ގއ. ހިތާދޫ އަށް ގެއްލުންދިން ފަތުރުވެރިންނަށް އަދި ފިޔަވަޅެއް ނާޅަން: މިނިސްޓްރީ
ހިތާދޫ އަކީ ގިނަ އަދަދަކަށް ހޯރަ އަރާ ރަށެއް
ގއ. ހިތާދޫ: ހޯރަ އަރާ މޫސުމުގައި މި ރަށަށް ގިނަ އަދަދަކަށް ހޯރަ އަރާ
ތިމާވެށީގެ ނާޒުކުކަމުގެ ސަބަބުން ހިމާޔަތްކޮށްފައިވާ ގއ. ހިތާދޫ އަށް އަރައި އެ ރަށަށް ގެއްލުން ދިން ފަތުރުވެރިން ޖޫރިމަނާކުރާނެ އަދަދެއް އަދި ނުނިންމާ ކަމަށް އެންވަޔަރަމެންޓް މިނިސްޓްރީ އިން ބުނެފި އެވެ.
ގއ. ކޮލަމާފުށި ކައިރީގައި އޮންނަ ހިތާދޫއަކީ ޅޮސްގަހާއި ހޯރައަށް މަޝްހޫރު ރަށެކެވެ. އެ ރަށަކީ ގިނަ އަދަދަކަށް ހޯރަ އަރާ ރަށެކެވެ.
ހިތާދޫ އަށް ގެއްލުންދީފައިވަނީ މިދިޔަ މަހުގެ 29 ވަނަ ދުވަހު އެ ރަށަށް ސަފާރީއެއްގައި ދިޔަ ފަތުރުވެރިންތަކެކެވެ. އެ ފަތުރުވެރިން ވަނީ އެ ރަށުގެ ފަރަށް ނަގިލި ލައި، ރަށުގެ ގަސް ގަހަށް ވެސް ގެއްލުންދީފަ އެވެ. އަދި މީގެ އިތުރުން އެރަށުގެ ގޮނޑުދޮށުގައި ބާބަކިއު ހަދާފައިވެ އެވެ.
ފަތުރުވެރިންތައް އެ ރަށުން ބާލާފައިވަނީ ގއ. އަތޮޅު ކައުންސިލާއި، ކޮލަމާފުށީ ކައުންސިލުގެ އިތުރުން ފުލުހުން ގުޅިގެންނެވެ.
ހިމާޔަތްކޮށްފައިވާ ރަށްރަށަށް ހުއްދަ ނުހޯދައި އެރުމަކީ މަނާ ކަމެކެވެ. އަދި އެފަދަ ރަށްރަށުގެ ފަރަށް ނަގިލި ލައި ގަސްގަހާ ގެއްސަށް ގެއްލުން ދިނުމަކީ ތިމާވެށި ރައްކާތެރިކޮށް ދެމެހެއްޓުމާ ބެހޭ ގާނޫނުގެ ދަށުން މަނާ ކަމެކެވެ.
ރާއްޖެއެމްވީ އަށް މައުލޫމާތު ދެއްވަމުން އެންވަޔަރަމެންޓް މިނިސްޓްރީގެ މީޑިއާ އޮފިޝަލް ވިދާޅުވީ އެންވަޔަރަމެންޓް ޕްރޮޓެކްޝަން އެޖެންސީ (އީޕީއޭ) އިން އެ މައްސަލަ ތަހުގީގު ކުރަމުންދާ ކަމަށެވެ. އަދި އެ ފަތުރުވެރިން ރާއްޖެ ގެނައި އެޖެންޓާ ވާހަކަ ދައްކަމުންދާ ކަމަށާއި ނަމަވެސް މިހާތަނަށް އަދި ޖޫރިމަނާކުރާނެ އަދަދެއް ކަނޑައަޅާފައިނުވާ ކަމަށް އޮފިޝަލް ވިދާޅުވި އެވެ.
މި މައްސަލައާ ގުޅޭ ގޮތުން އެންވަޔަރަމެންޓް މިނިސްޓްރީން ކުރިން ބުނީ އެފަދަ ސަފާރީތައް ރާއްޖެ އަންނަނީ ކޮންމެވެސް އެޖެންޓެއް މެދުވެރިވެގެން ކަމަށާއި އާންމުކޮށް މިފަދަ ކަންކަން ހިނގަނީ އެޖެންޓުގެ ފަރުވާކުޑަކަމުން ނުވަތަ ހޭލުންތެރިކަން ކުޑަވުމުގެ ސަބަބުން ކަމަށެވެ.
ރާއްޖޭގައި ރީތި ގޮނޑުދޮށްތައް ހިމެނޭ ގިނަ އަދަދެއްގެ ރަށްތަކެއްވާއިރު، ހިމާޔަތް ކުރެވިފައިވާ ރަށްރަށާއި އެ ނޫން ރަށްރަށް ވަކިކުރަން އެޖެންޓުންނަށް އެނގެންޖެހޭ ކަމަށް މިނިސްޓްރީން ބުނެފައިވެ އެވެ. އަދި ރަށަށް ދޭ ގެއްލުމާ ގުޅިގެން ފިޔަވަޅު އެޅި ނަމަވެސް، ރަށަށް ލިބެނީ އިޔާދަނުކުރެވޭ ވަރުގެ ގެއްލުންތަކެއް ކަމަށް ވެސް ބުނެފައިވެ އެވެ.
