ގޯލްޑް ކަޕްގެ ކުއާޓާ ފައިނަލްގެ މެޗުތައް ބުދަ ދުވަހު ފަށަނީ

މިހާރު ކުރިއަށްދާ ނައިންޓީ ޕްލަސް ގޯލްޑް ކަޕް ފުޓުބޯޅަ މުބާރާތުގެ ކުއާޓާ ފައިނަލްގެ މެޗުތައް ބުދަ ދުވަހުގެ ހަވީރު ފަށާނެ އެވެ.

ވަޅު ޖެހިފައިވާ ދިވެހި ފުޓުބޯޅައިގެ ފޯރި އަލުން ގެނައުމުގެ މަޤުސަދުގައި މުޅިން އަލަށް ތަޢާރަފު ކުރި ގޯލްޑް ކަޕް ފުޓުބޯޅަ މުބާާރާތުގައި 17 ޓީމަކުން ވަނީ ބައިވެރިވެފަ އެވެ. މީގެ ތެރެއިން މިހާރު ވަނީ މުބާރާތުގެ ކުއާޓާ ފައިނަލްގައި ވާދަކުރާނެ އަށް ޓީމެއް ކަށަވަރުވެފަ އެވެ. އެއީ އައްޑޫ ސިޓީ، ފުވައްމުލައް ސިޓީ، މާލޭ ސިޓީ، ކ.މާފުށި، ރ.އަލިފުށި، ކ.ގުރައިދޫ، ޅ.ނައިފަރު އަދި ބ.އޭދަފުށި އެވެ.

މުބާރާތުގެ ކުއާޓާ ފައިނަލްގެ ފުރަތަމަ މެޗުގައި ބުދަ ދުވަހުގެ ހަވީރު ބައްދަލު ކުރާނީ ބ.އޭދަފުށި އަދި ޅ.ނައިފަރު އެވެ. ދެ ވަނަ މެޗުގައި ބުދަ ދުވަހުގެ ރޭ ބައްދަލު ކުރާނީ މާލޭ ސިޓީ އަދި ކ.ގުރައިދޫ އެވެ. ތިން ވަނަ މެޗުގައި ބުރާސްފަތި ދުވަހުގެ ހަވީރު ބައްދަލު ކުރާނީ ރ.އަލިފުށި އަދި ފުވައްމުލައް ސިޓީ އެވެ. ކުއާޓާ ފައިނަލްގެ ފަހު މެޗުގައި ބުރާސްފަތި ދުވަހުގެ ރޭ ބައްދަލު ކުރާނީ އައްޑޫ ސިޓީ އަދި ކ.މާފުށި އެވެ.

ކުއާޓާ ފައިނަލަށް ފަހު މުބާރާތުގެ ސެމީ ފައިނަލް މެޗުތައް ކުޅޭނީ ހޮނިހިރު ދުވަހުގެ ހަވީރު އަދި ރޭގަނޑު އެވެ. އަދި މުބާރާތުގެ ފައިނަލް މެޗު ކުޅުމަށް ތާވަލްކޮށްފައި ވަނީ އަންނަ ހަފުތާގެ އަންގާރަ ދުވަހުގެ ރޭ އެވެ.