ބިލުގައި ހައްގުތައް އޮތީ ހަނިކޮށްފައި، އިސްލާހެއް ނުގެނެސް ބިލު ބޭރުކުރަން ޖެހޭ - ސަގީފް
މީޑިއާތަކާއި ނޫސްވެރިންނާއި މީޑިއާ ކައުންސިލްގެ އިތުރުން އެއްވެސް ދިރާސާއެއް ނެތި ބިލު ހުށަހަޅާފައިވޭ
މޯލްޑިވްސް މީޑިއާ ކައުންސިލްގެ ރައީސް ހުސައިން ސަގީފު މަޖިލީހުގެ ކޮމިޓީގައި
ނޫސްތައް ތަޅުއަޅުވާ ބިލުގައި ނޫސްވެރިންގެ ހައްގުތައް އޮތީ ހަނިކޮށްފައި ކަމަށާއި، ބިލަށް ސަރުކާރުން ތާއިދުކުރާއިރު، ސަރުކާރުގެ ލެޖިސްލޭޓިވް އެޖެންޑާގައި އޮތީ މީޑިއާ ކައުންސިލާއި ބްރޯޑްކޮމް އަށް ދެ ގާނޫނެއް ހަދާ ވާހަކަ ކަމަށާއި، ބިލަށް ތާއިދު ނުކުރާ ކަމަށް މޯލްޑިވްސް މީޑިއާ ކައުންސިލްގެ ރައީސް ހުސައިން ސަގީފް ވިދާޅުވެއްޖެއެވެ.
ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީގައި ވާހަކަ ދައްކަވަމުން މީޑިއާ ކައުންސިލްގެ ރައީސް ހުސައިން ސަގީފް ވިދާޅުވީ ތުޅާދޫ ދާއިރާގެ މެންބަރު ހަންނާން ހުށަހެޅުއްވި ބިލަކީ މީޑިއާތަކާއި، ނޫސްވެރިންނާއި، މޯލްޑިވްސް މީޑިއާ ކަައުންސިލްއަށް އެއްވެސް ވަރަކަށް ދިރާސާއެއް ކުރުމުގެ ފުރުސަތެއް ނުދީ އަދި މަޝްވަރާކުރުމެއް ނެތި ހުށަހަޅާފައިވާ ބިލެއް ކަމަށެވެ. އަދި މިހާރު ބިލު އޮތްގޮތުން ގާނޫނުއަސާސީ އިން ލިބިދީފައިވާ ހައްގާއި އެހެނިހެން ހައްގުތަކަށް ހަނިވާ ކަމަށެވެ. އަދި ނޫސްވެރިކަމުގެ މިނިވަންކަން ގެއްލި ނޫސްވެރިކަމުގެ އަސާސްތައް ގެއްލިގެން ދާނެ ކަމަށް ސަގީފް ވިދާޅުވިއެވެ.
އަދި ހިޔާލު ފާޅުކުރުމުގެ މިނިވަންކަމަށް ހުރަސް އެޅޭ ގިނަ މާއްދާތަކެއް ބިލުގައި ހިމެނޭ ކަމަށާއި، ގާނޫނުން އެލުލަވާލާ މީޑިއާ ކޮމިޝަނެއް އޮންނަ އިރު، ބިލުގައި ބްރޯޑްކާސްޓަރުންނާއި ރި-ބްރޯޑްކާސްޓަރުންގެ ހައްގުތަކާއި ނޫސްވެރިންނާއި ގުޅުންހުރި ހައްގުތައް މަސްހުނިވެފައިވާ ކަމަށް ސަގީފު ވިދާޅުވިއެވެ. އަދި ޕްރިންޓް، އޮންލައިން މީޑިއާގެ ނޫސްވެރިކަމުގެ ހައްގުތަކަށް ހިޔަނިއެޅިފައިވާ ކަމަށެވެ.
ނޫސްވެރިކަމަށް އިނތިހާއަށް ބޮޑު ބަދަލެއް އަންނާނެކަން އެއީ އަޅުގަނޑުމެން އެންމެންވެސް އިއްތިފާގުވާ ކަމެއް. ދެން ބިލު އެކުލަވާލުމުގައި ބިލުގައި ނޫސްވެރިންނާއި މި ދާއިރާގެ އެހެން ސްޓޭކް ހޯލްޑަރުންގެ ބަހެއް ނެތް. ކުރިން މީގެ ބިލެއް ހުށަހެޅުނު އިރު މީޑިއާ ކައުންސިލާއި ބަންޑާރަ ނައިބާއި މަޝްވަރާ ކުރެވުނު އިރު މީޑިއާ ކައުންސިލާއި ބްރޯޑްކާސްޓިންގ ކޮމިޝަން އެއްކޮށްލާނީ މީޑިއާތަކުން އެގޮތަށް އެދޭނަމަ ކަމަށް ވިދާޅުވި.މީޑިއާ ކައުންސިލްގެ ރައީސް ހުސައިން ސަގީފް
ސަގީފު ވިދާޅުވީ ޕީޖީ އޮފީހުގެ ވެބްސައިޓުގައި ހިމަނާފައި އޮތް ލެޖިސްލޭޓިވް އެޖެންޑާގައޮ އޮތީ މޯލްޑިވްސް ބްރޯޑްކާސްޓިންގ ކޮމިޝަނާއި، މޯލްޑިވްސް މީޑިއާ ކައުންސިލްގެ ބިލު ބަކިން ހުށަހަޅާ ގޮތަށް ކަމަށެވެ.
މީޑިއާ ކައުންސިލްގެ ނައިބު ރައީސް އިބްރާހިމް މުހައްމަދު ވިދާޅުވީ މިހާރު ހުށަހެޅިފައި އޮތް ބިލަށް އިތުރު ޝަކުވާއެއް ހުށަނާޅާ ބިލު ކޮށްލުމަކީ ކައުންސިލްގެ ސްޓޭންޑް ކަމަށެވެ. އަދި ގާނޫނެއް މުހިންމު ނަމަވެސް އެ މަސައްކަތް ގެންދަން ބޭނުންވަނީ ސްޓޭކް ހޯލްޑަރުންގެ ޝާމިލުވުމާއެކުގައި ކަމަށެވެ.
މިފަދަ މަސައްކަތްތައް ޑިމޮކްރަޓިކް ހަމަތަކުން ކުރިއަށް ގެންދާކަމުގައިވާނަމަ ހޯލް އޮފް ގަވަމަންޓް ހޯލް އޮފް ސޮސައިޓީ އެޕްރޯޗަކަށް ދިއުމަކީ މީޑިއާ ކައުންސިލްގެ ވަރަށް ބޮޑު އެދުމެއް. އެހެން ނޫންކަމުގައިވާނަމަ މި ބިލުގެ ސަބަބުން އިތުރު މައްސަލަތަކެއް ނުކުތުމަތީ މައްސަލަ ނުކުމެދާނެ ކަމެއް. މި ބިލަކީ ނޫސްވެރިންގެ އިތުރުން ރައްޔިތުންގެ މަސްލަހަތާއި ގުޅިފައިވާ ކަމެއް.މީޑިއާ ކައުންސިލްގެ ނައިބު ރައީސް އިބްރާހިމް މުހައްމަދު
މިނިވަން މުއައްސަސާތަކުގެ ކޮމިޓީގައި ބައިވެރިވި މީޑިއާ ކައުންސިލްގެ އެހެން މެންބަރުންވެސް ވަނީ ބިލުގައި ހުރި ކަންބޮޑުވުންތަކުގެ ވާހަކަތައް ހިއްސާކޮށްފައެވެ. އެގޮތުން ނޫސްތަކާއި ޓީވީތަކަށް ދިމާވާނެ ގޮންޖެހުންތަކާއި، ބިލު އޮތް ގޮތުން ސަރުކާރުން ކުރާ ކަންކަން ރައްޔިތުންނާއި ހަމައަށް ނުގެނެވުމުގެ ކަންބޮޑުވުން ވަނީ ހިއްސާކޮށްފައެވެ. އަދި ބިލު އަވަސް އަރުވާލައިގެން ކޮމިޓީގެ މަސައްކަތް ދައުރުން ބޭރުން ކުރާތީ އެކަމުގެ ކަންބޮޑުވުންވެސް ކައުންސިލުން ވަނީ ފާހަގަކޮށްފައެވެ.
މޯލްޑިވްސް މީޑިއާ ކައުންސިލްގެ އިތުރުން މޯލްޑިވްސް ބްރޯޑްކާސްޓިންގ ކޮމިޝަނާއި ވެސް މިނިވަން މުއައްސަސާތަކުގެ ކޮމިޓީއިން ވަނީ ބައްދަލުކުރައްވާފައެވެ. އަދި " މޯލްޑިވްސް މީޑިއާ އެންޑް ބްރޯޑްކާސްޓިން ރެގިއުލޭޝަން ބިލް" އާއި ގުޅޭ ގޮތުން ދިވެހިރާއްޖޭގައި ރަޖިސްޓަރކޮށްފައިވާ މީޑިއާތަކާއި އެކު މަޝްވަރާ ކުރުމަށް ހޯމަ ދުވަހު މަޖިލީހުގެ އިދާރާގައި ބައްދަލުވުމެއް ބޭއްވުމަށް ވެސް ވަނީ ހަމަޖެހިފައެވެ.
