މިހާރު ކުރިއަށްދާ ނައިންޓީ ޕްލަސް ގޯލްޑް ކަޕް ފުޓުބޯޅަ މުބާރާތުގެ ދެ ވަނަ ބުރުގެ ގުރޫޕު ސްޓޭޖުގައި ވަރުގަދަ ބ.އޭދަފުއްޓާ ދެކޮޅަށް ކުޅުނު މެޗުން ކ.މާފުށި މޮޅުވެއްޖެ އެވެ.

ގުރޫޕު އެފްގައި ހޯމަ ދުވަހުގެ ރޭ ގަލޮޅު ރަސްމީ ދަނޑުގައި ކުޅުނު މެޗު މާފުށިން ކާމިޔާބު ކުރީ 2-0 އިންނެވެ. އެ މެޗާ ކުރިމަތިލީއިރު މުބާރާތުގައި އޭދަފުށި ކުރިން ކުޅުނު ތިން މެޗުން ވެސް އެ ޓީމު އޮތީ މޮޅުވެފަ އެވެ. އެ ބުރުގައި މާފުށިން ވެސް ތިން މެޗު ކުޅެފައިވާއިރު، އެއް މެޗުން ވަނީ މޮޅުވެފަ އެވެ. އަނެއް މެޗުން ބަލިވެ، އަނެއް މެޗުން ވަނީ އެއްވަރުވެފަ އެވެ.

މެޗުގެ ފުރަތަމަ ހާފުގައި މާފުއްޓަށް ލީޑު ނަގައިދިނީ އިބްރާހީމް އަތީޤު ޙަސަން އެވެ. އެ ލަނޑު އޭނާ ޖެހީ މެޗުގެ ފުރަތަމަ ހާފުގެ 33 ވަނަ މިނެޓުފަ އެވެ. މެޗުގައި މާފުށިން އެ ޓީމުގެ ދެ ވަނަ ލަނޑު ޖެހީ ދެ ވަނަ ހާފުގަ އެވެ. މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި މާފުއްޓަށް އެ ލަނޑު ޖަހައިދިނީ އިސްމާއީލް މަފާޒު އެވެ. މެޗުގައި އޭނާ ކުޅެން ނިކުތީ ވެސް ބަދަލު ކުޅުންތެރިޔެއްގެ ގޮތުގަ އެވެ.

މި ގުރޫޕުގައި މާފުއްޓާއި، އޭދަފުށީގެ އިތުރުން ދެން އޮތީ ހއ.ދިއްދޫ އެވެ.