ފެނުނީ ކުޅުންތެރިންގެ ފެންވަރު، މަސައްކަތް ރަނގަޅު: ފްލިކް

ޔުއެފާ ޗެމްޕިއަންސް ލީގުގައި ބޮރޫޝިއާ ޑޯޓްމަންޑާ ދެކޮޅަށް ކުޅުނު މެޗުގައި ފެނުނީ ބާސެލޯނާ ކުޅުންތެރިންގެ ފެންވަރު ކަމަށާއި، ކުޅުންތެރިން ކުރީ ރަނގަޅު މަސައްކަތެއް ކަމަށް އެ ޓީމުގެ ކޯޗު ހަންސީ ފްލިކް ބުނެފި އެވެ.

ޑޯޓްމަންޑުގެ އަމިއްލަ ދަނޑުގައި ކުޅުނު މެޗުން ބާސެލޯނާ މޮޅުވީއިރު، އެ ޓީމުން ދެ ފަހަރެއްގެ މަތިން ލީޑު ނެގިއިރު ޑޯޓްމަންޑުން ނަތީޖާ ހަމަހަމަ ވެސް ކުރި އެވެ. ނަމަވެސް މެޗުގެ ފަހު ވަގުތުގައި ލަނޑު ޖަހައިގެން ބާސެލޯނާ ވަނީ އެ މެޗުން މޮޅުވެފަ އެވެ.

އެ މެޗަށް ފަހު ނޫސްވެރިންނާ ވާހަކަ ދައްކަމުން ފްލިކް ބުނީ، ބާސެލޯނާގެ ކުޅުންތެރިން އެމީހުންގެ އަމިއްލަ ނަފްސަށް ފުރިހަމަ އަށް އިތުބާރު ކުރާ ކަމަށާއި، އެކަމާ ވަރަށް ފަޚުރުވެރިވާ ކަމަށެވެ. އަދި ވަކިން ޚާއްސަކޮށް، އެ މެޗުގައި ކުޅުންތެރިން އެ މީހުންގެ ހުނަރާއި ފެންވަރު ދައްކުވައިދިން ކަމަށާއި، މެޗާ މެދު ހިތްހަމަ ޖެހިފައި ހުރި ކަމަށް ވެސް ފްލިކް ބުންޏެވެ.

މީޣެ އިތުރުން ފްލިކް ބުނީ މެޗުގެ ފުރަތަމަ ހާފުގައި ބާސެލޯނާ އިން ވަރަށް ރަނގަޅަށް ކުޅުނު ކަމަށެވެ. މެޗުގެ ދެ ވަނަ ހާފުގައި ޑޯޓްމަންޑުން ލަނޑު ޖެހުމާ އެކު ވެސް، ބާސެލޯނާގެ ކުޅުންތެރިންގެ ފަރާތުން ފެނުނީ "ހަމަޖެހިގެން" ތިބި ކަހަލަ މަންޒަރެއް ކަމަށް ފްލިކް ބުނެފައިވެ އެވެ. އޭނާ ސިފަ ކުރި ގޮތުގައި އެ މެޗުގައި ޑޯޓްމަންޑުން ވެސް ވަނީ ރަނގަޅު ކުޅުމެއް ދައްކައިފަ އެވެ. ޚާއްސަކޮށް އެ ޓީމުގައި ވެސް ހުނަރުވެރި ކުޅުންތެރިން ތިބިއިރު، އެ ކުޅުންތެރިން ހުއްޓުވުމަށް ޑިފެންސްގައި ބާސެލޯނާ އިން މޮޅު ކުޅުމެއް ދެއްކި ކަމަށް ފްލިކް ޤަބޫލު ކުރެ އެވެ.

މެޗުގައި ޑޯޓްމަންޑު ޖެހި ދެ ވަނަ ލަނޑަކީ ބާސެލޯނާގެ ކުޅުންތެރިންނަށް ހެދުނު ގޯހެއްގެ ސަބަބުން ޖެހި ލަނޑެއްކަން ފާހަގަކޮށް ފްލިކް ބުނީ، އަބަދު ވެސް ކަންކަން ރަނގަޅު ކުރެވޭނެ ކަމަށެވެ. އަދި ކުރިއަށް އޮތް ތަނުގައި އެފަދަ ކަންކަން ރަނގަޅު ކުރުމަށާއި، އެކަންކަމަށް ސަމާލުކަން ދިނުން މުހިންމު ކަމަށް ވެސް ފްލިކް ބުންޏެވެ. ޖުމުލަ ގޮތެއްގައި އެ މެޗުގައި ބާސެލޯނާ އިން ދެއްކީ ފުރިހަމަ ކުޅުމެއް ކަމަށާއި، އޭނާގެ ކުޅުންތެރިންނަށް މަރުޙަބާ ކިޔަން ބޭނުންވާ ކަމަށް ވެސް ފްލިކް ވަނީ ބުނެފަ އެވެ.

މި ސީޒަންގެ ޗެމްޕިއަންސް ލީގުގައި މިހާތަނަށް ބާސެލޯނާ އިން ހަ މެޗު ކުޅެފައިވާއިރު، ފަސް މެޗުން އެ ޓީމު ވަނީ މޮޅުވެފަ އެވެ. އަދި އެއް މެޗުން ވަނީ ބަލިވެފަ އެވެ. މި ސީޒަނާ ދިމާކޮށް ބާސެލޯނާގެ ކޯޗުކަމާ ހަވާލުވީ ފްލިކްގެ އިރުޝާދުގެ ދަށުން ޗެމްޕިއަންސް ލީގުގައި ބާސެލޯނާ އިން ރަނގަޅު ނަތީޖާތަކެއް ނެރެމުން އަންނައިރު، ސްޕެނިޝް ލީގުގެ ކުރީ ކޮޅު ބާސެލޯނާ އިން ރަނގަޅު ނަތީޖާތަކެއް ނެރުނެވެ. ނަމަވެސް މި ފަހަކަށް އައިސް ލީގުގައި އެ ޓީމުގެ ނަތީޖާތައް ދަށްވެ، އެއް ވަަނައިގައި ހިފަހައްޓަމުން އައި ބޮޑު ލީޑު ވެސް ވަނީ ގެއްލިފަ އެވެ.