތް ޓީމަކީ، އެ ޓީމުގެ ތާރީޚުގައި ވެސް އެންމެ ދަށް ޓީމު ކަމަށް، ޔުނައިޓެޑަށް އިރުޝާދު ދެމުން އަންނަ ޕޯޗުގަލްގެ ރުބެން އަމޯރިމް ބުނެފި އެވެ.

އޭނާ މިހެން ބުނީ އިނގިރޭސި ޕްރިމިއަރ ލީގުގައި ބްރައިޓަންއާ ދެކޮޅަށް ކުޅުނު މެޗަށްފަހު ނޫސްވެރިންނާ ވާހަކަ ދައްކަމުންނެވެ. ޔުނައިޓެޑުގެ އަމިއްލަ ދަނޑުގައި ކުޅުނު އެ މެޗުން ބަލިވެ، ޔުނައިޓެޑުގެ ޙާލަތު ވަނީ ވަރަށް ބޮޑަށް ދަށްވެފަ އެވެ.

އަމޯރިމް ބުނީ މިވަގުތު ޔުނައިޓެޑުގެ ސަޕޯޓަރުންނަށް ވެސް ހިތްދަތިކަން ތަހަންމަލު ކުރަން ޖެހިފައިވާކަން ޤަބޫލު ކުރާ ކަމަށެވެ. އަމޯރިމް ބުނީ އޭނާ އަށް މިވަގުތު ލިބިފައި އޮތް ޓީމަކީ ޔުނައިޓެޑުގެ ތާރީޚުގައި ވެސް އެންމެ ދަށް ޓީމު ކަމަށް ޤަބޫލު ކުރާ ކަމަށެވެ. ޔުނައިޓެޑުގެ އަމިއްލަ ދަނޑުގައި ކުޅުނު އެ މެޗުން ބަލިވުމަކީ ބަލައި ގަންނަން އުނދަގޫ ކަމެއްކަން ފާހަގަ ކުރަމުން އަމޯރިމް ބުނީ، ޚާއްސަކޮށް ބައި ކޮޅަށް ލަނޑުތަކެއް ވަތް ގޮތަކީ އޭނާ އަށް ޤަބޫލު ކުރަން ދަތި ކަމެއް ކަމަށެވެ.

މީޣެ އިތުރުން އަމޯރިމް ބުނީ ބައެއް ވަގުތުތަކުގައި ޔުނައިޓެޑުން ރަނގަޅަށް ކުޅެން މަސައްކަތް ކުރި ނަމަވެސް، އެކަން ދަމަހައްޓަން އުނދަގޫވާ ކަމަށެވެ. އޭނާ ބުނީ ޔުނައިޓެޑުގެ ކުޅުންތެރިންގެ ކިބައިން ހާސްކަން ވަރަށް ބޮޑަށް ފާހަގަވާ ކަމަށާއި، އެކަމުގައ ފައިދާ އިދިކޮޅު ޓީމުން ނަގާ މަންޒަރު ފެންނަ ކަމަށެވެ. އެކަން ފާހަގަކޮށް އަމޯރިމް ބުނީ، ޙާލަތު ބަދަލު ކުރުމަކީ ނުވަތަ އަނބުރާލުމަކީ ވެސް ދަތިކަމެއް ކަމަށެވެ. އަމޯރިމް ބުނި ގޮތުގައި ކުރަން ޖެހިފައި އޮތީ އުނދަގޫ އަދި އެހާމެ ބުރަ މަސައްކަތެކެވެ.

މި ސީޒަންގައި ޔުނައިޓެޑުގެ ނަތީޖާތައް އިންތިހާ އަށް ދަށްވެފައިވާއިރު، މިއީ ޔުނައިޓެޑުގެ ތާރީޚުގައި ވެސް އެ ޓީމަށް އެންމެ ދަށް ފަހަރެވެ. މިދިޔަ އަހަރުގެ ނޮވެމްބަރު މަހުގެ ތެރޭގައި ޔުނައިޓެޑުގެ ކޯޗުކަމާ އަމޯރިމް ހަވާލުވީއިރު ވެސް، އެ ޓީމުގެ ނަތީޖާތައް ވަނީ ދަށްވެފަ އެވެ. އަމޯރިމްގެ އިރުޝާދުގެ ދަށުން ޔުނައިޓެޑުގެ ނަތީޖާތައް ދަށްވާތީ، އޭނާ އަށް ޕްރެޝަރު ބޮޑުވަމުން އަންނަ ކަމަށް މީޑިއާ ތަކުގައި ވަނީ ބުނެފަ އެވެ. މިވަގުތު ލީގު ތާވަލްގެ 13 ވަނައިގައި ޔުނައިޓެޑު އޮތްއިރު، މީގެ ކުރިން އަމޯރިމް ވަނީ ޔުނައިޓެޑު ރެލިގޭޓު ވެދާނެ ކަމަށް ވެސް ބުނެފަ އެވެ.