ހައުސިންގ މިނިސްޓްރީގެ އަލިފާނުގެ ހާދިސާއާއި ގުޅޭ މައުލޫމާތު ހިއްސާކުރުމަށް ފުލުހުން އެދިއްޖެ
ހާދިސާގެ ތަހުގީގަށް ބޭނުންކުރެވިދާނެ އެއްވެސް މައުލޫމާތެއް ލިބިފައިވާނަމަ މޭޖަރ ކްރައިމް އިންވެސްޓިގޭޝަނާއި ހިއްސާކުރުމަށް ވަނީ އެދިފައި
ހައުސިންގ މިނިސްޓްރީ ހިނގަމުން އައި އިމާރާތުގައި ރޯވި އަލިފާންގަނޑު ކޮންޓްރޯލު ކުރަން އެމްއެންޑީއެފް ފަޔަރ އެންޑް ރެސްކިޔު ސަރވިސްއިން ހަރަކާތްތެރިވަނީ
ހައުސިންގ މިނިސްޓްރީގެ އަލިފާނުގެ ހާދިސާއާއި ގުޅޭ މައުލޫމާތު ހިއްސާކުރުމަށް ފުލުހުން އެދިއްޖެއެވެ.
ފުލުހުން ބުނީ 2024 ޑިސެންބަރު 12 ވަނަ ދުވަހުގެ ހެނދުނުގެ ވަގުތެއްގައި ތިން މިނިސްޓްރީއެއް ހިންގަމުންދިޔަ އިމާރާތުގައި ހިނގާދިޔަ އަލިފާނުގެ ހާދިސާގެ ތަހުގީގަށް ބޭނުންކުރެވިދާނެ އެއްވެސް މައުލޫމާތެއް ލިބިފައިވާނަމަ މޭޖަރ ކްރައިމް އިންވެސްޓިގޭޝަންގެ ނަންބަރު 9911099 އަށް ގުޅުއްވައި ހިއްސާކުރުމަށެވެ.
ހައުސިން މިނިސްޓްރީ ހިންގަމުން އައި އިމާރާތުގައި ރޯވި އަލިފާން ކޮންޓްރޯލް ނުކުރެވި އެ ބްލޮކްގައި ހުންނަ ކޮންސްޓްރަކްޝަން މިނިސްޓްރީއާއި، އެންވަޔަރަމަންޓް މިނިސްޓްރީގެ އިތުރުން އެންވަޔަރަމަންޓަލް ޕްރޮޓެކްޝަން އެޖެންސީ އަދި މާލެ ސިޓީ ކައުންސިލްގެ ވައިޓަލް އައި ލޭންޑް ސެކްޝަން ވަނީ ބޭނުން ނުކުރެވޭ ވަރަށް ހަލާކުވެފައެވެ.
އަދި މި ހާދިސާ ތަހުގީގުކުރަމުން އަންނަ އިރު، ބޭރުން ތަހުގީގު ޓީމެއް ގެނެސްގެން އެ ހާދިސާ ތަހުގީކުރާނެ ކަމަށް ވެސް ވަނީ ބުނެފައެވެ. ނަމަވެސް ތަހުގީގު ފެށުމުގެ ކުރިން އަލިފާން ރޯވި އިމާރާތް ތަޅާ އެތަން ސާފުކުރުމުގެ މަސައްކަތް ވަނީ ފަށާފައެވެ.
އަލިފާނުގެ ހާދިސާއާއި ގުޅިގެން އެތަކެއް ސުވާލުތަކެއް އުފެދިފައިވާއިރު، މިއީ ބަޔަކު ގަސްދުގައި ކުރިކަމެއް ކަމަށް ވެސް ތުހުމަތުކުރެވެއެވެ. ނަމަވެސް މިކަމާއި ގުޅޭ ސާފު މައުލޫމާތެއް މިހާތަނަށް ހާމަކޮށްފައިނުވެއެވެ.
