އަލިފާނުގެ ހާދިސާގެ ތަހުގީގަށް އިންޑިއާގެ ތަޖުރިބާކާރުންގެ ޓީމަކުން އެހީތެރިވަނީ
ހައުސިންގ މިނިސްޓްރީގެ އަލިފާނުގެ ހާދިސާއާއި ގުޅޭ މައުލޫމާތު ހިއްސާކުރުމަށް ފުލުހުން ވަނީ އެދިފަ
ހައުސިންގ މިނިސްޓްރީ ހިނގަމުން އައި އިމާރާތުގައި ރޯވި އަލިފާންގަނޑު ކޮންޓްރޯލު ކުރަން އެމްއެންޑީއެފް ފަޔަރ އެންޑް ރެސްކިޔު ސަރވިސްއިން ހަރަކާތްތެރިވަނީ
ތިން މިނިސްޓްރީއަކާއި މާލެ ސިޓީ ކައުންސިލްގެ އިދާރާގެ ބައެއްގައި ރޯވި އަލިފާނުގެ ހާދިސާ އާއި ގުޅޭ ގޮތުން ހިންގާ ތަހުގީގަށް އިންޑިއާގެ ތަޖުރިބާކާރުންގެ ޓީމަކުން އެހީތެރިވާކަން ފުލުހުން ހާމަކޮށްފިއެވެ.
ކޮމިޝަަނަރ އޮފް ޕޮލިސް ޢަލީ ޝުޖާޢު މީޑިއާތަކަށް ފޮނުއްވި މެސެޖެއްގައި ވިދާޅުވީ މި މަހުގެ 12 ވަނަ ދުވަހު މ. ގްރީން ބިލްޑިންގގައި ހިނގި އަލިފާނުގެ ހާދިސާއާ ގުޅިގެން ކުރެވެމުންދާ ތަހުގީގުގައި، އިންޑިއާގެ ތަޖުރިބާކާރުންގެ ހާއްސަ ޓީމެއް މިހާރު ދަނީ ދިވެހި ފުލުހުންނާއެކު ހަރަކާތްތެރިވަމުން ކަމަށެވެ.
މީގެ ކުރިން ދަރުބާރުގޭގައި ބޭއްވި ނޫސްވެރިންގެ ބައްދަލުވުމެއްގައި ސީޕީ ވަނީ އަލިފާން ނިއްވުމުގައި ސިފައިންނަށް ފުލުހުންގެ އެހީތެރިކަން ފޯރުކޮށްދީފައިވާ ކަމަށާއި ހުރިހާ ވަސީލަތެއް ބޭނުންކޮށްފައިވާނެ ކަމަށް ވިދާޅުވެފައެވެ.
މީގެ އިތުރުން އެ ފަދަ ބޮޑު ހާދިސާއެއްގެ ތަހުގީގު ފުލުހުން ފުރިހަމައަށް ކުރިއަށް ގެންދާނެ ކަމުގެ ޔަޤީންކަން އާއްމުންނަށް ސީޕީ ވަނީ ދެއްވާފައެވެ. އިތުރަށް ސީޕީ ވިދާޅުވީ އެ ތަހުގީގު ކުރިއަށްދާނީ ރާއްޖެއިން ބޭރުގެ ޓީމެއްގެ އެހީތެރިކަމާއި އެކުގައި ކަަމަށެވެ. ނަމަވެސް އެކަމުގެ އިތުރު ތަފްސީލެއް ނުދެއްވައެވެ.
ސީޕީ ވަނީ ރައްޔިތުންނާއި ހަމައަށް އެކަމާއި ގުޅޭ ފުރިހަމަ މައުލޫމާތު ހިއްސާ ކުރައްވާނެކަމަށް ފާހަގަކުރައްވާފައެވެ. ސީޕީ އިތުރަށް ވިދާޅުވީ އަލިފާނުގެ ހާދިސާ ހިނގި ސަރަހައްދު މިހާރު ފުލުހުންނަށް ހަވާލު ކޮށްފައިވާ ކަމަށެވެ. އެއާއި އެކު ފުލުހުންގެ ފޮރެންސިކް ޓީމުތަކުން އެ ސަރަހައްދުގައި މަސައްކަތް ކުރަމުންދާ ކަމަށާއި ސީސީޓީވީ ފުޓޭޖްތައް ބެލުމުގެ މަސައްކަތް ވެސް ކުރަމުންދާ ކަމަށް ސީޕީގެ ވާހަކައިގައި ފާހަގަކުރެއްވިއެވެ.
ހައުސިންގ މިނިސްޓްރީގެ އަލިފާނުގެ ހާދިސާއާއި ގުޅޭ މައުލޫމާތު ހިއްސާކުރުމަށް ފުލުހުން ވަނީ އެދިފައެވެ.
ފުލުހުން ބުނީ 2024 ޑިސެންބަރު 12 ވަނަ ދުވަހުގެ ހެނދުނުގެ ވަގުތެއްގައި ތިން މިނިސްޓްރީއެއް ހިންގަމުންދިޔަ އިމާރާތުގައި ހިނގާދިޔަ އަލިފާނުގެ ހާދިސާގެ ތަހުގީގަށް ބޭނުންކުރެވިދާނެ އެއްވެސް މައުލޫމާތެއް ލިބިފައިވާނަމަ މޭޖަރ ކްރައިމް އިންވެސްޓިގޭޝަންގެ ނަންބަރު 9911099 އަށް ގުޅުއްވައި ހިއްސާކުރުމަށެވެ.
ހައުސިން މިނިސްޓްރީ ހިންގަމުން އައި އިމާރާތުގައި ރޯވި އަލިފާން ކޮންޓްރޯލް ނުކުރެވި އެ ބްލޮކްގައި ހުންނަ ކޮންސްޓްރަކްޝަން މިނިސްޓްރީއާއި، އެންވަޔަރަމަންޓް މިނިސްޓްރީގެ އިތުރުން އެންވަޔަރަމަންޓަލް ޕްރޮޓެކްޝަން އެޖެންސީ އަދި މާލެ ސިޓީ ކައުންސިލްގެ ވައިޓަލް އައި ލޭންޑް ސެކްޝަން ވަނީ ބޭނުން ނުކުރެވޭ ވަރަށް ހަލާކުވެފައެވެ.
އަދި މި ހާދިސާ ތަހުގީގުކުރަމުން އަންނަ އިރު، ބޭރުން ތަހުގީގު ޓީމެއް ގެނެސްގެން އެ ހާދިސާ ތަހުގީކުރާނެ ކަމަށް ވެސް ވަނީ ބުނެފައެވެ. ނަމަވެސް ތަހުގީގު ފެށުމުގެ ކުރިން އަލިފާން ރޯވި އިމާރާތް ތަޅާ އެތަން ސާފުކުރުމުގެ މަސައްކަތް ވަނީ ފަށާފައެވެ.
އަލިފާނުގެ ހާދިސާއާއި ގުޅިގެން އެތަކެއް ސުވާލުތަކެއް އުފެދިފައިވާއިރު، މިއީ ބަޔަކު ގަސްދުގައި ކުރިކަމެއް ކަމަށް ވެސް ތުހުމަތުކުރެވެއެވެ. ނަމަވެސް މިކަމާއި ގުޅޭ ސާފު މައުލޫމާތެއް މިހާތަނަށް ހާމަކޮށްފައިނުވެއެވެ.
