ރައީސް އޮފީހުން މީޑިއާ ތަކާ ބެހޭ ޝަކުވާ ފުންޏެއް އޮއްސާލައިފި
އެމްއެމްސީ އަށް ހުށަހެޅި 79 ޝަކުވާގެ ތެރެއިން 74 ޝަކުވާ ހުށަހެޅީ ރައީސް އޮފީހުން
ރައީސް މުޢިއްޒު އަދި ރައީސް އޮފީހުގެ ކޮމިއުނިކޭޝަން މިނިސްޓަރު ޚަލީލް
ރާއްޖޭގެ މީޑިއާ ތަކާ ބެހޭ ޝަކުވާ ފުންޏެއް މޯލްޑިވްސް މީޑީއާ ކައުންސިލް (އެމްއެމްސީ) އަށް ރައީސް އޮފީހުން އޮއްސާލައިފިކަން ހާމަ ވެއްޖެއެވެ.
މީޑިއާ ކައުންސިލް އިން ބުދަ ދުވަހު އާންމު ކުރި ތަފާސް ހިސާބުން ދައްކާ ގޮތުގައި މި އަހަރުގެ މިހާތަނަށް މީޑިއާ ތަކާ ބެހޭ އެންމެ ގިނަ ޝަކުވާ ހުށަހެޅީވެސް ރައީސް އޮފީހުންނެވެ.
އެމްއެމްސީން ހާމަކުރި ތަފާސް ހިސާބަށް ބަލާއިރު ރާއްޖޭގެ މީޑިއާ ތަކާ ގުޅޭ 74 ޝަކުވާ ރައީސް އޮފީހުން ވަނީ ހުށަހަޅާފައެވެ.
އެމްއެމްސީން ބުނެފައިވާނީ މިހާތަނަށް މިއަހަރު އެ ކައުންސިލަށް ހުށަހެޅުނު ޖުމްލަ ޝަކުވާގެ އަދަދަކީ 79 އެއް ކަމަށެވެ.
ރައީސް އޮފީހުގައި މީޑިއާ ތައް މޮނިޓަރކޮށް ބެލެހެއްޓުމަށް ޚާއްސަ ޑިޕާޓްމަންޓެއް އުފައްދާ ގިނަ އަދަދެއްގެ މީހުންނަށް އެ ޑިޕާޓްމަންޓުން ވަނީ ވަޒީފާ ހަމަ ޖައްސާފައެވެ. އެ ޑިޕާޓްމަންޓްގެ އެންމެ މުހިންމު އެއް މަސައްކަތަކީ މީޑިއާ ތަކަށް ފާރަވެރިވުން ކަމަށް މައުލޫމާތު ލިބިފައިވެއެވެ.
ސަރުކާރުން ސްޕޮންސަރ ދޭ މީޑިއާ ތަކުން ސަރުކާރު ޕްރޮމޯޓް ކުރާ މިންވަރު ބެލުމަށް ރައީސުލް ޖުމްހޫރިއްޔާ ޑރ. މުހައްމަދު މުއިއްޒު ސަރުކާރުގެ އޮފީސްތަކަށާއި ކުންފުނި ތަކަށް އަންގަވާފައިވާ ކަމަށް ވެސް މައުލޫމާތު ލިބިފައިވެއެވެ.
މި ގޮތުން 24 ޖޫން ގެ ތާރީޚް ގައި ރައީސުލް ޖުމްހޫރިއްޔާގެ އޮފީހުގެ މިނިސްޓަރ އެޓް ދަ ޕްރެސިޑެންޓްސް އޮފީސް ފޯ ސްޓްރެޓީޖިކް ކޮމިއުނިކޭޝަން އިބްރާހިމް ޚަލީލް ސޮއި ކުރައްވާ ސަރުކާރުގެ މިނިސްޓްރީ ތަކަށާއި ކުންފުނި ތަކަށް ފޮނުއްވާފައިވާ ސިޓީ އެއް ގައި ވަނީ ސަރުކާރުގެ ވުޒާރާ ތަކާއި ކުންފުނި ތަކުން ސްޕޮންސަރ ދޭ ރާއްޖޭގެ އެކި މީޑިއާ ތަކުން ސަރުކާރުގެ މައުލޫމާތު ފަތުރަމުންދާ މިންވަރު ރައީސުލް ޖުމްހޫރިއްޔާ ވިދާޅުވެގެން ވަޒަން ކުރަމުން ގެންދާ ކަމަށެވެ.
އެމްއެމްސީގެ ހިސާބުތަކުން ފެންނަ ގޮތުން އެންމެ ގިނަ ޝަކުވާ ހުށައަޅާފައިވާ ދިޔަވަރު އޮންލައިނާ ގުޅޭ ގޮތުން 59 ޝަކުވާ ވަނީ ހުށަހަޅާފައެވެ. އޭގެ ތެރެއިން 30 ޝަކުވާ އެއް ބަލާ ނިމިފައިވާ ކަމަށާއި އޭގެ ތެރެއިން 20 މައްސަލަ ނޫހާ ދެކޮޅަށް ނިންމާފައިވާ ކަމަށްވެސް އެމްއެމްސީން ހާމަ ކޮށްފައިވެއެވެ.
މީގެ އިތުރުން ދޮންއަމާ، ދުންމާރި، ތޭރައޮންލައިން އަދި ކުރުސީ ޑޮޓް ކޮމް އާ ދެކޮޅަށް ޝަކުވާތައް ވަނީ ހުށަހަޅާފައެވެ.
ސަރުކާރުން އަމިއްލަ މީޑިއާ ތަކާ ދެކޮޅަށް ޝަކުވާތައް ހުށަހަޅަމުން ގެންދާ އިރު ސަރުކާރުގެ މިނިސްޓްރީ ތަކާއި ކުންފުނިތަކުން ސްޕޮންސަރ ދެނީވެސް ރައީސް އޮފީހުން އަންގާ މީޑިއާތަކަށް އެކަނި ކަމަށް ވެއެވެ.
މީގެ އިތުރަށް ބައެއް މީޑިއާ ތައް ރައީސުލް ޖުމްހޫރިއްޔާގެ އޮފީހަށް ގެންގޮސް ބައެއް ޚާއްސަ ކަންކަމުގައި ޚަބަރުތައް ހަދަންވީ ގޮތުގެ އިރުޝާދު ދެމުންދާ ކަމަށްވެސް މައުލޫމާތު ލިބިފައިވެއެވެ.
