އިސްރާއީލުގެ ބާރުތަކުން ސޫރިޔާގެ އެކި ސަރަޙައްދުތަކަށް ބާރުގަދަ ހަމަލާތަކެއް ހަމަލާދީފިއެވެ.
ސޫރިޔާގައި ދިގު މުއްދަތަކަށް އޮތް ބައްޝާރު އަލް-އަސަދު ގެ ވެރިކަން ވެއްޓިފައިވާ މި ދަނޑިވަޅުގައި، ރިޕޯޓުތައް ބުނާ ގޮތުގައި އިސްރާއީލުން މިދިން ހަމަލާތަކަކީ މިހާތަނަށް ސޫރިޔާ އަށް ދިން އެންމެ ވަރުގަދަ ހަމަލާތަކެވެ.
ހަމަލާ ދިން ތަންތަނުގެ ތެރޭގައި އެ ގައުމުގެ މައި ތިން ވައިގެ ބަނދަރަކާއި، ވެރިރަށް ދިމިޝްގުގައި ހުންނަ މުހިންމު އަސްކަރީ ވަސީލަތްތަކަށް ހިމެނެއެވެ.
އަނެއްކޮޅުން ވެރިކަމުން ވައްޓާލެވުނު ރައީސް ބައްޝާރު އަލް-އަސަދުގެ ބޮޑުވަޒީރު ވިދާޅުވެފައިވަނީ އިދިކޮޅު ފަރާތްތަކުން އެކުލަވާލާ ސަރުކާރަށް ބާރުތައް ހަވާލުކުރުމަށް އެއްބަސްވެފައިވާ ކަމަށެވެ. އަލަށް އެކުލަވާލާ ސަރުކާރުގެ އިސްވެރިޔަކީ މުޙައްމަދު އަލް-ބަޝީރެވެ.
އިސްރާއީލުން މި ދަނޑިވަޅުގައި ގަދަފަދަ ހަމަލާތައް ސޫރިޔާ އަށް ދިނުމުގެ އިތުރުން ގޯލާން ހައިޓްސްގެ އިތުރު ބިންތައް ދަނީ ފޭރެމުންނެވެ. ޤަޠަރު، އިރާޤު އަދި ސަޢޫދީ ޢަރަބިއްޔާއިން ސީރިއާގެ ގޯލާން ހައިޓްސް އިސްރާއީލުން ހިސޯރުކުރުން ކުށްވެރިކޮށްފައިވެއެވެ. އަދި އދ. ގެ ސުލްޙަ ބަލަހައްޓާ ބާރުތަކުން ބުނެފައިވަނީ މިއީ 1967 ގެ ހަނގުރާމަ ނިމުމަކަށް ގެނައި 1974 ގެ ހަނގުރާމަ ހުއްޓުމުގެ އެއްބަސްވުމާ ޚިލާފު ކަމެއް ކަމަށެވެ.
އިސްރާއީލުގެ ހަނގުރާމައިގެ ވަޒީރު އިސްރާއީލް ކަޓްޒް ވިދާޅުވީ ހޯމަ ދުވަހު، އެ ޤައުމުގެ ސިފައިން "ސީރިޔާގެ އެކި ކަންކޮޅުތަކުގައި ހުރި ބޮޑެތި ސްޓްރެޓެޖިކް ހަތިޔާރުތައް ނައްތާލާނެ" ކަމަށެވެ.
މީގެ ތެރޭގައި "ބިމުން ވަޔަށް ދޫކުރާ މިސައިލްތަކާއި، ވައިގެ ދިފާޢީ ނިޒާމުތަކާއި، ބިމުން ބިމަށް ދޫކުރާ މިސައިލްތަކާއި، ކްރޫޒް މިސައިލްތަކާއި، ދުރަށް ދަތުރުކުރާ ރޮކެޓްތަކާއި، އަދި ކަނޑުގެ ސަރަޙައްދަރަޙައްދުތަކަށް އަމާޒުކުރާ މިސައިލްތައް" ހިމެނެއެވެ. އިސްރާއީލުގެ ޚާރިޖީ ވަޒީރު ގިޑިއަން ސާރު ވިދާޅުވީ ކުރިއަށް އޮތް ދުވަސްތަކުގައިވެސް ވައިގެ ހަމަލާތައް ދެމުން ގެންދާނެ ކަމަށެވެ. "ހަމަލާ ދެނީ ސްޓްރެޓިޖިކް ހަތިޔާރު ނިޒާމުތަކަށް. މިސާލަކަށް، ބާކީ ހުރި ކެމިކަލް ހަތިޔާރުތަކާއި ނުވަތަ ދުރަށް ދަތުރުކުރާ މިސައިލްތަކާއި ރޮކެޓްތަކަށް. އެއީ މި ތަކެތި ހައްދުފަހަނައަޅާފަނައަޅާފައިވާ މީހުންގެ އަތްމައްޗަށް ނުދިއުމަށްޓަކައި،" ސާރު އަލް-ޤުދުސްގައި ނޫސްވެރިންނަށް ވިދާޅުވިއެވެ.
