ފުލަމް ކައިރިން އާސެނަލަށް ޕޮއިންޓެއް

އިނގިރޭސި ޕްރިމިއަރ ލީގުގައި ފުލަމްއާ ދެކޮޅަށް ކުޅުނު މެޗުން އެއްވަރުވެ، އާސެނަލް އިން މުހިންމު ދެ ޕޮއިންޓު ގެއްލުވާލައިފި އެވެ.

ފުލަމްގެ ދަނޑުގައި އާދީއްތަ ދުވަހުގެ ރޭ ކުޅުނު މެޗު ނިމުނީ ދެ ޓީމު 1-1 އިން އެއްވަރުވެގެންނެވެ. މެޗުގައި ފުރަތަމަ ލަނޑު ޖަހައި ކުރި ހޯދީ ވެސް ފުލަމް އިންނެވެ. ނަމަވެސް އާސެނަލް އިން ވަނީ ދެ ވަނަ ހާފުގައި ލަނޑު ޖަހައިގެން މެޗުގެ ނަތީޖާ ހަމަހަމަ ކޮށްފަ އެވެ.

މެޗު ފަށައިގެން 11 ވަނަ މިނެޓުގައި ފުލަމް އިން ވަނީ އާސެނަލް ކޮޅަށް ލަނޑު ޖަހައި ލީޑު ނަގައިފަ އެވެ. ކެނީ ޓެޓޭ ތަނަވަސްކޮށްދިން ފުރުސަތެއްގައި ފުލަމް އަށް ލީޑު ނަގައިދިނީ ރައުލް ހިމިނޭޒް އެވެ. މެޗުގައި ލަނޑު ޖެހުމަށް އާސެނަލް އިން ކުރި މަސައްކަތް ކާމިޔާބުވީ ދެ ވަނަ ހާފުގަ އެވެ. އެގޮތުން ދެ ވަނަ ހާފު ފަށައިގެން ހަތް ވަނަ މިނެޓުގައި އާސެނަލަށް ނަތީޖާ ހަމަހަމަ ކޮށްދިނީ ވިލިއަމް ސަލީބާ އެވެ. އެއީ ކައި ހަވާޓްޒް ތަނަވަސްކޮށްދިން ފުރުސަތެއްގައި އެނާ ޖެހި ލަނޑެކެވެ. އޭގެ ފަހުން މެޗުގެ 88 ވަނަ މިނެޓުގައި އާސެނަލްގެ ބުކަޔޯ ސަކާ ލަނޑެއް ޖެހި ނަމަވެސް، ވީޑިއޯ އެސިސްޓެންޓް ރެފްރީ (ވީއޭއާރު) އިން ވަނީ އެ ލަނޑު ބަލައި ނުގަންނަން ނިންމައިފަ އެވެ.

މި ނަތީޖާ އާއެކު އާސެނަލް އޮތީ ލީގު ތާވަލްގެ ތިން ވަނަ މަގާމުގަ އެވެ. އެއީ މިހާތަނަށް އެ ޓީމު ކުޅެފައިވާ 15 މެޗުން 29 ޕޮއިންޓު ހޯދައިގެންނެވެ. ލީގުގައި އަށް މެޗުން އާސެނަލް މޮޅުވެފައިވާއިރު، ފަސް މެޗުން ވަނީ އެއްވަރުވެފަ އެވެ. އަދި އަނެއް ދެ މެޗުން އާސެނަލް ވަނީ ބަލިވެފަ އެވެ.