މޯލްޑިވްސް މީޑިއާ ކައުންސިލް ގެ ރައީސް ކަމަށް ސަގީފް
ނައިބު ރައީސް ކަމަށް ހޮވުނީ 9 ވޯޓު ހޯދައިގެން އަމިއްލަ ގޮތުން ކުރިމަތިލި އިބްރާހިމް މުހައްމަދު
ހުސެއިން ސަގީފް
މޯލްޑިވްސް މީޑިއާ ކައުންސިލް (އެމްއެމްސީ) ގެ ރައީސް ކަމަށް ހުސައިން ސަގީފް އިންތިޚާބުކޮށްފިއެވެ.
އެމްއެމްސީ ގެ އައު ދައުރަކަށް ރައީސް އަކު އިންތިޚާބު ކުރީ ހޯމަ ދުވަހުއެވެ.
ދެ އަހަރު ދުވަހުގެ މުއްދަތަކަށް ހޯމަ ދުވަހު ފެށި އައު ދައުރުގެ ރައީސް ކަމަށް ވާދަ ކޮށްފައިވަނީ "ތިލަދުން" ގެ ޗީފް އެޑިޓަރ ހުސެއިން ސަގީފް އާއި "މިހާރު" ނޫހުގެ ފާތިމަތު ޝަނާ މުހައްމަދެވެ. އާދިއްތަ ދުވަހު އޮތް އިންތިޚާބުގައި ވާދަ ކުރި ދެ ކެންޑިޑޭޓުންނަށް ހަމަހަމަ ކޮށް ވޯޓު ލިބުމުގެ ސަބަބުން ވޯޓު ލުން ހޯމަ ދުވަހު އަލުން ވަނީ ބާއްވާފައެވެ.
ދެވަނަ ފަހަރަށް ބޭއްވި އިންތިޚާބު ސަގީފް ކާމިޔާބު ކުރީ އެއް ވޯޓުގެ ތަފާތަކުންނެވެ. ސަގީފަށް 8 ވޯޓު ލިބުނު އިރު ޝަނާ އަށް ލިބުނީ 7 ވޯޓެވެ.
15 މެންބަރުންގެ މައްޗަށް އެކުލެވޭ މީޑިއާ ކައުންސިލުގެ ނައިބު ރައީސް ހޮވުމަށް ބޭއްވި އިންތިޚާބު ކާމިޔާބު ކުރީ 9 ވޯޓު ހޯދައިގެން އަމިއްލަ ގޮތުން ކުރިމަތިލި އިބްރާހިމް މުހައްމަދު އެވެ.
ކައުންސިލު އެކުލެވިގެން ވަނީ މީޑިއާތަކަށް ނިސްބަތްވާ 8 މެމްބަރުންނާއި އަމިއްލަ ގޮތުން ހޮވާ 7 މެންބަރުންނެވެ.
