ފްލެޓާއި ގޯތީގެ މައްސަލާގައި ފަހި ޔޫނިއަންގެ ބޭފުޅުންނާ ބައްދަލުކުރެއްވުމަށް މިނިސްޓަރު މުއްތަލިބު ދެކޮޅު ހައްދަވައިފި
ފްލެޓުތައް ދޫނުކޮށް ލަސްވާ މައްސަލާގައި މިހާތަނަށް ގިނަ މަސައްކަތްތަކެއް ކުރެވިފައިވޭ
ހައުސިން މިނިސްޓަރު ޑރ. އަބްދުﷲ މުއްތަލިބް
ފްލެޓާއި ގޯތީގެ މައްސަލާގައި ރައްޔިތުންގެ ހައްގުގައި އެންމެ ބޮޑަށް ވަކާލާތުކުރާ އެއްޖަމިއްޔާ ކަމަށްވާ ފަހި ޔޫނިއަންގެ ބޭފުޅުންނާއި، ހައުސިން މިނިސްޓަރު ޑރ. އަބްދުﷲ މުއްތަލިބް ބައްދަލުކުރެއްވުމަށް ދެކޮޅު ހައްދަވައިފިއެވެ.
ގެދޮރުވެރިޔާ ސްކީމުން ދޫކޮށްފައިވާ ފްލެޓު ލިސްޓު އާއްމުނުކުރާތީ އެކަމުގެ ކަންބޮޑުވުންފާޅުކޮށް، ދަރުބާރުގޭގެ ދޮރުމަތީގައި އާދިއްތަ ދުވަހުގެ ހެނދުނު ވަނީ މުޒާހަރާކޮށްފައެވެ. މި މުޒާހަރާގައި ހުންނަވައި، ރާއްޖެއެމްވީއަށް ފަހިޔޫނިއަންގެ ރައީސް އިބްރާހިމް ނޫރު ވިދާޅުވީ ފްލެޓުތައް ދޫނުކޮށް ލަސްވާ މައްސަލާގައި މިހާތަނަށް ގިނަ މަސައްކަތްތަކެއް ކުރެވިފައިވާ ކަމަށާއި، ސަރުކާރުގެ ފަރާތުން އެއްބާރުލުން ނުލިބޭ ކަމަށެވެ.
ރޯދަމަހުގެ ކުރިން ފްލެޓު ލިސްޓް އާއްމު ކުރުމަށް މަސައްކަތްކުރާ ކަމަށް ސަރުކާރުން ބުނެފައިވާތީ އެކަމަށް އިޝާރާތް ކުރައްވައި ނޫރު ވިދާޅުވީ ރޯދައަށް ފްލެޓުތަކަށް ވަންނަން ބޭނުންވާ ގިނަ އާއިލާތައް ތިބި ކަމަށާއި، ވީހާ ވެސް އަވަހަށް ފްލެޓު ލިސްޓް އާއްމު ކުރުމަށް އެދި ހައުސިން މިނިސްޓްރީއަށް ސިޓީއެއް ހުށަހަޅާފައިވާ ކަމަށެވެ. ހައުސިން މިނިސްޓަރު ޑރ. އަބްދުﷲ މުއްތަލިބާ ފަހި ޔޫނިއަންގެ ފަރާތުން ބައްދަލުކުރަން ބޭނުންވާތީ، އެކަން ވެސް ހުށަހެޅި ކަމަށް އޭނާ ވިދާޅުވިއެވެ. ނަމަވެސް ފަހި ޔޫނިއަންނާއި ބައްދަލުކުރުމަށް މިނިސްޓަރު މުއްތަލިބު ދެކޮޅު ހައްދަވާފައިވާ ކަމަށާއި، ބައްދަލުކުރެއްވުމަށް ދެކޮޅު ހެއްދެވީ މިމައްސަލަ އިންސާފުވެރިކަމާއެކު ކުރިއަށް ގެންދަން ބޭނުންވާތީ ކަމަށް ސިޓީގެ ޖަވާބުގައި ދަންނަވާފައިވާ ކަމަށެވެ.
ނޫރު ވިދާޅުވީ ރައްޔިތުންގެ ފަރާތުން ވަކާލާތު ކުރާ ބަޔަކާ ބައްދަލުކުރަން އެދުމުން މިނިސްޓަރު މުއްތަލިބު ދެކޮޅު ހެއްދެވުމުގެ ނަތީޖާ ރަނގަޅުނުވާނެ ކަމަށެވެ. މިއީ އެބޭފުޅުންގެ އިހުލާސްތެރިކަމާއި، އިންސާފުވެރިކަމާމެދު ގިނަ ރައްޔިތުން ސުވާލު އުފެއްދުމަށް ދިން ފުރުސަތެއް ކަމަށް އޭނާ ވިދާޅުވިއެވެ.
