ބޯންމައުތު އަތުން ޔުނައިޓެޑަށް ލަދުވެތި ބައްޔެއް

އިނގިރޭސި ޕްރިމިއަރ ލީގުގައި ބޯންމައުތާ ދެކޮޅަށް ކުޅުނު މެޗުން ބަލިވެ، މެންޗެސްޓަރ ޔުނައިޓެޑަށް ލަދުވެތި ނަތީޖާއަކާ ކުރިމަތިލާން ޖެހިއްޖެ އެވެ.

ޔުނައިޓެޑުގެ އަމިއްލަ ދަނޑުގައި އާދީއްތަ ދުވަހުގެ ރޭ ކުޅުނު މެޗުން އެ ޓީމު ބަލިވެފައި ވަނީ 3-0 އިންނެވެ. މެޗުގެ ފުރަތަމަ ހާފުގައި ބޯންމައުތުން އެއް ލަނޑު ޖެހިއިރު، ދެ ވަނަ ހާފުގައި އެ ޓީމުން ވަނީ ދެ ލަނޑު ޖަހައިފަ އެވެ.

މެޗުގެ ފުރަތަމަ ހާފުގެ 29 ވަނަ މިނެޓުގައި ބޯންމައުތަށް ލީޑު ނަގައިދިނީ ޑީން ހިއުސަން އެވެ. އޭނާ އެ ލަނޑު ޖެހީ ރަޔާން ކްރިސްޓީ ތަނަވަސްކޮށްދިން ފުރުސަތެއްގަ އެވެ. މެޗުގެ ނަތީޖާ ހަމަހަމަ ކުރުމަށް ޔުނައިޓެޑުން މަސައްކަތް ކުރަމުން ދަނިކޮށް، މެޗުގެ 61 ވަނަ މިނެޓުގައި ބޯންމައުތުން ވަނީ ދެ ވަނަ ލަނޑެއް ޖަހައިފަ އެވެ. އެ ޓީމަށް ލިބުނު ޕެނަލްޓީ ކާމިޔާބުކޮށް އެ ލަނޑު ޖެހީ ޖަސްޓިން ކްލައިވަޓް އެވެ. އޭގެ ދެ މިނެޓު ފަހުން ބޯންމައުތުން ވަނީ ތިން ވަނަ ލަނޑެއް ވެސް ޖަހައި، ޔުނައިޓެޑު ހާސްކޮށްލައިފަ އެވެ. އެ ލަނޑު ބޯންމައުތަށް ޖަހައިދިނީ އަންޓޮއިން ސެމެންޔޯ އެވެ.

މިއީ ޔުނައިޓެޑުގެ ތާރީޚުގައި ވެސް އެ ޓީމުގެ އަމިއްލަ ދަނޑުގައި ބޯންމައުތު އަތުން ބަލިވި ދެ ވަނަ ފަހަރެވެ. މިދިޔަ ސީޒަންގެ ލީގުގައި ވެެސް ޔުނައިޓެޑު ވަނީ އަމިއްލަ ދަނޑުގައި ބޯންމައުތު އަތުން ބަލިވެފަ އެވެ. ބައްޔާއެކު ޔުނައިޓެޑު އޮތީ ލީގު ތާވަލްގެ 13 ވަނައިގަ އެވެ. އެއީ މިހާތަނަށް އެ ޓީމު ކުޅެފައިވާ 17 މެޗުން 22 ޕޮއިންޓާ އެކު އެވެ. ޔުނައިޓެޑު އަތުން މޮޅުވި ބޯންމައުތު އޮތީ 17 މެޗުން 28 ޕޮއިންޓާ އެކު ފަސް ވަނައިގަ އެވެ.