އަމިއްލަ ދަނޑުގައި ފޮރެސްޓު އަތުން ޔުނައިޓެޑު ބަލިވެއްޖެ

އިނގިރޭސި ޕްރިމިއާ ލީގުގައި ނޮޓިންހަމް ފޮރެސްޓާ ދެކޮޅަށް ކުޅުނު މެޗުން މެންޗެސްޓަރ ޔުނައިޓެޑު ބަލިވެއްޖެ އެވެ.

ޔުނައިޓެޑުގެ އަމިއްލަ ދަނޑުގައި ހޮނިހިރު ދުވަހުގެ ރޭ ކުޅުނު މެޗުގައި ފޮރެސްޓު އަތުން އެ ޓީމު ބަލިވީ 3-2 އިންނެވެ. މެޗުގައި ފޮރެސްޓުން ލަނޑު ޖަހައި ކުރި ހޯދާފައި ވަނިކޮށް ޔުނައިޓެޑުން ނަތީޖާ ހަމަހަމަ ވެސް ކުރި އެވެ. ނަމަވެސް ފޮރެސްޓުން ވަނީ އިތުރު ދެ ލަނޑު ޖަހައިގެން ލީޑު ހޯދައިފަ އެވެ.

މެޗު ފަށައިގެން ދެ ވަނަ މިނެޓުގައި ފޮރެސްޓަށް ލީޑު ނަގައިދިނީ ނިކޮލަ މިލެންކޮވިޗް އެވެ. ނަމަވެސް އޭގެ ފަހުން ފުރަތަމަ ހާފުގެ 18 ވަނަ މިނެޓުގައި ރަސްމުސް ހޮލުންޑު ވަނީ ލަނޑު ޖަހައި ޔުނައިޓެޑަށް ނަތީޖާ ހަމަހަމަ ކޮށްދީފަ އެވެ. މެޗުގެ ދެ ވަނަ ހާފު ފަށައިގެން ދެ ވަނަ މިނެޓުގައި ފޮރެސްޓުން ވަނީ ދެ ވަނަ ފަހަރަށް ލީޑު ނަގައިފަ އެވެ. އެ ލަނޑު އެ ޓީމަށް ޖަހައިިދިނީ ގިބްސް ވައިޓް އެވެ. އޭގެ ފަހުން 54 ވަނަ މިނެޓުގައި ފޮރެސްޓުގެ ތިން ވަނަ ލަނޑު ޖެހީ ކްރިސް ވުޑް އެވެ. މެޗުގައި ޔުނައިޓެޑުގެ ދެ ވަނަ ލަނޑު 61 ވަނަ މިނެޓުގައި ޖެހީ ބްރޫނޯ ފެނާންޑޭސް އެވެ.

ޔުނައިޓެޑު އަތުން ހޯދި މޮޅާއެކު ފޮރެސްޓު އޮތީ ލީގު ތާވަލްގެ ފަސް ވަނަ މަގާމުގަ އެވެ. އެއީ މިހާތަނަށް އެ ޓީމު ކުޅެފައިވާ 15 މެޗުން 25 ޕޮއިންޓާ އެކު އެވެ. ފޮރެސްޓު އަތުން ވީ ބައްޔާއެކު ޔުނައިޓެޑު އޮތީ 13 ވަނައިގަ އެވެ. އެއީ 15 މެޗުން 19 ޕޮއިންޓާ އެކު އެވެ. މިއީ މި ސީޒަންގެ ލީގުގައި ޔުނައިޓެޑުގެ ހަ ވަނަ ބައްޔެވެ.