ފަތުރުވެރިން ނުފުރި އެއާޕޯޓްގައި ތާށިވެފަ އެތައް ގަޑި އިރެއް - ބައެއް ފަތުރުވެރިންނަށް ފުރޭ ގޮތެއް ނުވި!

ރާއްޖެ އަށް ޗުއްޓީ ހޭދަކުރުމަށް އައި ފަތުރުވެރިންގެ ތެރެއިން، އާދިއްތަ ދުވަހު ރާއްޖެއިން ފުރަން ހަމަޖެހިފައިވާ ފަތުރުވެރިން ފުރުމުގެ އިންތިޒާމްތައް ދޯހަޅިވެ، ބައެއް ފަތުރުވެރިންނަށް ނުފުރި އެއަރޕޯޓް ތޮއްޖެހިއްޖެއެވެ.

ރާއްޖެއެމްވީ އަށް އެނގިފައިވާ ގޮތުން އާދިއްތަ ދުވަހަކީ ރާއްޖެ އަށް އާ އަހަރަށް އައި ފަތުރުވެރިންގެ ތެރެއިން އެންމެ ގިނަ ބަޔަކު އަނބުރާ ޤައުމަށް ދިއުމަށްފުރުމަށް ހަމަޖެހިފައި އޮތް ދުވަހެވެ. އާއްމު ގޮތެއްގައި ވެސް އާދިއްތަ ދުވަހަކީ އެއާޕޯޓް ބާރުބޮޑު ދުވަހަކަށް ވުމާއި އެކު މި އާދިއްތަ ދުވަހު ފަތުރުވެރިންނަށް ފަސޭހަ އިންތިޒާމްތަކެއް ހަމަޖެހިފަ ހުންނާނެ ކަމަށް ފަތުރުވެރިންނަށް ޚިދުމަތްދެމުންދާ އެޖެންޓުން ތިބީ އުންމީދުކޮށްގެންނެވެ.

ރާއްޖެއެމްވީ އަށް ވަނީ އާދިއްތަ ދުވަހު އެއާޕޯޓްގެ ހާލަތު ދައްކުވައިދޭ ވީޑިއޯތަކެއް ލިބިފައެވެ. އެ ވީޑިއޯތަކުން އެއާޕޯޓުގެ އިންޓަރނޭޝަނަލް ޓަރމިނަލް އިން ބޭރުގައި ދިގު ކިއުތައް ހަދާފައިވާ މަންޒަރު ފެނެއެވެ. އެ ކިއުތައް އެއާޕޯޓް ޓަރމިނަލް އިން ބޭރަށް ދަމާލާފައިވާއިރު، ނުފުރި އެއާޕޯޓުގައި އެތައް ފަތުރުވެރިން ތިބި މަންޒަރު ވެސް އެ ވީޑިއޯތަކުން ފެނެއެވެ.

ރާއްޖެ އެމްވީ އަށް އިތުބާރު ހުރި މަސްދަރަކުން މައުލޫމާތު ލިބިފައިވާ ގޮތުގައި ބައެއް ފަތުރުވެރިން ފުރުން ހަމަޖެހިފައިވާ ފްލައިޓް ފުރި އިރު ވެސް ޗެކިން ކައުންޓަރާއި ހަމައަށް ފަތުރުވެރިންނަށް ދެވޭ ގޮތް ނުވުމުން އެ ފަތުރުވެރިންނަށް ފުރޭ ގޮތް ވަނީ ނުވެފައެވެ. ފަތުރުވެރިންނަށް ޚިދުމަތް ދިނުމުގައި މަސައްކަތްކުރާ މީހަކު ނަން ހާމަ ނުކުރުމަށް ޝަރުތުކޮށް ރާއްޖެ އެމްވީ އަށް ކިޔާދިން ގޮތުގައި އެ މައްސަލަ ދިމާވީ ވާންޖެހޭ މިންވަރަށް އެއާޕޯޓުން ތައްޔާރުވެފައި ނެތުމުގެ ސަބަބުންނެވެ.

އެގޮތުން ފަތުރުވެރިންނަށް ޚިދުމަތް ދޭން ޖެހޭ މިންވަރާއި ގާތަށް ވެސް ކެޕޭސިޓީ ނެތްކަމަށް ރާއްޖެއެމްވީ އާއި ވާހަކަދެއްކި މީހާ ވަނީ ބުނެފައެވެ. ފަތުރުވެރިންނަށް ފުރޭ ގޮތް ނުވުމުން ފަތުރުވެރިންގެ ބޮޑެތި ހިތްހަމަނުޖެހުންތަކާއި ކުރިމަތިލާން ޖެހުނުކަން ފާހަގަކޮށް އޭނާ ބުނީ މިއީ ރާއްޖޭގެ ފަތުރުވެރިކަމުގެ ސިނާއަތަށް ވެސް ނޭދެވޭ އަސަރު ކުރާނެ ކަމެއް ކަމަށެވެ.

ރާއްޖެއެމްވީ އަށް މައުލޫމާތު ލިބިފައިވާ ގޮތުން ހެނދުނު 07:30 އިން ފެށިގެން މެންދުރާއި ހަމައަށް ވެސް އިންޓަރނޭޝަނަލް ޓަރމިނަލް އޮތީ ވަރަށް ބޮޑަށް ތޮއްޖެހިފައެވެ. ރާއްޖެއެމްވީ އާއި ވާހަކަދެއްކި އިތުރު މީހަކު ބުނީ ސަރުކާރުން ވީއައިއޭ އޮތީ ސީޒަނަށް ތައްޔާރުވެފައި ކަމަށް ބުނި ނަމަވެސް، ހަގީގަތް އޮތީ އެއާއި މުޅިން ޚިލާފަށް ކަމަށެވެ. އެއާޕޯޓުގައި ފަތުރުވެރިން ދެ ތިން ގަޑި އިރު މަޑު ކުރުމަށް ފަހު ވެސް ގައުމަށް އެބުރި ދެވޭ ގޮތް ނުވުމަކީ އެއީ ފަތުރުވެރިން ވަރަށް މާޔޫސްވާކަމެއްކަން އޭނާ ވަނީ ފާހަގަކޮށްފައެވެ.

މި މައްސަލަ ދިމާވި ސަބަބު ރާއްޖެ އެމްވީ އާއި ހިއްސާކުރަމުން އިތުރު މީހަކު ބުނީ ވަރަށް ހެނދުނު ރިސޯޓްތަކުން ގައުމަށް ފުރަން އަންނަ ފަތުރުވެރިން އަންނަން ފަށާކަމަށެވެ. ފަތުރުވެރިން ފުރުމުގެ އިންތިޒާމްތަކުގެ ތެރެއިން ފުލް ކެޕޭސިޓީގައި މަސައްކަތް ކުރާ ނަމަ އެމްއޭސީއެލް އިން ދެ ތިން ލަގެޖް މެޝިން ޖައްސާ ކަމަށް އޭނާ ވަނީ ބުނެފައެވެ.

އެ ކެޕޭސިޓީގައި މަސައްކަތް ނުކޮށް ފަތުރުވެރިން ގިނަ ދުވަސް ދުވަހު ފުރުވާ ނުލެވޭ ކަމަށް އޭނާ ފާހަގަކުރިއެވެ. އެހެންނަމަވެސް އާދިއްތަ ދުވަހު އެމްއޭސީއެލް އިން މަސައްކަތް ކުރީ ފުލް ކެޕޭސިޓީގައި ނޫން ކަމަށާއި، ލަގެޖް މެޝިން އޮޕަރޭޓްކުރުމަށް އެމްއޭސީއެލް އިން މުވައްޒަފުން ނުނެރޭ ކަމަށް އޭނާ ވަނީ ބުނެފައެވެ. މުވައްޒަފުން އެ މަސައްކަތަށް ނުނުކުތީމަ ފަތުރުވެރިންގެ ލަގެޖްތައް ސްކޭންކޮށްފަ ފުރަން ވަނުމާއި ދެމެދު ވަރަށް ގިނަ ވަގުތު ހޭދަވާ ކަމަށާއި އެކަމުގެ ސަބަބުން ފަތުރުވެރިން ފުރުމުގެ މަރުހަލާ ވަރަށް ބޮޑަށް ދިގުދެމިގެންދާ ކަމަށް އެނާ ވަނީ ބުނެފައެވެ.

ހަމައެހެންމެ މޫސުން ގޯސް ނަމަ ސީޕްލޭން އިން އަންނަ މީހުންވެސް ތާށިވެފައި ޓަރމިނަލް އިން ބޭރުގައި ވެސް ތިބެން ޖެހޭ ކަމަށް އޭނާ ވަނީ ބުނެފައެވެ. ފަހަކަށް އައިސް މިފަދަ މައްސަލަތައް ދިމާވާ މިންވަރު އިންތިހާއަށް އިތުރުވެފައިވާ ކަމަށް އޭނާ ވަނީ ބުނެފައެވެ.

ރާއްޖެއެމްވީ އާއި ވާހަކަދެއްކި މީހުންގެ ފަރާތުން އެނގުނު ގޮތުގައި ހެނދުނު 07:30 އިން 11:00 އާއި ހަމައަށް އެއާޕޯޓުގައި ތާށިވެފައި އެތައް ފަތުރުވެރިންނެއް ތިއްބެވެ. އަދި ނުފުރުނު ފަތުރުވެރިން އަނބުރާ ހޮޓެލްތަކާއި ރިސޯޓްތަކަށް ގެންދަން ޖެހުނީ އެޖެންޓުން އެކަމަށް އަގު ދައްކައިގެންނެވެ. އެކަމުގެ ސަބަބުން އެޖެންޓުންނަށް މާލީ އިތުރު ތަކްލީފެއް އުފުލަން ޖެހުނުކަން ފާހަގަކޮށްލެވެއެވެ.

މިކަމާއި ގުޅޭގޮތުން އެމްއޭސީއެލްގެ ބަހެއް ހޯދުމަށް ކުރި މަސައްކަތް ވަނީ ކާމިޔާބުވާގޮތް ނުވެފައެވެ. އެހެންކަމުން މި މައްސަލަ ދިމާވި ސަބަބު، އަދި ނުފުރުނު ފަތުރުވެރިންގެ ސީދާ އަދަދު ވަނީ ސާފުވާގޮތް ނުވެފައެވެ.