ރައީސް ޑރ. މުހައްމަދު މުއިއްޒުގެ މި ސަރުކާރުގައި ހުރީ ރާއްޖޭގެ އެންމެ ނިކަމެތި މީހާ އޮބިއަޅާ، ފެލާލައިގެން އާމްދަނީ ހޯދުމުގެ ވިސްނުން ކަމަށް މާލޭ ސިޓީ ކައުންސިލްގެ މެމްބަރު ސައިފް ފާތިހު (އައިކޮ) ވިދާޅުވެއްޖެ އެވެ.

ސައިފް މިފަދައިން ވިދާޅުވީ ރާއްޖެ ޓީވީގެ "ޓީވީ ޓޯކް" ޝޯވް ގައި ވާހަކަދައްކަވަމުން ނެެވެ.

ނިމިދިޔަ އެމްޑީޕީ ސަރުކާރުން ކުރިއަށްގެންދިޔަ "ގެދޮރުވެރިޔާ"ގެ ފްލެޓްތަކުގެ އެއްބަސްވުން މިހާރު އެކުލަވާލަމުން ދަނީ މިލްކުވެރިފަރާތާއި މެދު އޮޅުން އަރާ ގޮތަށް ކަމަށް މާލޭ ސިޓީ ކައުންސިލުން ވަނީ ބުނެފަ އެވެ.

އެގޮތުން ފަހި ދިރިއުޅުން ކޯޕަރޭޝަން އާއި ފްލެޓް ލިބުނު މީހާ އާއި ދެމެދު ހަދަމުން ދަނީ "ޔުނިޓް ކުއްޔަށް ދިނުމާއި މިލްކް ކުރުމުގެ އެއްބަސްވުން" ކަމަށް ވުމާއި އެކު އެއީ ކުލީގެ އެއްބަސްވުމެވެ. އޭގެ ދަށުން ރަށްވެހިކަމުގެ ރެޖިސްޓްރީ ނުހެދޭނެ ކަމަށް ސިޓީ ކައުންސިލުން ބުނެއެވެ.

އެކަމަށް އިޝާރާތްކުރައްވާ ވާހަކަދައްކަވަމުން ސައިފް ވިދާޅުވީ ރާއްޖޭގައި މިވަގުތު ސޯޝަލް ހައުސިންގ ގާނޫނެއް ނެތް ކަމަށާއި އެހެން ކަމުން ސީދާ ސޯޝަލް ހައުސިންގ ސްކީމެއްގައި އަމަލުކުރަން ޖެހޭނެ އިޖުރާއަތްތައް ކަނޑައެޅިފައި ނެތް ކަމަށެވެ.

އެހެން ކަމުން ގާނޫނީ ގޮތުން ނެތް ކަމެއް ކުރަން އެންޕޯސް ކުރަން ކޯޓަށް ދެވެން ނޯންނާނޭ ކަމަށާއި ނަމަވެސް މިކަމުގައި މީހެއްގެ ހައްގަކަށް އުނިކަމެއް ލިބެންޏާ އެ ހައްގެއް ދިފާއުކުރަން ކޯޓަށް ދެވިދާނެ ކަމަށް ސައިފް ވިދާޅުވި އެވެ. އަދި އެއީ ވެސް ވަރަށް ޓެކްނިކަލް މަސައްކަތެއް ކަމަށާއި ފަހި ޔޫނިއަންގެ ފަރާތުން ގާނޫނީ ވަކީލުން އެމަސައްކަތް މިހާރު ކުރައްވަމުން ގެންދަވާ ކަމަށް އޭނާ ވިދާޅުވި އެވެ.

ސައިފް ވިދާޅުވީ ސިޓީ ކައުންސިލްގެ މެމްބަރެއްގެ ހައިސިއްޔަތުން ފްލެޓް މައްސަލާގައި އެތައްބަޔަކާއި ބައްދަލުކުރެވިފައިވާ ކަމަށާއި އެހެން ކަމުން މިކަމުގައި ގާނޫނީ ފަރުވާ ހޯދަން މަސައްކަތް ކުރަމުން އަންނަ ކަމަށެވެ.ނަމަވެސް އަދި މިވަގުތު ގިނަބަޔަކު ގޮވައިގެން މި މައްސަލާގައި ކޯޓަށް ދެވެން އޮތް ކަމަށް ގަބޫލު ނުކުރައްވާ ކަމަށް ވެސް ސައިފް ވިދާޅުވި އެވެ.

ސައިފް ވިދާޅުވީ މިވަގުތު ކޯޓަށް މި މައްސަލާގައި ނުދެވުނު ނަމަވެސް ކުރިއަށް އޮތް ތަނުގައި ކޯޓަށް ވެސް ދާނޭ ކަމަށެވެ. އަދި ސަރުކާރުން ބޭނުންހާ އެއްޗެއް ހަދަން ފުރުސަތު ދީގެން މަޑުން ނުތިބޭނޭ ކަމަށާއި ސަރުކާރަށް މިކަން ހިންދާލައިގެން ސަލާމަތުން ނުތިބޭނޭ ކަމަށް އޭނާ ވިދާޅުވި އެވެ.

ކުލި ނުދައްކާ ފަރާތްތަކަށް ބޮޑު އަދަދަކުން ޖޫރިމަނާ ކުރާގޮތަށް އޮތް އޮތުމާއި ގުޅިގެން އެކަމަށް ރައްދު ދެއްވައި ސައިފް ވިދާޅުވީ މިވަގުތު އަސާސީ ބޯހިޔާވަކިން ލިބިފައި ތިބި ނިކަމެތި މީހުންގެ އަތުން އެންމެ 3000 ނުވަތަ 4000 ރުފިޔާ ޖޫރިމަނާގެ ގޮތުގައި ނަގަން އެ ވިސްނަނީ ސަރުކާރަށް ގޮތްހުސްވީމަ ކަމަށެވެ. އެހެން ނޫން ނަމަ ސަރުކާރަކަށް އެވަރުގެ އަދަދެއް ބޭނުން ވެގެން އުޅެން ޖެހޭ ސަބަބެއް ވިސްނިވަޑައިނުގަންނާ ކަމަށް ސައިފް ވިދާޅުވިއެވެ.

ސައިފު ވިދާޅުވީ މި ސަރުކާރުން ފައިސާ ބޭނުމިއްޔާ އާމްދަނީ ހޯދޭނެ ގޮތްތައް އެބަހުރި ކަމަށާއި ނަމަވެސް މި ސަރުކާރުން ވިސްނަމުން އެ ގެންދަނީ އެންމެ ނިކަމެތި މީހާ ފެލާލައިގެން އާމްދަނީ ހޯދުމަށް ކަމަށެވެ.

ފާތިހު އިތުރަށް ވިދާޅުވީ މި ސަރުކާރުގެ ބޮޑޭުންނަށް، އަގުބޮޑު ކާރުކޮޅުގައި މަހަކު މުސާރައިގެ ގޮތުގައި ލައްކައެއްހާ ރުފިޔާ ލިބޭ ބޭފުޅުންނަށް ލާރީގެ ގޮތުން ދަތި ކަމެއް އިހުސާސް ނުވެދާނެ ކަމަށާއި ނަމަވެސް އެންމެ 7 ހާސް ނުވަތަ 8 ހާސް މުސާރައަށް ލިބޭ އާންމު ނިކަމެތި މީހާއަތުން ޖޫރިމާނާއޭ ކިޔާފަ އެތައް ހާސް ރުފިޔާއެއް ނަގާއިރު ލަދެއް ހަލާތެއް މި ސަރުކާރުގެ ބޭފުޅުންގެ ނެތް ކަމަށެވެ.