ފުރިހަމަ ރެކޯޑާ އެކު އައްޑޫ ފައިނަލަށް

މިހާރު ކުރިއަށްދާ ނައިންޓީ ޕްލަސް ގޯލްޑް ކަޕް ފުޓުބޯޅަ މުބާރާތުގެ ސެމީ ފައިނަލްގައި ރ.އަލިފުށި ބަލިކޮށް، ފުރިހަމަ ރެކޯޑާ އެކު އައްޑޫ ސިޓީން މުބާރާތުގެ ފައިނަލަށް ދަތުރު ކޮށްފި އެވެ.

ހޮނިހިރު ދުވަހުގެ ރޭ ގަލޮޅު ރަސްމީ ދަނޑުގައި ކުޅުނު މެޗު އައްޑޫ އިން ކާމިޔާބު ކުރީ 2-0 އިންނެވެ. މެޗުގައި އައްޑޫ އިން އެ ޓީމުގެ ދެ ލަނޑު ވެސް ޖެހީ ދެ ވަަނަ ހާފުގަ އެވެ. ފުރަތަމަ ހާފުގައި ވެސް އައްޑޫ އިން ވަނީ ލަނޑު ޖަހާނެ ފުރުސަތުތަކެއް ތަނަވަސްކޮށްފަ އެވެ.

ދެ ޓީމުގެ ފަރާތުން ވެސް ވާދަވެރި ކުޅުމެއް ފެނުނު މެޗުގައި އައްޑޫ އިން ލަނޑު ޖަހައި ލީޑު ހޯދީ، ދެ ވަނަ ހާާފު ފަށައިގެން ހަތް ވަނަ މިނެޓުގަ އެވެ. އެ ލަނޑު އައްޑޫ އަށް ޖަހައިދިނީ ޝަމްވީލް ޤާސިމް (ބޮންޑާ) އެވެ. އެ ލަނޑު އޭނާ ޖެހީ އައްޑޫގެ އިސްމާއީލް އީސަ (މެސީ) ތަނަވަސްކޮށްދިން ފުރުސަތެއްގަ އެވެ. މެޗުގައި އައްޑޫގެ ދެ ވަނަ ލަނޑު، 69 ވަނަ މިނެޓުގައި ޖެހީ އިބްރާހީމް މަހުދީ ޙުސެއިން (ފޭދޫ އިއްބެ) އެވެ. މެޗުގައި އޭނާ ކުޅެން ނިކުތީ ވެސް ބަދަލު ކުޅުންތެރިޔެއްގެ ގޮތުގަ އެވެ.

މޮޅާއެކު އައްޑޫ އިން މުބާރާތުގެ ފައިނަލްގެ ޖާގަ ހޯދިއިރު، ފައިނަލްގައި އެ ޓީމު ނިކުންނާނީ ބ.އޭދަފުއްޓާ ދެކޮޅަށެވެ. ގޯލްޑް ކަޕްގެ ފައިނަލް މެޗު ކުޅުމަށް ހަމަޖެހިފައި ވަނީ އަންގާރަ ދުވަހުގެ ރޭ އެވެ. މިއަހަރުގެ މުބާރާތުގައި އައްޑޫ މިހާތަނަށް ކުޅުނު ހުރިހާ މެޗަކުން މޮޅުވެފައިވާއިރު، މުބާރާތުގައި އެއްވެސް މެޗަކުން ބަލި ނުވެ އޮތް ހަމައެކަނި ޓީމަކީ ވެސް އައްޑޫ އެވެ.