ބެލެންޑިއޯ އިންސާފުވެރި ނޫން، ލިބެން ޖެހޭނީ ވިނީޝިއުސް އަށް: ރޮނާލްޑޯ

ފްރާންސް ފުޓުބޯޅަ އިން ދުނިޔޭގެ އެންމެ މޮޅޫ ފުޓުބޯޅަ ކުޅުންތެރިޔާ އަށް ދެމުން އަންނަ ބެލެންޑިއޯ އެވޯޑު، މިއަހަރު ހައްގީ ސްޕެއިންގެ ރެއާލް މެޑްރިޑަށް ކުޅެމުން އަންނަ ބްރެޒިލްގެ ވިނީޝިއުސް ޖޫނިއާ އަށް ކަމަށް، ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ ބުނެފި އެވެ.

ރޮނާލްޑޯ މިހެން ބުނީ ގްލޯބް ސޮކާ އެވޯޑު ހަފުލާގައި ބައިވެރިވެ ވާހަކަ ދައްކަމުންނެވެ. މިއަހަރުގެ ބެލެންޑިއޯ އެވޯޑު ކާމިޔާބު ކުރީ މެންޗެސްޓަރ ސިޓީ އަށް ކުޅެމުން އަންނަ ސްޕެއިންގެ ރޮޑްރީ އެވެ. ނަމަވެސް، ގިނަ ބަޔަކު ޤަބޫލުކޮށްގެން ތިބީ ބެލެންޑިއޯ އެވޯޑު ކާމިޔާބު ކުރާނީ ވިނީޝިއުސް ކަމަށެވެ. ވިނީޝިއުސް އަށް ބެލެންޑިއޯ އެވޯޑު ނުލިބޭކަން އިނގުމުން، ރެއާލް މެޑްރިޑުން ވަނީ އެވޯޑު ހަފުލާ ބޮއިކޮޓް ވެސް ކޮށްފަ އެވެ.

އެކަމާ ގުޅޭ ގޮތުން ވާހަކަ ދައްކަމުން ރޮނާލްޑޯ ބުނީ، އޭނާގެ ނަޒަރުގައި މިއަހަރުގެ ބެލެންޑިއޯ އެވޯޑު އިންސާފުވެރި ނޫން ކަމަށެވެ. ގްލޯބް ސޮކާ އެވޯޑަކީ ވަރަށް ރަނގަޅަށް، އިންސާފުވެރިކަމާ އެކު ދޭ އެވޯޑެއްކަން ފާހަގަ ކުރަމުން ރޮނާލްޑޯ ބުނީ، ގްލޯބް ސޮކާ އެވޯޑު އޭނާ އަށް ބަލައި ގަނެވެނީ ވެސް އެ ސަބަބާ ހުރެ ކަމަށެވެ.

މީގެ އިތުރުން ރޮނާލްޑޯ ބުނީ ފްރާންސް ފުޓުބޯޅަ އިން މިއަހަރުގެ ބެލެންޑިއޯ ދިނީ ރޮޑްރީ އަށް ކަމަށާއި، ނަމަވެސް އޭނާގެ ނަޒަރުގައި އެވޯޑު ލިބެން ޖެހޭނީ ވިނީޝިއުސް އަށް ކަމަށެވެ. ސަބަބަކީ ވިނީޝިއުސް ޔުއެފާ ޗެމްޕިއަންސް ލީގު ކާމިޔާބު ކުރުމާއި، މުބާރާތުގެ ފައިނަލްގައި ލަނޑު ޖެހުން ކަމަށް ރޮނާލްޑޯ ވަނީ ބުނެފަ އެވެ.

މިއަހަރުގެ ގްލޯބް ސޮކާ އެވޯޑުގެ އެންމެ މޮޅު ފޮވާޑުގެ އެވޯޑުގެ އިތުރުން، އެންމެ މޮޅު ކުޅުންތެރިޔާގެ އެވޯޑު ވެސް ކާމިޔާބު ކުރީ ވިނީޝިއުސް އެވެ. ބެލެންޑިއޯ އެވޯޑުގެ ފަހުން އޮތް، ފީފާ ބެސްޓު އެވޯޑު ކާމިޔާބު ކުރީ ވިނީޝިއުސް އެވެ. ވިނީޝިއުސް އަށް މިއަހަރުގެ ބެލެންޑިއޯ އެވޯޑު ނުލިބުމުން، ގިނަ ކުޅުންތެރިންނާއި ކޯޗުން ވަނީ އެކަމަށް ފާޑު ކިޔައިފަ އެވެ.

ރޮނާލްޑޯ އަކީ ބެލެންޑިއޯ އެވޯޑު ދެ ވަނަ އަށް އެންމެ ގިނަ ފަހަރު ކާމިޔާބު ކޮށްފައިވާ ކުޅުންތެރިޔާ އެވެ. އޭނާ ވަނީ ޖުމުލަ ފަސް ފަހަރެއްގެ މަތިން ބެލެންޑިއޯ އެވޯޑު ކާމިޔާބު ކޮށްފަ އެވެ. އެއީ 2008، 2014، 2015، 2016، 2017 އަދި 2020 ވަނަ އަހަރު އެވެ. އެންމެ ގިނަ ފަހަރު ބެލެންޑިއޯ އެވޯޑު ކާމިޔާބު ކޮށްފައި ވަނީ އާޖެންޓީނާގެ ކެޕްޓަން ލިއޮނަލް މެސީ އެވެ. މެސީ ވަނީ އަށް ފަހަރެއްގެ މަތިން ބެލެންޑިއޯ އެވޯޑު ކާމިޔާބު ކޮށްފަ އެވެ.