މިހާރު ކުރިއަށްދާ ނައިންޓީ ޕްލަސް ގޯލްޑް ކަޕް ފުޓުބޯޅަ މުބާރާތުގެ ސެމީ ފައިނަލްގެ މެޗުތައް ހޮނިހިރު ދުވަހު (މިއަދު)ގެ ހަވީރު އަދި ރޭގަނޑު އޮންނާނެ އެވެ.
ވަޅު ޖެހިފައިވާ ދިވެހި ފުޓުބޯޅައިގެ ފޯރި އަލުން ގެނައުމުގެ މަޤުސަދުގައި މުޅިން އަލަށް ތަޢާރަފު ކުރި ގޯލްޑް ކަޕް ފުޓުބޯޅަ މުބާާރާތުގައި 17 ޓީމަކުން ވަނީ ބައިވެރިވެފަ އެވެ. މީގެ ތެރެއިން މުބާރާތުގެ ސެމީ ފައިނަލާ ހަމައަށް އައިސްފައިވާ ހަތަރު ޓީމަކީ، މާލޭ ސިޓީ، އައްޑޫ ސިޓީ، ބ.އޭދަފުށި އަދި ރ.އަލިފުށި އެވެ.
މުބާރާތުގެ ސެމީ ފައިނަލްގެ ޖާގަ މާލޭ ސިޓީން ހޯދީ ކުއާޓާ ފައިނަލްގައި ކ.ގުރައިދޫގެ މައްޗަށް ކުރި ހޯދައިގެންނެވެ. ކުއާޓާ ފައިނަލްގައި އައްޑޫ ސިޓީން ވަނީ ކ.މާފުށީގެ މައްޗަށް ކުރި ހޯދައިފަ އެވެ. އޭދަފުށިން ކުއާޓާ ފައިނަލްގައި ވަނީ ޅ.ނައިފަރުގެ މައްޗަށް ބޮޑު މޮޅެއް ހޯދައިފަ އެވެ. އަދި އަލިފުށިން ވަނީ ފުވައްމުލައް ސިޓީގެ މައްޗަށް ކުއާޓާ ފައިނަލްގައި ކުރި ހޯދައިފަ އެވެ.
ސެމީ ފައިނަލްގެ ފުރަތަމަ މެޗުގައި ހޮނިހިރު ދުވަހުގެ ހަވީރު ބައްދަލު ކުރާނީ އޭދަފުއްޓާއި މާލޭ ސިޓީ އެވެ. މި ދެ ޓީމު ވަނީ މުބާރާތުގެ ފުރަތަމަ ބުރުގެ ގުރޫޕު ސްޓޭޖުގައި ވެސް ބައްދަލު ކޮށްފަ އެވެ. އެ މެޗުގަައި އޭދަފުށިން ވަނީ މާލޭ ސިޓީގެ މައްޗަށް ކުރި ހޯދައިފަ އެވެ. ސެމީ ފައިނަލްގައި ދެ ވަނަ މެޗުގައި ހޮނިހިރު ދުވަހުގެ ރޭ ބައްދަލު ކުރާނީ އަލިފުއްޓާއި އައްޑޫ ސިޓީ އެވެ.
ސެމީ ފައިނަލްގެ މެޗުތަކަަށް ފަހު، ގޯލްޑް ކަޕްގެ ފައިނަލް މެޗު ކުޅުމަށް ތާވަލްކޮށްފައި ވަނީ އަންގާރަ ދުވަހުގެ ރޭ އެވެ.
