މި އަހަރުގެ ސެޕްޓެމްބަރު މަސް ނިމުމުގެ ކުރިން 4000 ފްލެޓު ދޫކޮށް، އެތަންތަނުގައި މީހުންނަށް ދިރިއުޅެވޭނެ ކަމަށް ހައުސިން މިނިސްޓަރު ޑރ. އަބްދުﷲ މުއްތަލިބު ވިދާޅުވި ނަމަވެސް އެ މަސައްކަތް ވެސް ފެއިލްވެއްޖެ އެވެ.

މިނިސްޓަރު މުއްތަަލިބު މިޔަގީންކަން ދެއްވީ، 19 ޖޫން 2025 ގައި ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުންނެވެ.

އެ ދުވަހު މިނިސްޓަރު މުއްތަލިބު ވިދާޅުވީ 4،000 ފުލެޓުގެ ތެރެއިން މިހާތަނަށް އަމަލީ މަސައްކަތް ނިމިފައިވަނީ 1،000 ފުލެޓުގައި ކަމަށާއި، އަމާޒަކީ ސެޕްޓެމްބަރު މަހުގެ ނިޔަލަށް ހުރިހާ ފުލެޓެއްގެ މަސައްކަތް ނިންމުން ކަމަށެވެ. އަދި ޖުލައި މަހު މީހުންނާ ފުލެޓު ހަވާލުކުރަން ފަށައި، ސެޕްޓެންބަރު އަންނަންވާއިރަށް މީހުން ވައްދައި ނިންމައިލެވޭނެ ކަމަށް ގަބޫލު ކުރެވޭ ކަމަށެވެ.

ނަމަވެސް 4000 ސޯޝަލް ހައުސިން ޔުނިޓްތައް ހަވާލުކުރުމުގެ މަސައްކަތް ފަހިދިރިއުޅުން ކޯޕަރޭޝަން، އެފްޑީސީން ފަށާފައިވަނީ 28 ސެޕްޓެންބަރު 2025 ގައެވެ. އަމާން އުދަރެސް މަޝްރޫއުގައި ހިމެނޭ 16 ޓަވަރުގެ ތެރެއިން އެންމެ ފުރަތަމަ ތަޅުދަނޑި ހަވާލުކުރަނީ 14 ވަނަ ޓަވަރުގެ ފްލެޓްތަކެވެ.

ފުރަތަމަ ފްލެޓްގެ ތަޅުދަނޑި ފްލެޓް ލިބުނު ފަރާތައް ހަވާލުކުރުމުގެ ރަސްމިއްޔާތުގައި އެފްޑީސީގެ މެނޭޖިންގ ޑިރެކްޓަރ ހަމްދާން ޝަކީލް ވިދާޅުވީ، މި ފްލެޓްތަކުގެ ތަޅުދަނޑިތައް ހަވާލުކުރުމުގެ މަސައްކަތް ބާރު ސްޕީޑްގައި ކުރިއަށް ގެންދާ ކަމަށެވެ.

ހަމްދާން މިހެން ވިދާޅުވި ނަމަވެސް މިމަސައްކަތުގެ ސްޕީޑް ވަރަށް ލަސް ކަމަށާއި، ކުއްލިއަކަށް އަމާން އުދަރެސް ފްލެޓްތަކުގެ ތެރެއިން ފުރަތަމަ 14 ވަނަ ޓަވަރުގެ ތަޅުދަނޑިތައް ހަވާލުކުރަން ފަށާފައިވަނީ އޮކްޓޯބަރު މަހުގެ 3 ވަނަ ދުވަހު މާލޭގައި ބާއްވާ ބޮޑު އެއްވުމާއި ގުޅިގެން ކަމަށް ފްލެޓު ލިބުނު ގިނަ ބަަޔަކު ދަނީ ބުނަމުންނެވެ.

މި އަހަރުގެ ސެޕްޓެމްބަރު މަސް ނިމުމުގެ ކުރިން 4000 ފްލެޓު ދޫކޮށް މިމަސައްކަތް ނުނިންމުނު ގޮތާއި ގުޅޭގޮތުން ކަމާގުޅޭ އެއްވެސް ބޭފުޅެއްގެ ބަހެއް ވަނީ ލިބޭ ގޮތް ނުވެފައެވެ.

މި 4000 ހައުސިން ޔުނިޓްތަކަކީ ކުރީ ސަރުކާރުގައި އިމާރާތްކޮށް، ސްޓަރަކްޗަރގެ ހުރިހާ މަސައްކަތެއް ނިންމާފައިވާ މަޝްރޫއެކެވެ. އަދި ފްލެޓު ލިބޭނެ މީހުންގެ ލިސްޓްވެސް ފައިނަލް ކޮށްފައިވެއެވެ. ނަމަވެސް މިސަރުކާރުން ފުރަތަމަ ވަނީ އެލިސްޓަށް ފްލެޓުތައް ދޫކުރުމަށް ދެކޮޅު ހަދައި، މައްސަލަތަކެއް ބަލާކަން ހާމަކޮށްފައިވެއެވެ. މިސަރުކާރަށް ދޮޅު އަހަރުވެގެން ދިޔައިރު ވެސް މި މައްސަލަ ނިންމިފައިނުވާތީ، އަދި ގާނޫނީ ގޮތުން ކުރެވޭނެ ކަމަކަށްނުވާތީ ގިނަ ބައެއްގެ ފާޑުކިޔުން އަމާޒުވުމާއި ގުޅިގެން ކުރީ ސަރުކާރުގެ ފްލެޓު ލިސްޓަށް ފްލެޓުތައް ދޫކުރަން ނިންމައި އެކަން 29 މެއި 2025 ގައި ބޭއްވި ނޫސްވެރިންގެ ބައްދަލުވުމެއްގައި ހާމަކުރިއެވެ.

ނަމަވެސް ނުހައްގުން މިހާރު ވެސް ގިނަ ފްލެޓުތަކެއް އަތުލާފައިވާ ކަަމަށް ފަހި ޔޫނިއަންއިން ތުހުމަތުކޮށްފައިވެއެވެ. ފްލެޓު ތަޅުދަނޑި ހަވާލުކުރުމާއި ހުރިހާ މަސައްކަތެއް ކުރިއަށް ގެންދަނީ ޕޯޓަލް މެދުވެރިކޮށް ކަމަށްވާތީ، ފްލެޓު ލިބޭ މީހުންގެ ލިސްޓުން އުނިކޮށްފައިވާ އަދަދު ހާމައެއް ނުވެއެވެ. އަދި 4000 ފުލެޓްގެ ތެރެއިން 350 ފުލެޓް ވިއްކަން އުޅޭ މައްސަލައެއް ވެސް ވަނީ ފެންމަތިވެފައެވެ. މީގެ އިތުރުން މި ފްލެޓްތަކުގެ އެގްރީމެންޓް މިސަރުކާރުން ބަދަލުކޮށް އެޑްވާންސް ފައިސާ ނަގަމުންދަނީ ގަވާއިދާ ޚިލާފަށްކަމަށް ފަހިޔޫނިއަން ތަމްސީލު ކުރައްވާ ވަކީލު އަލީ ހުސެއިން ވިދާޅުވެފައިވެއެވެ.

ސަރުކާރުން ކަނޑައަޅާފައިވަނީ 2 ކޮޓަރީގެ އެޕާޓްމަންޓްތަކަށް 15000 ރުފިޔާގެ ޑިޕޮސިޓް އަދި 3 ކޮޓަރީގެ އެޕާޓްމަންޓްތަކަށް 25000 ރުފިޔާގެ ޑިޕޮސިޓް ދެއްކުމަށެވެ. ފްލެޓްތަކަށް ޑިޕޮސިޓް ފައިސާ ދައްކަންޖެހޭނީ އެއްފަހަރާއެވެ.

ނަމަވެސް ޑިޕޮސިޓް ދެއްކުމަށް ވަކި މުއްދަތެއް ކަނޑައަޅާފައެއް ނުވެއެވެ.

ދެ ކޮޓަރީގެ އެޕާޓުމެންޓަކަށް މަހު ކުއްޔަށް 7000 ރުފިޔާ އަދި މެއިންޓެނެންސްއަށް 1000 ރުފިޔާއާ އެކު މަހަކު ޖުމްލަ 8000 ރުފިޔާ ދައްކަން ޖެހެއެވެ. އަދި ތިން ކޮޓަރީގެ އެޕާޓުމެންޓަށް މަހު ކުއްޔަށް 9000 ރުފިޔާ އަދި މެއިންޓެނެންސްއަށް 1500 ރުފިޔާއާއެކު މަހަކު ޖުމްލަ 10500 ރުފިޔާ ދައްކަން ޖެހެއެވެ.