މާލެ އާއި އަލިފުށި ކުޅޭ މެޗު ހޯމަ ދުވަހުގެ ހަވީރު ކުޅެން ނިންމައިފި

ގޯލްޑް ކަޕް ފުޓުބޯޅަ މުބާރާތުގެ ދެ ވަނަ ބުރުގެ ގުރޫޕު ސްޓޭޖުގައި މާލޭ ސިޓީ އާއި ރ.އަލިފުށި ބައްދަލު ކުރަން އޮތް މެޗު ހޯމަ ދުވަހުގެ ހަވީރު ކުޅެން ނިންމައިފި އެވެ.

ގަލޮޅު ރަސްމީ ދަނޑުގައި އާދީއްތަ ދުވަހުގެ ހަވީރު ކުޅެން އޮތް މެޗު ފަސްކުރަން ނިންމީ، މެޗު ފަށަން ކުޑަ ވަގުތު ކޮޅަކަށް ވެފައި ވަނިކޮށެވެ. އެ މެޗު ފަސް ކުރަން ނިންމާފައި ވަނީ މާލޭ ސިޓީއާ ގުޅޭ ގޮތުން، ޅ.ކުރެންދޫ އިން ހުށަހަޅާފައިވާ ޝަކުވާއަކާ ގުޅިގެންނެވެ. އެގޮތުން ކުރެންދޫ ޓީމުން ހުށަހަޅާފައިވާ މައްސަލަ އަކީ މާލޭ ސިޓީގެ ޓީމުގައި އެހެން ރަށަކަށް ރަޖިސްޓްރީ އޮތް ދެ ކުުޅުންތެރިން ހިމެނިގެން ކުޅެފައިވާ މައްސަލަ އެވެ.

އެގޮތުން ޝަކުވާ ހުށަހަޅާފައިވާ ދެ ކުޅުންތެރިން، މުބާރާތެއްގައި ކުޅުމަށްޓަކައި ރަޖިސްޓްރީ ބަދަލު ކޮށްފައިވާ ކަމަށް މައްސަލައިގައި ވަނީ ފާހަގަ ކޮށްފަ އެވެ. އެ ދެ ކުޅުންތެރިންގެ ރަޖިސްޓްރީ ދ.ހުޅުދެއްޔަށް ބަދަލު ކޮށްފައިވާ ކަމަށް ބުނެ، ކުރެންދޫ އިން ވަނީ އެކަމުގެ ހެކި ވެސް ހުށަހަޅައިފަ އެވެ.

މައްސަލަ ބެލުމަށްފަހު މުބާރާތުގެ ޑިސްޕްލިނަރީ ކޮމެޓީން ނިންމާފައި ވަނީ މާލޭ ސިޓީން ކުޅުންތެރިން ރަޖިސްޓްރީ ކޮށްފައި ވަނީ ޤަވާއިދާ އެއްގޮތަށް ކަމަށެވެ. އެގޮތުން އެ ކުޅުންތެރިންގެ މައްސަލަ ތަހުގީގު ކުރިއިރު، އެ ކުޅުންތެރިންނަކީ މާލޭގެ ކުޅުންތެރިންކަން ޔަގީންވާ ކަމަށް ވެސް ޑިސިޕްލިނަރީ ކޮމެޓީން ވަނީ ނިންމައިފަ އެވެ.

މުބާރާތުގެ ދެ ވަނަ ބުރުގައި މާލޭ ސިޓީ އާއި ކުރެންދޫ ބައްދަލު ކުރި މެޗު 1-0 އިން ކާމިޔާބު ކޮށްފައި ވަނީ މާލޭ ސިޓީންނެވެ. މި ދެ ޓީމު ހިމެނޭ ގުރޫޕު އެޗުގައި ދެ ޓީމު ވަނީ ކުޅުނު ފުރަތަމަ މެޗުން މޮޅުވެފަ އެވެ. ދެ ޓީމަށް ވެސް ތިން ޕޮއިންޓު ލިބޭއިރު، މި ގުރޫޕުގެ އެއް ވަނަ ކަށަވަރު ވާނީ މި ދެ ޓީމު ބައްދަލު ކުރާ މެޗުންނެވެ.