އަލިފާނުގެ ހާދިސާގައި ހައުސިންގ އާ ގުޅުންހުރި އެއްވެސް މައުލޫމާތެއް ނުގެއްލޭ - މުއްތަލިބް

އަލިފާނުގެ ހާދިސާގައި ހައުސިންގ އާ ގުޅުންހުރި އެއްވެސް މައުލޫމާތެއް ނުގެއްލޭކަމަށް ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބް ވިދާޅުވެއްޖެ އެވެ.

ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމެއްގައި މިނިސްޓަރ އެފަދައިން ވިދާޅުވެފައި މި ވަނީ ހައުސިންގ މިނިސްޓްރީގެ ހުރިހާ މަޝްރޫއުތަކެއްގެ މައުލޫމާތު ހުރި ސަރވަރ އަށް އަސަރުކޮށްފައިވާ ކަމަށާއި ލިޔެކިޔުންތައް ގެއްލިއްޖެ ނަމަ ހޯދޭނެ ގޮތެއް ނެތް ކަމަށް ހައުސިންގ މިނިސްޓަރު، ޑރ. އަލީ ހައިދަރު ވިދާޅުވެފައިވާތީ އާއްމުންގެ ކަންބޮޑުވުން ހާމަކުރަމުން އައި ދަނޑިވަޅެއްގައެވެ. ހައިދަރު މިފަދައިން ވިދާޅުވީ ޕީއެސްއެމްއަށް ދެއްވި ބަސްތީގަތުމެއްގައެވެ. މިނިސްޓަރ ވަނީ ހައުސިންގ މިނިސްޓްރީގެ މުވައްޒަފުންގެ މައުލޫމާތާއި މަޝްރޫޢުތަކުގެ މައުލޫމާތު ހިމެނޭ ސަރވަރ އަށް އަސަރުކޮށްފައިވާކަން ހާމަކުރައްވާފައެވެ. އެކަމާއި ގުޅޭ އިތުރު މައުލޫމާތު ރާއްޖެއެމްވީ އަށް ހިއްސާކުރައްވަމުން އަލިފާނުގައި އެ މިނިސްޓްރީގައި ހުރި ހުރިހާ ލިޔެކިޔުމަކާއި ޑޭޓާއެއް ވަނީ އަނދާފައި ކަމަށް މިނިސްޓަރ ފާހަގަކުރެއްވިއެވެ.

އެހެންނަމަވެސް މިނިސްޓަރ މުއްތަލިބް ވިދާޅުވީ ހައުސިންގެ ހުރިހާ މައުލޫމާތެއް ކްލައުޑްގައި ރައްކާކުރެވިފައިވާކަމަށެވެ. އަލިފާނުގެ ހާދިސާ ހިނގި ވުޒާރާތަކުގައި މުހިންމު ގިނަ ޑޭޓާތައް ހުރިކަން މިނިސްޓަރ ފާހަގަކުރެއްވިއެވެ. މުއްތަލިބް އިތުރަށް ވިދާޅުވި ހައުސިންގ ލޯނުތަކާ ބެހޭ މައުލޫމާތުތައް ވެސް ރައްކާތެރިކުރެވިފައިވާ ކަމަށެވެ. އަދި ބައެއް ޑޭޓާތަކާއި މައުލޫމާތުތައް ގެއްލިގެން ދިޔަ ވާހަކަ ފަތުރާ ކަމަށް ވަޒީރު ވިދާޅުވިއެވެ. އަދި ފުދޭ ވަރެއްގެ ގިނަ ޑޭޓާތައް ސްޓޯ ކުރެވިފައި، ބެކަޕް ހެދިފައި ހުރި ކަމަށް މުއްތަލިބް ވިދާޅުވިއެވެ.

މުއްތަލިބްގެ ވާހަކައިގައި ބައެއް ޑޭޓާތަކާއި މައުލޫމާތުތައް ގެއްލިގެން ދިޔަ ވާހަކަ ފަތުރާ ކަމަށް ވިދާޅުވެފައިވާ އިރު ޑޭޓާތައް ގެއްލިއްޖެ ނަމަ އެ މައުލޫމާތު ނުލިބޭނެ ކަމަށާއި ސަރވަރ އަށް އަސަރުކޮށްފައިވާ ކަމަށް ވިދާޅުވީ ހައުސިން މިނިސްޓަރ އަލީ ހައިދަރުއެވެ.

ބުރާސްފަތި ދުވަހު މިނިސްޓްރީގެ އިތުރުން، ކޮންސްޓްރަކްޝަން މިނިސްޓްރީ އަދި އެންވަޔަރަމަންޓް މިނިސްޓްރީ ހިންގަމުން އަންނަ އިމާރާތުގައި އަލިފާން ރޯވެ ވަނީ އަނދާފައެވެ. މިނިސްޓްރީން ބުނީ މިހާދިސާއާ ގުޅިގެން މިނިސްޓްރީން ކުރަމުންގެންދާ ގެދޮރުވެރިޔާ ސްކީމާ ގުޅޭ ހުރިހާ މައުލޫމާތާއި، ލިޔުންތަކަކީ މިނިސްޓްރީގެ ކްލައުޑް ހޯސްޓިންގައި ޑިޖިޓަލްކޮށް ބަލަހައްޓާ މައުލޫމާތު ކަމަށެވެ. އަދި މިހާދިސާގެ ސަބަބުން އެ މައުލޫމާތުތަކަށް އެއްވެސް އަސަރެއް ނުކުރާނެ ކަމަށް މިނިސްޓްރީން ބުނެއެވެ.