އެމްޑީޕީގެ ދާއިރާ ރައީސް ކަމަށް ކުރިމަތިލާން ހުޅުވާލައިފި
3 ޖެނުއަރީ 2025 | ހުކުރު 12:00ތިން ދާއިރާއެއްގެ ރައީސްކަމުގެ މަގާމަށް ކުރިމަތިލުމުގެ ފުރުސަތު ހުޅުވާލާފައިވަނީ ބުރާސްފަތި ދުވަހުން ފެށިގެން މި މަހުގެ 6 ވަނަ ދުވަހާ ހަމައަށް ކަމަށް އެމްޑީޕީން ބުނޭ
އެމްޑީޕީ ޤައުމީ މަޖިލީހުގެ ޖަލްސާގެ ތެރެއިން
އިދިކޮޅު ޕާޓީ، އެމްޑީޕީގެ ގައުމީ މަޖިލީހުން ހުސްވެފައިވާ ތިން ދާއިރާއެއްގެ ރައީސް ކަމަށް ކުރިމަތިލުމުގެ ފުރުސަތު ހުޅުވާލައިފި އެވެ.
ބުރާސްފަތި ދުވަހު އެ ޕާޓީން އާއްމު ކުރި އިއުލާނުގައި ބުނީ، ފުރުސަތު ހުޅުވާލާފައިވަނީ ހއ. ހޯރަފުށީ ދާއިރާގެ ރައީސް، ރ. އިނގުރައިދޫ ދާއިރާގެ ރައީސް އަދި ގއ. ވިލިނގިލީ ދާއިރާގެ ރައީސް ކަމުގެ މަގާމަށް ކުރިމަތިލުމަށް ކަމަށެވެ.
އެ ޕާޓީން ބުނީ ތިން ދާއިރާއެއްގެ ރައީސްކަމުގެ މަގާމަށް ކުރިމަތިލުމުގެ ފުރުސަތު ހުޅުވާލާފައިވަނީ ބުރާސްފަތި ދުވަހުން ފެށިގެން މި މަހުގެ 6 ވަނަ ދުވަހާ ހަމައަށް ކަމަށެވެ.
އެމްޑީޕީން ކުރި އިއުލާނުގައި ބުނާ ގޮތުން އެ މަގާމުތަކަށް ކުރިމަތިލެވޭނީ، މިދިޔަ ބުދަ ދުވަހާ ހަމައަށް އެ ޕާޓީގެ މެމްބަރުންގެ ގޮތުގައި ތިބި ފަރާތްތަކަށެވެ. އަދި އެ ފަރާތަކީ ވޭތުވެދިޔަ 5 އަހަރު އެ ޕާޓީގެ އަސާސީ ގަވާއިދާ ހިލާފުވެފައިވާ މީހަކަށް ވެއްޖެ ނަމަ، އެ ފަރާތަކަށް މަގާމަށް އެދި ކުރިމަތިލުމުގެ ފުރުސަތު ގެއްލެ އެވެ.
މީގެ އިތުރުން އެ ޕާޓީން ކުރި އިއުލާނުގައި ވަނީ ދާއިރާތަކުގެ އިންތިޚާބަށް ކުރިމަތިލުމަށް އެދޭ ފޯމް 06 ޖަނަވަރީ 2025 ވާ ހޯމަ ދުވަހުގެ 14:00ގެ ކުރިން ހުށައެޅުއްވުން އެދޭކަމަށެވެ.
އެމްޑީޕީގެ ގައުމީ މަޖިލީހުގައި ތިބެނީ ދާއިރާތަކުގެ ރައީސުންނެވެ. އޭގެއިތުރުން ދެން އެންމެ އިސްކޮށް ތިއްބަވަނީ ޗެއާޕާސަނާއި ޕާޓީގެ ރައީސާއި ރައްޔިތުންގެ މަޖިލީސް ތަމްސީލްކުރައްވަމުން ގެންދަވާ މެމްބަރުންނެވެ. އެއަށްފަހު ޒުވާނުންގެ ހިތްވަރުގެ ރައީސް އިތުރުން އިސްލާމީ މަޝްވަރާ މަޖިލީހުގެ ރައީސެވެ.
