ހޮސްޕިޓަލާއި އެއަރޕޯޓްގެ މަޝްރޫޢު ފެށުނު ގޮތް، ވިލިފުށީ ކައުންސިލްގެ ރައީސް، ރައީސް މުއިއްޒަށް ކިޔައި ދެއްވައިފި
ކުރީގެ މެންބަރު އަފީފު ބުރަ މަސައްކަތްތައް ފާހަގަނުކުރުމަކީ ވެވޭ އިހުމާލެއް
އަންގާރަ ދުވަހުގެ ރޭ ބޭއްވި ރަސްމިއްޔާތުގައި ވިލުފުށި ކައުންސިލްގެ ރައީސް ހުސެއިން ޖަބީން ވާހަކަ ދައްކަވަނީ
ތ.ވިލުފުއްޓަށް ތަރައްގީގެ ތަސައްވުރު ގެނެސްދެއްވި ކުރީގެ ރައީސް އިބްރާހިމް މުހައްމަދު ސާލިހަށާއި، ރައްޔިތުން މަޖިލީހުގެ ވިލުފުށީ ދާއިރާގެ ކުރީގެ މެންބަރު ހަސަން އަފީފަށް އެރަށުގެ ކައުންސިލުން ޚާއްސަ ޝުކުރެއް ދަންނަވައިފިއެވެ.
އަންގާރަ ދުވަހު ރައީސް ޑރ.މުހައްމަދު މުއިއްޒު ވަނީ ވިލުފުއްޓަށް ވަޑައިގަންނަވާފައެވެ. އަދި އެރަށުގެ ރައްޔިތުންނާ ބައްދަލުކުރައްވައި ބޭއްވެވި ރަސްމިއްޔާތުގައި ގިނަ މަޝްރޫއުތަކެއް ކުރިއަށް ގެންދިއުމަށް އެއްބަސްވުންތަކުގައި ވަނީ ސޮއިކޮށްފައެވެ.
މި ރަސްމިއްޔާތުގައި ވާހަކަދައްކަވަމުން އެރަށުގެ ކައުންސިލްގެ ރައީސް ހުސެއިން ޖަބީން ވިދާޅުވީ، އެރަށަށް ތަރައްގީގެ ތަސައްވުރު ގެނެސްދީފައިވަނީ ކުރީ ސަރުކާރުން ކަމަށެވެ.
ޖަބީން ވިދާޅުވީ އެރަށުގެ އެއަރޕޯޓު ތަރައްގީކުރުމަށް ބިންހިއްކުމާއި، ހޮސްޕިޓަލްގެ އަމަލީ މަސައްކަތް ފެށިގެން ކުރިއަށްދާއިރު، ކުރީގެ ރައީސް އިބްރާހިމް މުހައްމަދު ސާލިހަށް ޚާއްސަ ޝުކުރެއް ދަންނަވާ ކަމަށެވެ. އަދި މަޖިލީހުގެ ކުރީގެ މެންބަރު އަފީފު ބުރަ މަސައްކަތްތައް ފާހަގަކުރާ ކުރާ ކަމަށާއި، އެ މަސައްކަތްތައް ފާހަގަނުކުރުމަކީ ވެވޭ އިހުމާލެއް ކަމަށެވެ.
އެފަރާތްތައް ފާހަގަނުކޮށްފިނަމަ އަޅުގަނޑަކީ އޭރުގައި އެބޭފުޅާ އަދި އެމަސައްކަތްތަކުގައި އެބޭފުޅުންނާ ވަރަށް ކައިރިން މަސައްކަތް ކުރި މީހަކަށްވާތީ އަޅުގަނޑަށް ހަގީގަތް އެނގިހުރި މިކަން ފާހަގަނުކުރުމަކީ އަޅުގަނޑު ދެކޭ ގޮތުގައި އަޅުގަނޑަށް ވެވޭ އިހުމާލެއް. އެހެންކަމުން މިތާގައި މީގެ ކުރިން ފެށިގެން މިދިޔަ ދެ މަޝްރޫއު މިއީ މިރަށުގެ އެއަރޕޯޓާއި ހޮސްޕިޓަލްގެ މަސައްކަތް. މިތަސައްވުރު އަޅުގަނޑުމެންނާ ހިސާބަށް ގެނެސްދެއްވި ކުރީގެ މިދާއިރާގެ އިއްޒަތްތެރި މެންބަރު އޮނަރަބަލް ހަސަން އަފީފަށާއި، ކުރީގެ ރައީސުލްޖުމްހޫރިއްޔާ އޮނަރަބަލް އަލްފާޟިލް އިބްރާހިމް މުހައްމަދު ސާލިހަށް އަޅުގަނޑުމެންގެ ރަށުގެ ރައްޔިތުންގެ ނަމުގައި އަދި އަޅުގަނޑުގެ ނަމުގައި ވަރަށް އިހުލާސްތެރިކަމާއެކު ޝުކުރު ދަންނަވަން.ވިލުފުށީ ކައުންސިލްގެ ރައީސް ހުސެއިން ޖަބީން
މި ރަސްމިއްޔާތުގައި ރައީސް މުއިއްޒު ވިދާޅުވީ، 30 މަސްދުވަސް ތެރޭ ވިލުފުށީ އެއަރޕޯޓުގެ މަސައްކަތް ނިމޭނެ ކަމަށާއި 18 މަސްދުވަސްތެރޭ ހޮސްޕިޓަލުގެ މަސައްކަތް ނިމޭނެ ކަމަށެވެ.
ރައްޔިތުން ބޭނުންވާ ތަނުގައި އެއަރޕޯޓު ތަރައްގީ ކުރުމަށް ބިން ހިއްކުމުގެ މަސައްކަތް ބުދަ ދުވަހު ފަށާފައިވާއިރު، ގިނަވެގެން 30 މަސްދުވަސްތެރޭ، 1800 މީޓަރުގެ ރަންވޭއަކާ އެކު އެއަރޕޯޓު ތަރައްގީކުރުމުގެ މަސައްކަތް ނިންމަވާނޭ ކަމަށް އެމަނިކުފާނު ވިދާޅުވިއެވެ. އަދި ވިލުފުށީ ހޮސްޕިޓަލުގެ މަސައްކަތް ވެސް ގިނަވެގެން އަށާރަ މަސްދުވަސް ތެރޭ، ފުރިހަމަކޮށް، ޒަމާނީ ހޮސްޕިޓަލެއްގެ ގޮތުގައި އެތަން ރަށާ ހަވާލުކުރައްވާނޭކަމަށް އެމަނިކުފާނު ވިދާޅުވިއެވެ.
ގެދޮރުވެރިކަމުގެ މައްސަލައަށް އިޝާރާތްކުރައްވަމުން، ނިމިފައިހުރި ހައުސިންގ ޔުނިޓުތަކަށް ފެނާއި ކަރަންޓާއި ނަރުދަމާގެ އިންތިޒާމު ހަމަޖައްސަވައި، ހައްގުވެރީން ކަނޑައެޅުމުގެ މަސައްކަތް މި އަހަރުގެ ނިޔަލަށް ނިންމަވާނޭކަމަށް އެމަނިކުފާނު ވިދާޅުވިއެވެ. އަދި އަންނަ އަހަރު، ގޯތީގައި ގެ އެޅުމަށް ބޭނުންވާ ފަރާތްތަކަށް އެ އިޚުތިޔާރު ލިބޭގޮތަށް، 100 ހައުސިންގ ޔުނިޓު އެޅުމުގެ މަޝްރޫއެއް ކުރިއަށްގެންދެވުމަށް ނިންމަވާފައިވާކަންވެސް އެމަނިކުފާނު އިއުލާން ކުރެއްވިއެވެ.
ސުނާމީ ކާރިސާއަށް ފަހު ހައްލު ނުވެ ދިގުލައިގެންގޮސްފައިވާ، ގެ އާއި ކޮޓަރި ލިބެންޖެހޭ މައްސަލަ، ފައިސާގެ ބަދަލު ދެއްވައިގެން ނަމަވެސް ހައްލުކުރެއްވުމަށް ސަރުކާރުން ތައްޔާރުކަމަށް ވިދާޅުވެ، ރައްޔިތުން އެދޭގޮތަކަށް އެކަން ތަންފީޒުކޮށްދެއްވާނޭކަމަށް އެމަނިކުފާނު ވިދާޅުވިއެވެ.
މީގެ އިތުރުން، އަންނަ އަހަރުގެ ބަޖެޓުގެ ތެރެއިން، ދިވެހިރާއްޖޭގެ ގައުމީ ޔުނިވަރސިޓީގެ ކެމްޕަސްއެއް އެ ރަށުގައި ގާއިމުކުރެއްވުމުގެ މަސައްކަތާއި، ރަށުގެ ބަނދަރު ފުންކޮށް، ފުޅާކުރުމުގެ މަސައްކަތް ކުރިއަށްގެންދަވާނޭކަމަށް އެމަނިކުފާނު ވިދާޅުވިއެވެ. އަދި ކުރިއަށް އޮތްތަނުގައި ރަށުގެ މިސްކިތް އިސްލާމީ މަރުކަޒަކަށް ބަދަލުކުރައްވާނޭކަމަށްވެސް ރައީސް މުއިއްޒު ވިދާޅުވިއެވެ.
އަންގާރަ ދުވަހުގެ ރޭ ސޮއިކުރެއްވި މަގުހެދުމުގެ މަޝްރޫއު ކުރިއަށްގެންދަވާނީ، ރިންގް ރޯޑުވެސް ހިމެނޭ ގޮތަށް ކަމަށާއި، ފުޓުބޯޅަ ދަނޑު ތަރައްގީކުރުމުގެ މަޝްރޫއުގެ އިތުރުން، ފުޓްސަލް އަދި ހޭންޑްބޯލް ކުޅެވޭ ކޯޓެއްގެ މަސައްކަތް މި އަހަރު ފައްޓަވާނޭކަމަށް އެމަނިކުފާނު ވިދާޅުވިއެވެ. އަދި ކުރިއަށް އޮތް ތިން މަސް ދުވަހުގެ ތެރޭގައި ސްޕޯޓްސް ފިޝިންއަށް ބޭނުންވާ ކަނދުފައްޗެއް އަޅުއްވައިދެއްވާނޭކަމަށް އެމަނިކުފާނު ވިދާޅުވިއެވެ.
އުމްރާނީ ގިނަ މަޝްރޫއުތަކެއް ރޭވިފައިވާ މި ރަށުގައި ޕަބްލިކް ވަރކްސް ޔުނިޓެއްވެސް ގާއިމުކުރައްވާނޭކަމަށް އެމަނިކުފާނު ވިދާޅުވިއެވެ.
މި ރަސްމިއްޔާތުގައި ވަނީ ވިލުފުށީގައި ޕާސްޕޯޓު ދޫކުރުމުގެ ޚިދުމަތްވެސް ރަސްމީގޮތުން ފައްޓަވައިދެއްވާފައެވެ.
