މާލެ ބަލިކޮށް، އޭދަފުށި ފައިނަލަށް

މިހާރު ކުރިއަށްދާ ނައިންޓީ ޕްލަސް ގޯލްޑް ކަޕް ފުޓުބޯޅަ މުބާރާަތުގެ ސެމީ ފައިނަލްގެ ފުރަތަމަ މެޗުގައި މާލޭ ސިޓީ ބަލިކޮށް، ބ.އޭދަފުށިން މުބާރާތުގެ ފައިނަލްގެ ޖާގަ ހޯދައިފި އެވެ.

ހޮނިހިރު ދުވަހުގެ ހަވީރު ގަލޮޅު ރަސްމީ ދަނޑުގައި ކުޅުނު މެޗު އޭދަފުށިން ކާމިޔާބު ކުރީ 3-2 އިންނެވެ. މެޗުގެ ފުރަތަމަ ހާފުގައި ވެސް އޭދަފުށިން ވަނީ ތިން ލަނޑު ޖަހައިފަ އެވެ. ނަމަވެސް ދެ ވަނަ ހާފުގައި މާލޭ ސިޓީން ވަނީ ދެ ލަނޑު ޖަހައިފަ އެވެ.

މެޗު ފަށައިގެން ރަނގަޅަށް ކުޅެމުން ގޮސް، 20 ވަނަ މިނެޓުގައި އޭދަފުށިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ ހަމްޒާ މުޙައްމަދު (ހަމްޕު) އެވެ. އޭގެ ހަތަރު މިނެޓު ފަހުން ހަމްޕު ވަނީ ދެ ވަނަ ލަނޑެއް ޖަހައި އޭދަފުއްޓަށް ލީޑު ފުޅާ ކޮށްދީފަ އެވެ. މެޗުގައި އޭދަފުށީގެ ތިން ވަނަ ލަނޑު އިޝާން އިބްރާހީމް (ސައްޓު) އެވެ.

މެޗުގެ ދެ ވަނަ ހާފު ފަށައިގެން ދެ ވަނަ މިނެޓުގައި މާލެ އިން ވަނީ ލަނޑު ޖަހައިފަ އެވެ. އެ ލަނޑު މާލެ އަށް ޖަހައިިދިނީ އަލީ ޝިޔާހު އެވެ. އޭގެ ފަހުން މެޗުގެ 65 ވަނަ މިނެޓުގައި މާލެ އަށް ލިބުނު ޕެނަލްޓީ ކާމިޔާބުކޮށް، ދެ ވަނަ ލަނޑު ޖެހީ ރިޟްވާން ވަހީދު އެވެ. މެޗުގައި ނަތީޖާ ހަމަހަމަ ކުރާނެ ފުރުސަތު ވެސް މާލެ އަށް ލިބުނެވެ.

މުބާރާތުގެ ފައިނަލްގެ ޖާގަ އޭދަފުށިން ހޯދިއިރު، ފުރަތަމަ ބުރުގެ ގުރޫޕް ސްޓޭޖުގައި ވެސް މި ދެ ޓީމު ބައްދަލު ކުރި އެވެ. އެ މެޗު ވެސް ކާމިޔާބު ކުރީ އޭދަފުށިންނެވެ. މުބާރާތުގައި އޭދަފުށި ބަލިވެފައި ވަނީ އެންމެ މެޗަކުންނެވެ. އެއީ ދެ ވަނަ ބުރުގެ ގުރޫޕް ސްޓޭޖުގައި ކ.މާފުއްޓާ ދެކޮޅަށް ކުޅުނު މެޗުންނެވެ.