ރައީސް މުއިއްޒުގެ ދޮން މަންމަ އަށް ނިސްބަތްވާ ޑޮކިއުމެންޓަރީ "ސްކީލާން" ގެ ވީޑިއޯކޮޅެއް ޕީއެސްއެމް އިން ދައްކައިގެން މުސްތަފާ ވަޒީފާ އިން ކަނޑާލައިފި
30 އަހަރަށް ވުރެ ދިގު މުއްދަތެއްގައި ޕީއެސްއެމް އަށް މުސްތޮފާ ޚިދުމަތް ކުރައްވާފައިވޭ
މީޑިއާ ކައުންސިލުގެ ރައީސް އަހްމަދު މުސްތަފާ
މޯލްޑިވްސް މީޑިއާ ކައުންސިލް (އެމްއެމްސީ) ގެ ރައީސްކަން ކުރައްވަމުން ގެންދަވާ އަހްމަދު މުސްތަފާ ޕަބްލިކް ސާވިސް މީޑިއާ (ޕީއެސްއެމް) ގައި އޭނާ އަދާކުރައްވަމުން ގެންދަވާ ވަޒީފާއިން ޕީއެސްއެމްގެ ބޯޑުން ނިންމައިގެން ބުރާސްފަތި ދުވަހު ވަކިކޮށްފިއެވެ.
ޕީއެސްއެމްގެ ޓެކްނިކަލް އޮޕަރޭޝަންސް މެނޭޖަރުގެ މަގާމުގައި ހުންނެވި އަދި 30 އަހަރަށް ވުރެ ދިގު މުއްދަތެއްގައި ޕީއެސްއެމް އަށް ޚިދުމަތް ކުރައްވާފައިވާ މުސްތަފާ މަގާމުން ވަކި ކުރީ، ބުރާސްފަތި ވިލޭރޭ މޯލްޑިވްސް މީޑިއާ ކައުންސިލުން ބޭއްވި 11 ވަނަ ނޫސްވެރިކަމުގެ އިނާމު ދިނުމުގެ ހަފްލާ ގައި އެކި ދާއިރާތަކުން އެވޯޑްތަކަށް ނޮމިނޭޓްވި ކޮންޓެންޓު ދެއްކުމުގެ ތެރޭގައި، ތަހުގީގީ ދާއިރާއިން ނޫސްވެރިކަމުގެ އިނާމު ލިބުނު "އަދަދު" ނޫހުން ތައްޔާރު ކުރި "ސްކީލާން" ޑޮކިއުމެންޓަރީގެ ވީޑިއޯ ކޮޅެއް ޕީއެސްއެމްގެ ވަގުތުން ދެއްކި އެ އިވެންޓުގައި އޮން އެއަރ ވުމާ ގުޅިގެންކަން މި ނޫހަށް ވަނީ ކަށަވަރުވެފައެވެ.
ގިނަ ބައެއްގެ ސަމާލުކަން ހޯދި އެ ޑޮކިއުމެންޓަރީ އަކީ ރައީސް ޑރ. މުހައްމަދު މުއިއްޒުގެ ދޮން މަންމަ، ސްރީލަންކާގެ ރައްޔިތެއް ކަމުގައިވާ ޖީ ސްކީލާން، ރާއްޖޭން ބްލެކްލިސްޓުކޮށް ޑީޕޯޓުކުރި ގޮތާއި އޭނާ ރައީސް މުއިއްޒުގެ މައްޗަށް ކުރާ ތުހުމަތުތަކުގެ މައްޗަށް ތައްޔާރު ކުރި ޑޮކިއުމެންޓަރީއެކެވެ.
މީޑިއާ ކައުންސިލުން ބުރާސްފަތި ވިލޭރޭ ބޭއްވި ހަފްލާގައި ޕީއެސްއެމް އިން އޮން އެއަރވެފައިވަނީ "ސްކީލާން" ޑޮކިއުމެންޓަރީގެ މަދު ސިކުންތު ކޮޅެއްގެ ވީޑިއޯ ފުޓޭޖްކަން ފާހަގަ ކުރެވެއެވެ.
މުސްތަފާ ޕީއެސްއެމްގެ ވަޒީފާއިން ކުއްލި ގޮތަކަށް ވަކި ކުރި އިރު އޭނާ އަކީ މީޑީއާގެ ދާއިރާ އިން މީހުން ބިނާ ކުރުމަށްވެސް ގިނަ މަސައްކަތްތަކެއް ކުރައްވާފައިވާ ފަރާތެކެވެ.
މީޑިއާ ކައުންސިލުން ދޭ އެވޯޑްތަކަށް ފަރާތްތައް ހޮވަނީ އެކަމަށް ކަނޑައަޅާ ޚާއްސަ ޕެނަލަކުން ކަމަށާއި، އެއްވެސް ކޮންޓެންޓަކީ އާންމު އިޖްތިމާއީ މިންގަނޑަށް ނުފެތޭ ކޮންޓެންޓެއް ކަމަށް ކަނޑައަޅާފައިވާނަމަ އެފަދަ ކޮންޓެންޓެއް ނޮމިނޭޓް ނުކުރެވޭނެ ކަމަށްވެސް އެމްއެމްސީން މިކަމުގައި ގެންގުޅޭ މިންގަނޑުގައި އޮންނަނީ ކަނޑައަޅާފައެވެ.
ތަހުގީގީ ދާއިރާއިން އެމްއެމްސީން އެވޯޑް ދިން "ސްކީލާން" އަކީ ރާއްޖޭގައި ދެއްކުން މަނާކޮށްފައިވާ ކޮންޓެންޓެއްގެ ގޮތުގައި އެއްވެސް ފަރާތަކުން ކަނޑައަޅާފައިވާ ޑޮކިއުމެންޓަރީ އެއް ނޫންކަންވެސް ފާހަގަ ކުރެވެއެވެ.
އިތުބާރުހުރި ގޮތަކަށް މި ނޫހަށް މައުލޫމާތު ލިބިފައިވާ ގޮތުގައި މުސްތަފާ މަގާމުން ވަކި ކުރިކަން ޕީއެސްއެމް ބޯޑުން ފާސްކުރި އިރު މުސްތަފާގެ ބަހެއްވެސް އެކަމުގައި ހޯދާފައެއް ނުވެއެވެ.
މީޑިއާ ކައުންސިލަށް މުސްތަފާ އިންތިޚާބުކުރީ ޕީއެސްއެމް އިން ހިންގާ ޓީވީއެމް ތަމްސީލްކުރާ މެންބަރެއްގެ ގޮތުގައެވެ. ކައުންސިލްގެ ރައީސްކަމަށް އޭނާ އިންތިޚާބު ކުރީ މީގެ ދެ އަހަރު ކުރިންނެވެ.
ތަހުގީގީ ދާއިރާއިން 2023 ވަނަ އަހަރުގެ ނޫސްވެރިކަމުގެ އިނާމު "އަދަދު" ނޫހުން އުފެއްދި "ސްކީލާން" އަށް ދިން ޚާއްސަ ހަފްލާގައި ނައިބު ރައީސް ހުސައިން މުހައްމަދު ލަތީފު އާއި ގައުމިއްޔަތާ ބެހޭ މިނިސްޓަރ އާދަމް ނަސީރު އާއި ރައީސް އޮފީހުގެ ކޮމިއުނިކޭޝަން މިނިސްޓަރު އިބްރާހިމް ހަލީލު އާއި ރައީސް އޮފީހުގެ ތަރުޖަމާނު ހީނާ ވަލީދު އާއި އެސްޓީއޯގެ ޗެއާމަން އާމިރު މަންސޫރު ބައިވެރިވެ ވަޑައިގަތެވެ.
ބުރާސްފަތި ދުވަހު މުސްތަފާ ވަޒީފާއިން ވަކި ކުރި އިރު، ބުރާސްފަތި ވިލޭރޭ އޮތް ނޫސްވެރިކަމުގެ އެވޯޑް ދިނުމުގެ ހަފްލާގައި ވާހަކަފުޅު ދައްކަވަމުން މި ސަރުކާރުން ނޫސްވެރިންނަށް ދުލާއި ގަލަމުގެ މިނިވަންކަން ފުރިހަމައަށް ދޭނެ ކަމަށް ނައިބު ރައީސް ހުސެއިން މުހައްމަދު ލަތީފު ވަނީ ވިދާޅުވެފައެވެ.
