ހިއުމަން ރައިޓްސް މެޝަރމަންޓް އިނީޝިއޭޓިވްއިން މީޑިއާ އަދި ބްރޯޑްކާސްޓިންގ އިން ވަނީ ބިލާމެދު ކަންބޮޑުވުން ފާޅުކޮށްފަ
މިނިވަން މީޑިއާގައި ތަޅުއަޅުވާ ބިލާ ދެކޮޅަށް ނޫސްވެރިން މުޒާހަރާ ކުރަނީ
ދިވެހިރާއްޖޭގެ މީޑިއާ އަދި ބްރޯޑްކާސްޓިންގ ރެގިއުލޭޝަން ބިލު ރައީސް ޑރ މުހައްމަދު މުއިއްޒު ތަސްދީގު ކުރެއްވުމާއި ގުޅިގެން ހިއުމަން ރައިޓްސް މެޝަރމަންޓް އިނީޝިއޭޓިވް (އެޗްއާރްއެމްއައި) އިން ކަންބޮޑުވުން ފާޅުކޮށްފި އެވެ.
އެ ޖަމްއިއްޔާއިން ނެރުނު ބަޔާނުގައި ބުނެފައިވަނީ، ނޫސްވެރިންނާއި މީޑިއާ ޖަމްއިއްޔާތަކާއި މަދަނީ ޖަމްއިއްޔާތަކުން ފާޅުކުރި ކަންބޮޑުވުންތަކަށް ރިއާޔަތް ނުކޮށް މި ބިލު ފާސްކޮށްފައިވާތީ، އެކަމާމެދު ކަންބޮޑުވާ ކަމަށެވެ.
އަދި މި ކަމުގައި ދިވެހި ނޫސްވެރިނާއި ، ނޫސްވެރިންގެ ޖަމްޢިއްޔާ މޯލްޑިވްސް ޖާނަލިސްޓް އެސޯސިއޭޝަން (އެމްޖޭއޭ) އާއި މޯލްޑިވްސް މީޑިއާ ކައުންސިލާއެކު އެއްބައިވަންތަކަމާއެކު ސާބިތުވެ ތިބޭނެކަމަށް ވެސް އެޗްއާރްއެމްއައި ގެ ބަޔާނުގައި ބުނެފައި ވެއެވެ.
އެޗްއާރްއެމްގެ ބަޔާނުގައި ބުނީ ޚިޔާލުފާޅުކުރުމުގެ މިނިވަންކަމަކީ އަސާސީ ޙައްޤެއް ކަމަށާއި އަދި ޚިޔާލުފާޅުކުރުމުގެ މިނިވަން ކަމަކީ ޑިމޮކްރެޓިކް މުޖުތަމައުއެއްގެ އެންމެ މުހިންމު ތަނބު ކަމަށެވެ. އަދި ވޭތުވެދިޔަ ހަތަރު އަހަރު ދުވަހުގެ ތެރޭގައި ދިވެހިރާއްޖޭގައި ޚިޔާލުފާޅުކުރުމުގެ މިނިވަންކަން ދަށަށް ގޮސްފައިވާކަން އެ ޖަމްއިއްޔާގެ ތަފާސްހިސާބުތަކުން ދައްކާކަމަށް ވެސް ބަޔާނުގައި ވަނީ ފާހަގަކޮށްފަ އެވެ.
ޚިޔާލުފާޅުކުރުމުގެ މިނިވަންކަމަކީ އަސާސީ އިންސާނީ ޙައްޤެއް، އަދި ޑިމޮކްރެޓިކް މުޖުތަމައުއެއްގެ މުހިންމު ތަނބެއް. އަދި ވޭތުވެދިޔަ ހަތަރު އަހަރު ދުވަހުގެ ތެރޭގައި ދިވެހިރާއްޖޭގައި ޚިޔާލުފާޅުކުރުމުގެ މިނިވަންކަން ދަށަށް ގޮސްފައިވާކަން ތަފާސްހިސާބުތަކުން ދައްކާކަމުގައެވެ.ހިއުމަން ރައިޓްސް މެޝަރމަންޓް އިނީޝިއޭޓިވް (އެޗްއާރްއެމްއައި)
މީގެ އިތުރުން އެޗްއާރްއެމްއައި އިން ވަނީ މީޑިއާ ކޮންޓްރޯލް ކުރާ ބިލު އަނބުރާ ގެންގޮސް، ނޫސްވެރިން ފާޅުކުރާ ކަންބޮޑުވުންތަކަށް ރިއާޔަތްކޮށް، ބައިނަލްއަޤްވާމީ އިންސާނީ ޙައްޤުތަކުގެ ޤާނޫނުގެ ދަށުން އަދާކުރަންޖެހޭ ޒިންމާތައް އަދާކުރުމަށް ފުރުސަތު ދިނުމަށް ދިވެހި ސަރުކާރަށް ގޮވާލާފަ އެވެ.
އަދި އެއްވެސް ހުރަހެއް، ސެންސަރޝިޕަކާ ނުލައި ނޫސްވެރިންނަށާއި އާންމު ފަރާތްތަކަށް މިނިވަން ކަމާއި އެކު ޚިޔާލުފާޅުކުރެވޭނެ މާހައުލެއް ޤާއިމްކޮށްދިނުމަށް ވެސް އެޗްއާރްއެމްއައި އިން ވަނީ ދިވެހި ސަރުކާރަށް ގޮވާލާފަ އެވެ.
އެޗްއާރްއެމްއައި ގެ އިތުރުން އިންޓަނޭޝަނަލް ފެޑެރޭޝަން އޮފް ޖާނަލިސްޓްސް (އައިއެފްޖޭ) އާއި ކޮމިޓީ ޓު ޕްރޮޓެކްޓް ޖާނަލިސްޓްސް (ސީޕީޖޭ) އިން ވެސް ވަނީ މީޑިއާ ކޮންޓްރޯލް ބިލު ތަސްދީގު ކުރުމުން އެކަމުގެ ކަންބޮޑުވުން ފާޅުކޮށްފަ އެވެ.
މިނިވަން ނޫސްވެރިކަމާއި ހިޔާލުގައި ތަޅު އެޅުވޭ ގޮތަށް އޮތް މީޑިއާ ބިލު ރައީސް މުހައްމަދު މުއިއްޒު ތަސްދީގު ކުރެއްވީ ބުރާސްފަތި ދުވަހު އެވެ. ރައީސް މުއިއްޒު މި ބިލު ތަސްދީގު ކުރެއްވީ ބައިނަލްއަގުވާމީ ޖަމްއިއްޔާ ޖަމާއަތްތަކުން ބިލު ތަސްގީދު ނުކުރުމަށް ތަކުރާރުކޮށް ގޮވާލަމުން ދަނިކޮށެވެ.
ރައީސް މުއިއްޒު މީޑިއާ ބިލް ތަސްދީގު ކުރެއްވި ނަމަވެސް އެ ގާނޫނަކީ ޣައިރު ދުސްތޫރީ ގާނޫނެއް ކަމަށާއި އެ ގާނުނަށް ތަބާނުވާނެ ކަމަށް މޯލްޑިވްސް ޖާނަލިސްޓްސް އެސޯސިއޭޝަނުން ވަނީ ބުނެފަ އެވެ.
