ސޫރިޔާ ސަރުކާރުގެ ބާރުގެ ދަށުގައި އޮތް ދަރްއާ ސިޓީގެ ކޮންޓްރޯލް ހަނގުރާމަވެރިން ނަގައިފި

ސޫރިޔާ ސަރުކާރުގެ ބާރުގެ ދަށުގައި އޮތް ދަރްއާ ސިޓީގެ ކޮންޓްރޯލް ހުކުރު ދުވަހު ހަނގުރާމަވެރިން ނަގައިފިއެވެ.

ސޫރިޔާގެ އަސްކަރިއްޔާ އެ ސަރަޙައްދުތަކުން ފައިބައިގެން ދިޔުމާއެކު، ލޯކަލް ފެކްޝަންތަކުން ދަރްއާ ޕްރޮވިންސްގެ އިތުރު ސަރަޙައްދުތަކުގެ ކޮންޓްރޯލް ނެގީ ކަމަށް ރިޕޯޓުތައް ބުނެއެވެ. "މީގެ ތެރޭގައި ދަރްއާ ސިޓީވެސް ހިމެނެއެވެ. މިހާރު އެމީހުން ޕްރޮވިންސްގެ 90 އިންސައްތަ އަށްވުރެ ބޮޑު ސަރަޙައްދެއް ކޮންޓްރޯލް ކުރެއެވެ،" ހަނގުރާމަވެރިން ހޯދަމުންދާ ކުރިއެރުންތަކާ ބެހޭ ގޮތުން ސީރިއަން އޮބްޒަވޭޓަރީ ފޯ ހިއުމަން ރައިޓްސްއިން ބުނެފައިވެއެވެ.

ހުކުރު ދުވަހުގެ ކުރީކޮޅު، ރައީސް ބައްޝާރު އާ ދެކޮޅު ޖަމާއަތްތަކުން އުރުދުން އާއި ސޫރިޔާ އާ ދެމެދު އޮންނަ ނާސިބް-ޖަބާރު ބޯޑަރ ކްރޮސިންގގެ ކޮންޓްރޯލް ވެސް ނަގައިފިކަމަށް އޮބްޒަވޭޓަރީން ބުނެފައިވެއެވެ. އަދި އުރުދުންގެ ދާޚީލީ ވަޒީރު މާޒިން އަލް-ފަރާޔާ ވިދާޅުވި ގޮތުގައި އުރުދުން އާ ވީ ފަޅިން އެ ޤައުމުން ވަނީ ބޯޑަރ ކްރޮސިންގ ބަންދު ކޮށްފައެވެ.

ދަރްއާ ޕްރޮވިންސްއަކީ 2011 ވަނަ އަހަރު ސޫރިޔާގެ ރައީސް ބައްޝާރު އަލް-އަސަދުގެ ވެރިކަމާ ދެކޮޅަށް ފެށުނު އިންޤިލާބު ފެށުނު ސަރަޙައްދެވެ. ނަމަވެސް 2018 ވަނަ އަހަރު އަސަދުގެ ރަހްމަތްތެރި ރަޝިއާގެ މެދުވެރިވެގެން އެކުލަވާލި ހަނގުރާމަ ހުއްޓާލުމުގެ އެއްބަސްވުމެއްގެ ދަށުން އެ ސަރަޙައްދު އަނބުރާ ސަރުކާރުގެ ބާރުގެ ދަށަށް އައިސްފައިވެއެވެ. 2010 ގެ އަހަރުތަކުގެ ކުރީކޮޅު ދާޚިލީ ހަނގުރާމައިގެ އެންމެ ހޫނު ދުވަސްވަރު އެތަނަކީ ސަރުކާރާ ދެކޮޅު ބަޣާވާތްތެރިންގެ މައި މަރުކަޒެއްގެ ގޮތުގައި އޮތް ތަނެކެވެ.

ފާއިތުވި އަހަރުތަކުގައި ދަރްއާ ޕްރޮވިންސްގައި ގިނަ ހަމަނުޖެހުންތައް ހިނގައިފައިވެއެވެ. މީގެ ތެރޭގައި ގިނަ ހަމަލާތަކާއި، މީހުން މެރުމުގެ ޙާދިސާ ތައް ހިމެނެއެވެ. މީގެ ތެރެއިން ބައެއް ހަމަލާތަކުގެ ޒިންމާ އައިސިސް އިން ނަގައިފައިވެއެވެ.

ހުކުރު ދުވަހު ސޫރިޔާގެ އިދިކޮޅު ބާރުތަކުން ބުނި ގޮތުގައި އެމީހުންގެ ކުއްލި ކުރިއެރުން ހުމްސް ސިޓީއާ ހަމައަށް ވަނީ ފޯރާފައެވެ.

"އަހަރުމެންގެ ބާރުތަކުން ހުމްސް ސިޓީގެ ބޭރުން އޮންނަ ސަރަޙައްދުގެ އެންމެ ފަހު އަވަށް މިނިވަންކޮށްފައިވާ އިރު، މިހާރު ހުމްސް ސިޓީގެ ފާރުތަކާ ހަމައަށް ވާސިލު ވެވިއްޖެ،" ސޫރިޔާ ސަރުކާރާ ދެކޮޅަށް ފުޅާ ދާއިރާ އެއްގައި ކުރިއަށް ގެންދާ ހަމަލާތަކުގައި އިސްކޮށް ހަރަކާތްތެރިވާ ފެކްޝަނުން ޓެލެގްރާމްގައި ބުނެފައިވެއެވެ.

އޭނާ ބުނި ގޮތުގައި ހުމްސް ކޮންޓްރޯލް ކުރެވުމުން އިދިކޮޅު ހަނގުރާމަވެރިންނަށް "ސޫރިޔާގެ ސަރަޙައްދީ ބަނދަރުތަކާ ދިމާއަށް ދާ މައި މަގު ބަންދުކުރުމުގެ" ފުރުޞަތު ލިބިގެންދާނެއެވެ. މި ސަރަޙައްދަކީ ރައީސް ބައްޝާރު އަލް-އަސަދު ނިސްބަތްވާ އަލަވިއްޔާ މައިނޯރިޓީގެ މައި މަރުކަޒެވެ.

ރިޕޯޓުތައް ބުނާ ގޮތުގައި ބުރާސްފަތި ދުވަހު އަލަވިއްޔާ އަށް ނިސްބަތްވާ އެތައް ހާސް މީހުން ހުމްސް އިން ރައްކާތެރިކަން ހޯދުމަށްޓަކައި ނުކުމެ އެހެން ސަރަހައްދުތަކަށް ދަތުރު ފަށާފައިވެއެވެ.

ސޫރިޔާގެ ރައީސް ބައްޝާރް އަލް-އަސަދުގެ ސަރުކާރާ ދެކޮޅަށް ހަނގުރާމަ ކުރަމުންދާ މައި ގުރޫޕަކީ ހަޔިއަތު ތަޙްރީރް އަލް-ޝާމް (އެޗްޓީއެސް)ގެ ހަނގުރާމަވެރިންނެވެ.

ސަރުކާރާ ދެކޮޅަށް ކުއްލި ހަމަލާތަކެއް އެޗްޓީއެސް ގެ ހަނގުރާމަވެރިން ދޭން ފެށީ ނޮވެމްބަރު 27 ވަނަ ދުވަހުއެވެ.

އަސަދުގެ ސަރުކާރާއި އަސްކަރިއްޔާގެ ބާރުގެ ދަށުގައި އޮތް ސަރަޙައްދުތަކަށް އެޗްޓީއެސްގެ ހަނގުރާމަވެރިން ޙަމަލާ ދޭން ފަށާފައި ވަނީ ނޮވެންބަރު 27ވަނަ ދުވަހުއެވެ.

އެޗްޓީއެސްގެ ހަނގުރާމަވެރިންގެ ޙަމަލާތައް ފުރަތަމަ އަމާޒު ކޮށްފައި ވަނީ ހުޅަނގުއުތުރުގައި އޮތް ޙަލަބް ޕްރޮވިންސަށެވެ.