ވިނަރެސް ކައިރީގައި ހިނގި އެކްސިޑެންޓް - އިކްރާމް 70،000 ރުފިޔާއިން ޖޫރިމަނާކޮށް 3 މަހުގެ ޖަލުހުކުމެއް
12 ޖެނުއަރީ 2025 | އާދީއްތަ 14:01ބަންދުގައި ހުރި ދުވަސްތައް އުނިކުރުމަށްފަހު ބަންދުގައި އިތުރަށް ހުންނާކަށް ނުޖެހޭ
ވިނަރެސް ކައިރި ހިނގި އެކްސިޑެންޓުގައި ކާރު ދުއްވަން އިން މީހާ
ހުޅުމާލެ ފޭސް 2 ގެ ވިނަރެސް ކައިރީގައި ހިނގި ނުރައްކާތެރި އެކްސިޑެންޓުގައި ކާރު ދުއްވަން އިން އިބްރާހިމް އިކްރާމް 70،000 ރުފިޔާއިން ޖޫރިމަނާކޮށް 3 މަހުގެ ޖަލުހުކުމެއް އިއްވައިފިއެވެ.
މި އެކްސިޑެންޓް ހިނގާފައިވަނީ މިދިޔަ ޖުލައި މަހުގެ 31 ވަނަ ދުވަހު ހުޅުމާލެ ފޭސް 2 ގެ ވިނަރެސް ފްލެޓް ކައިރީގައެވެ. މި ހާދިސާގައި ރޭސިންގ ކާރެއް ދުއްވާފައި ގޮސް ކޮންޓްރޯލް ނުވެ ނުރައްކާތެރި އެކްސިޑެންޓެއް ވަނީ ހިނގާފައިވެއެވެ.
ބާރު ސްޕީޑްގައި ދުއްވާފައި ކާރެއް ކޮންޓްރޯލް ނުވެ ގޮސް މަގުގެ އެއްފަރާތުގައި މަޑުކޮށްގެން އިން ސައިކަލެއްގައި ޖެހިގެން ހިނގި މި އެކްސިޑެންޓްގައި ކާރު ދުއްވި މީހާ ވަނީ އެދުވަހު ފިލައިގެން ގޮސްފައެވެ. އަދި ފަހުން އޭނާއެކު އެ ކާރުގައި ތިބި އިތުރު 2 މީހަކު ވަނީ ހައްޔަރުކޮށްފައެވެ.މި އެކްސިޑެންޓާ ގުޅިގެން ހައްޔަރުކުރި މީހުންނަކީ ހ. ނޫރަަންމާގެއާގެ، އިކްރާމުއްރަހްމާން އާއި، މ. ލޭންޑްއޮފްގާރޑްން އިބްރާހީމް އިކްރާމާއި، ގއ. ކަނޑުހުޅުދޫ އާޒާދުގެ، ޖިނާހް އިސްމާޢީލްއެވެ.
މި މައްސަލައިގައި ކްރިމިނަލް ކޯޓުގައި އާދީއްތަ ދުވަހު އޮތީ ހުކުމް އިއްވުމެވެ. މި މައްސަލާގައި އިކްރާމް ވަނީ އޭނާގެ މައްޗަށް އުފުލި ދައުވާތަކަށް އިއުތިރާފުވެ، ދައުލަތާ އެކު އިއުތިރާފުގެ އެއްބަސްވުމެއް ހަދާފައިވެއެވެ.
މި އަޑު އެހުމުގައި 4 ހުކުމެއް ވަނީ އިއްވާފައެވެ.
އެކްސިޑެންޓު ވުމުން އެ ކަމުގެ ރިޕޯޓު ނުކުރި މައްސަލައިގައި އިކްރާމްގެ މައްޗަށް އިއްވި ހުކުމުގައި ބުނެފައިވަނީ ހުއްދަ ކުރެވިފައިވާ ވަރަށްވުރެ ބާރު ސްޕީޑެއްގައި ކާރު ދުއްވާފައިގޮސް ހުޅުމާލެ ފޭސް 2 ގެ ހިތިގަސް މަގަށް ލަނބާލި ވަގުތު ކާރު ކޮންޓްރޯލުން ނެއްޓިގެން ގޮސް ސައިލަލުގައި ކާރުން ޖެހި އެކްސިޑެންޓްވުމުން، އެކަން، ކަމާ ގުޅުންހުރި އެއްވެސް އިދާރާއަކަށް ރިޕޯޓްނުކޮށް އެ ސަރަހައްދުން ގޮސްފައިވާކަން ސާބިތުވާކަމަށެވެ.
އެހެންކަމުން ދިވެހިރާއްޖޭގެ ގާނޫނުލް އުގޫބާތުގެ 531 ވަނަ މާއްދާގެ (ހ) ގެ ދަށުން އެކްސިޑެންޓްވުމުން އެކަމުގެ ރިޕޯޓް ނުކުރުމުގެ ކުށުން ކުށްވެރިވެއްޖެކަމަށް ކަނޑައަޅައި މި ކުށުގެ އުގޫބާތެއްގެ ގޮތުން އިކްރާމާއި ދައުލަތާއި ދެމެދު ވެފައިވާ އިއުތިރާފުގެ އެއްބަސްވުމުގެ ދަށުން 27 ދުވަހުގެ މުއްދަތަކަށް ޖަލަށްލުމައި ކަނޑައަޅައި އިއުތިރާފު އެއްބަސްވުމުގައިވާ ގޮތުގެ މަތިން އަދަބު 5400 ރުފިޔާއިން ޖޫރިމަނާކުރުމުގެ އަދަބަށް ބަދަލުކޮށް 8 މަސް ތެރޭގައި މީރާއަށް ދެއްކުމަށް ވަނީ އަންގާ ހުކުމްކޮށްފައެވެ.
އެހީއަށް ބޭނުންވެފައިވާ މީހާއަށް އެކަށީގެންވާ ސަބަބެއްނެތި، އެހީތެރިކަން ފޯރުކޮށް ނުދިން މައްސަލައިގެ ހުކުމުގައި ބުނެފައިވަނީ ކާރު އައިސް ޖެހުނު ސައިކަލުގައި އިން އަހުމަދު އަބާން އަލީގެ ހަށިގަނޑަށް ބޮޑެތި އަނިޔާ ލިބިފައިވަނިކޮށް އޭނާއަށް އެހީތެރިކަން ފޯރުކޮށްދިނުމެއް ނެތި އެ ސަރަހައްދުން އިކްރާމް ގޮސްފައިވާ ކަން އޭނާގެ އިއުތިރާފުން ސާބިތުވާ ކަމަށެވެ.
އެހެންކަމުން ދިވެހިރާއްޖޭގެ ގާނޫނުލް އުގޫބާތުގެ 618 ވަނަ މާއްދާގެ (ހ) ގެ 1 އަދި 2 ވަނަ ނަންބަރުގެ ދަށުން އެހީއަށް ބޭނުންވެފައިވާ މީހާއަށް އެކަށީގެންވާ ސަބަބެއްނެތި، އެހީތެރިކަން ފޯރުކޮށް ނުދިނުމުގެ ކުށުން ކުށްވެރިވެއްޖެކަމަށް ކަނޑައަޅައި މި ކުށުގެ އުގޫބާތެއްގެ ގޮތުން އިކްރާމާއި ދައުލަތާއި ދެމެދު ވެފައިވާ އިއުތިރާފުގެ އެއްބަސްވުމުގެ ދަށުން 3 ދުވަހުގެ މުއްދަތަކަށް ޖަލަށްލުމައި ކަނޑައަޅައި އިއުތިރާފު އެއްބަސްވުމުގައިވާ ގޮތުގެ މަތިން އަދަބު 600 ރުފިޔާއިން ޖޫރިމަނާކުރުމުގެ އަދަބަށް ބަދަލުކޮށް 8 މަސް ތެރޭގައި މީރާއަށް ދެއްކުމަށް ވަނީ އަންގާ ހުކުމްކޮށްފައެވެ.
މީހަކު ފަރުވާލެއްނެތި ކުރާ ޢަމަލެއްގެ ސަބަބުން، މީހަކަށް، އޭނާގެ ހަށިގަނޑަށް ބޮޑު އަނިޔާއެއް ލިބިދާނެކަމުގެ ބިރެއް ކުރިމަތިކުރުވުމުގެ މައްސަލައިގެ ހުކުމުގައި ބުނެފައިވަނީ އެކްސިޑެންޓްވުމުގެ ސަބަބުން އެ ސަރަހައްދުގައި ތިބި މީހުންނަށް ބޮޑު އަނިޔާއެއް ލިބިދާނެކަމުގެ ބިރެއް ކުރިމަތިކުރުވާފައިވާކަން އިކްރާމުގެ އިއުތިރާފުން ސާބިތުވާ ކަމަށެވެ.
އެހެންކަމުން ދިވެހިރާއްޖޭގެ ގާނޫނުލް އުގޫބާތުގެ 121 ވަނަ މާއްދާގެ (ހ) އާއި 121 ވަނަ މާއްދާގެ (ށ) ގެ 2 ވަނަ ނަންބަރުގެ ދަށުން މީހަކު ފަރުވާލެއްނެތި ކުރާ ޢަމަލެއްގެ ސަބަބުން، މީހަކަށް، އޭނާގެ ހަށިގަނޑަށް ބޮޑު އަނިޔާއެއް ލިބިދާނެކަމުގެ ބިރެއް ކުރިމަތިކުރުވުމުގެ ކުށުން ކުށްވެރިވެއްޖެކަމަށް ކަނޑައަޅައި މި ކުށުގެ އުގޫބާތެއްގެ ގޮތުން އިކްރާމާއި ދައުލަތާއި ދެމެދު ވެފައިވާ އިއުތިރާފުގެ އެއްބަސްވުމުގެ ދަށުން 6 މަހާއި 6 ދުވަހުގެ މުއްދަތަކަށް ޖަލަށްލުމައި ކަނޑައަޅައި މި މުއްދަތުގެ ތެރެއިން 3 މަސް ދުވަހުގެ މުއްދަތަކީ އޭނާގެ މައްޗަށް ކަނޑައެޅޭ ޖަލު އަދަބު ކަމަށް ކަނޑައަލައި ބާކީ 3 މަހާއި 6 ދުވަހުގެ ޖަލު އަދަބު 19،200 ރުފިޔާއިން ޖޫރިމަނާކުރުމުގެ އަދަބަށް ބަދަލުކޮށް، މި ފައިސާ 8 މަސް ތެރޭގައި މީރާއަށް ދެއްކުމަށް ވަނީ އަންގާ ހުކުމްކޮށްފައެވެ.
އަނިޔާއެއް ދިނުމުގެ މައްސަލައިގެ ހުކުމުގައި ބުނެފައިވަނީ އިކްރާމް ދުއްވަން އިން ކާރުން އަހުމަދު އަބާން އަލީ އިން ސައިކަލުގައި ޖެހި އަބާންގެ ހަށިގަނޑަށް ބޮޑެތި އަނިޔާތަކެއް ލިބިފައިވާކަން އިކްރާމުގެ އިއުތިރާފުން ސާބިތުވާ ކަމަށެވެ.
އެހެންކަމުން ދިވެހިރާއްޖޭގެ ގާނޫނުލް އުގޫބާތުގެ 121 ވަނަ މާއްދާގެ (ހ) އާއި 120 ވަނަ މާއްދާގެ (ހ) ގެ 1 ވަނަ ނަންބަރުގެ ދަށުން އަނިޔާއެއް ދިނުމުގެ ކުށުން ކުށްވެރިވެއްޖެކަމަށް ކަނޑައަޅައި މި ކުށުގެ އުގޫބާތެއްގެ ގޮތުން އިކްރާމާއި ދައުލަތާއި ދެމެދު ވެފައިވާ އިއުތިރާފުގެ އެއްބަސްވުމުގެ ދަށުން 1 އަހަރާއި 12 ދުވަހުގެ މުއްދަތަކަށް ޖަލަށްލުމައި ކަނޑައަޅައި މި މުއްދަތުގެ ތެރެއިން 5 މަސް ދުވަހުގެ މުއްދަތަކީ އޭނާގެ މައްޗަށް ކަނޑައެޅޭ ޖަލު އަދަބު ކަމަށް ކަނޑައަޅައި ބާކީ 7 މަހާއި 12 ދުވަހުގެ ޖަލު އަދަބު 44،800 ރުފިޔާއިން ޖޫރިމަނާކުރުމުގެ އަދަބަށް ބަދަލުކޮށް، މި ފައިސާ 8 މަސް ތެރޭގައި މީރާއަށް ދެއްކުމަށް ވަނީ އަންގާ ހުކުމްކޮށްފައެވެ.
އިކްރާމުގެ މައްޗަށް 70،000 ރުފިޔާ ދެއްކުމަށް ހުކުމްކޮށްފައިވާއިރު، ބަންދުގައި ގިނަ ދުވަސްތަކެއް ހޭދަކޮށްފައިވާތީ އޭނާ ބަންދުގައި ހުންނަން ނުޖެހޭނެއެވެ.
