ޕާސްޕޯޓް ކެންސަލްކޮށްފައި އޮތުމުން އިނގިރޭސި ވިލާތުގެ އެއާޕޯޓްގައި ޖާބިރު "ބަންދުކޮށްފި"
21 ޖޫން 2017 | ބުދަ 06:19ޕާސްޕޯޓް ހިފަހައްޓާލާފައިވަނީ ކީއްވެ ކަމެއް އެނގިފައެއް ނުވޭ
ކުރީގެ މެމްބަރު އަބްދުﷲ ޖާބިރު
ރައްޔިތުންގެ މަޖިލީހުގެ ކުރީގެ މެމްބަރު އަދި މަޝްހޫރު ވިޔަފާރިވެރިޔާ އަބްދުﷲ ޖާބިރުގެ ޕާސްޕޯޓް ކެންސަލްކޮށްފިއެވެ.
ޖާބިރުގެ އަނބިކަނބަލުން، ކުރީގެ ބަންޑާރަ ނައިބު ދިޔާނާ ސައީދު ވިދާޅުވި ގޮތުގައި ޕާސްޕޯޓް ކެންސަލްކޮށްފައި ވުމުން އިނގިރޭސި ވިލާތުގެ ގެޓްވިކް އެއާޕޯޓުގައި ޖާބިރު ވަނީ "ބަންދުކޮށްފަ" އެވެ. އެ އެއާޕޯޓުން ޖާބިރު އަނބުރާ ފޮނުވާލާނެ ކަމަށް ބެލެވޭ ކަމަށް ވެސް އޭނާ ވިދާޅުވި އެވެ.
ޖާބިރުގެ ޕާސްޕޯޓް ކެންސަލްކޮށްފައިވާކަން އެނގުނީ ދިޔާނާ ވިދާޅުވި ގޮތުގައި އޭނާ އިޓަލީއިން އިނގިރޭސި ވިލާތަށް އަންގާރަ ދުވަހުގެ ރޭ ވަޑައިގަތުމުންނެވެ. ޖާބިރާއެކު މި ދަތުރުގައި ދިޔާނާ ބައިވެރިވެވަޑައި ނުގަންނަވަ އެވެ.
ދިޔާނާ ވިދާޅުވީ ޕާސްޕޯޓް ހިފަހައްޓާލާފައިވަނީ ކީއްވެ ކަމެއް އެނގިފައެއް ނުވާ ކަމަށެވެ. މިކަމާ ގުޅޭ ގޮތުން އިމިގްރޭޝަންގެ ބަހެއް ވެސް އަދި ނުލިބެ އެވެ.
ބަލަމުންދާ މައްސަލައަކާއި ގުޅިގެން އެޕްރީލު މަހުގެ 27 ވަނަ ދުވަހު ފުލުހުން ވަނީ ޖާބިރު ހޯދުމަށްޓަކައި، މާލޭގައި ހުންނަ އޭނާގެ ގެއަށް ގޮސްފައެވެ. ޖާބިރު ހޯދަން ފުލުހުން ދިޔައިރު، އޭނާ އުޅުއްވީ ރާއްޖެއިން ބޭރުގައެވެ.
