އައްޑޫ ކުއާޓަރ އަށް، ތަފާތު ދެއްކީ އިއްބެ

މިހާރު ކުރިއަށްދާ ގޯލްޑް ކަޕް ފުޓުބޯޅަ މުބާރާތުގެ ދެ ވަނަ ބުރުގެ ގުރޫޕު ސްޓޭޖުގައި ޅ.ނައިފަރާ ދެކޮޅަށް ކުޅުނު މެޗުން މޮޅުވެ، އައްޑޫ ސިޓީން މުބާރާތުގެ ކުއާޓަރ ފައިނަލްގެ ޖާގަ ހޯދައިފި އެވެ.

ގަލޮޅު ރަސްމީ ދަނޑުގައި އާދީއްތަ ދުވަހުގެ ރޭ ކުޅުނު މެޗު އައްޑޫ އިން ކާމިޔާބު ކުރީ 7-2 އިންނެވެ. މެޗުގެ ފުރަތަމަ ހާފު ނިމުނުއިރު ދެ ޓީމު ވެސް އޮތީ ދެ ލަނޑުން އެއްވަރުވެފަ އެވެ. ނަމަވެސް ދެ ވަނަ ހާފުގައި ފަސް ލަނޑު ޖަހައިގެން އައްޑޫ ވަނީ މެޗުން މޮޅުވެފަ އެވެ.

މެޗު ފަށައިގެން 20 ވަނަ މިނެޓުގައި މުޙައްމަދު އިޒާން އަލީ ޖެހި ލަނޑުން ނައިފަރު ވަނީ ކުރި ހޯދައިފަ އެވެ. އޭގެ 10 މިނެޓު ފަހުނ އައްޑޫ އަށް ނަތީޖާ ހަމަހަމަ ކޮށްދިނީ ހާޒިމް ފައުޒީ އެވެ. އޭގެ ފަހުން އިބްރާހީމް ވަޙީދު ޙަސަން (އިއްބެ) ޖެހި ލަނޑުން އައްޑޫ އިން ކުރި ހޯދި އެވެ. ފުރަތަމަ ހާފު ނިމުމުގެ ކުރިން ނައިފަރަށް ނަތީޖާ ހަމަހަަމަ ކޮށްދިނީ ޙުސެއިން ފައިސަމް (ފައިޓޯ) އެވެ.

ދެ ވަނަ ހާފުގައި އައްޑޫގެ ހަތަރު ލަނޑު ޖެހީ އިއްބެ އެވެ. އެއާއެކު މެޗުގައި އިއްބެ ވަނީ ޖުމުލަ ފަސް ލަނޑު ޖަހައިފަ އެވެ. އެ ލަނޑުތައް އިއްބެ ޖެހީ މެޗުގެ 47 ވަނަ މިނެޓު، 52 ވަނަ މިނެޓު، 68 ވަނަ މިނެޓު އަދި 70 ވަނަ މިނެޓުގަ އެވެ. އޭގެ ފަހުން މެޗުގެ 80 ވަނަ މިނެޓުގައި އައްޑޫގެ ފަހު ލަނޑު ޖެހީ އިސްމާއީލް އީސަ (މެސީ) އެވެ.

ބޭރު ކުޅުންތެރިން ޖަހަން ލިބުނު ފުރުސަތުގައި އައްޑޫ އިން އެ ޓީމުގައި އިއްބެ ހިމަަނާފައިވާއިރު، އޭނާ އަންނަނީ މުބާރާތުގައި މޮޅު ކުޅުމެއް ދައްކަމުންނެވެ. މުބާރާތުގެ ކުއާޓާ ފައިނަލް އިން އަށް ޓީމަކަށް ޖާގަ ލިބޭއިރު، މިހާތަނަށް ވަނީ ހަ ޓީމަކަށް ޖާގަ ލިބިފަ އެވެ.