އުމުރުފުޅުން 59 އަހަރުގެ ބައްޝާރު އަލް-އަސަދު ވެރިކަމާ ހަވާލުވެ ވަޑައިގަތީ 2000 ވަނަ އަހަރު، އޭނާގެ ބައްޕަ ހާފިޒް އަލް-އަސަދު އަވަހާރަވުމުންނެވެ.

ހާފިޒް އަލް-އަސަދު ޤައުމު ވެރިކަން ކުރެއްވީ 1971 އިން ފެށިގެންނެވެ.

ދިމިޝްޤުގައި އުފަންވެ ވަޑައިގެންނެވި ބައްޝާރު އަލް-އަސަދު ވަނީ އެ ގައުމުގެ މެޑިކަލް ސްކޫލުން ގްރެޖުއޭޓްވެފައެވެ. އަދި ލަންޑަނުގައި އޮފްތަލްމޮލޮޖީގެ ދާއިރާއިން ސްޕެޝަލައިޒް ވުމަށް ކިޔަވާވިދާޅުވަމުން ދަނިކޮށް، އޭނާގެ ބައްޕާފުޅު އަވަހާރަވުމާ ގުޅިގެން ސޫރިޔާއަށް އެނބުރި ވަޑައިގަތެވެ.

ބައްޝާރުގެ ބޭބެ ބާސިލް އަލް-އަސަދަކީ އެމަނިކުފާނުގެ ބައްޕަގެ ފަހުން ޤައުމުގެ ވެރިޔަކަށް ވާނެ ކަމަށް ގިނަ ބަޔަކު ޤަބޫލުކުރި ފަރާތެވެ.

ނަމަވެސް ކާރު އެކްސިޑެންޓެއްގައި ބާސިލް އަވަހާރަވުމުން، ބައްޝާރަށް ވެރިކަން ވާރުތަވިޔެވެ.

ބައްޝާރުގެ ވެރިކަމުގެ ލައްޖެހިގެން ދިޔައީ 2011 ގައި ފެށުނު ދާޙިލީ ހަނގުރާމައިންނެވެ. އެއީ ޑިމޮކްރަސީއަށް އެދި ސޫރިޔާގެ ރައްޔިތުން މަގުމައްޗަށް ނުކުތުމުން، އެމީހުންނާ ދެކޮޅަށް ބާރުގެ ބޭނުން ކުރެއްވުމާއެކު އުފެދިގެން ދިޔަ ބައިބައިވުންތަކާއެކުގައެވެ.

ބައްޝާރު ގައުމުން ފިއްލަވައިގެން ޑިސެމްބަރު 8 ވަނަ ދުވަހު ވަޑައިގެންނެވި އިރު އޭނާގެ މައްޗަށް ވަނީ އިންސާނީ ޙައްޤުތަކާ ޚިލާފު އެތައް ޢަމަލުތަކެއް ކުރެއްވި ކަމުގެ ތުހުމަތު ކުރެވިފައެވެ. މީގެ ތެރޭގައި ހަނގުރާމައިގެ ތެރޭގައި ސޫރިޔާގެ ރައްޔިތުންނާ ދެކޮޅަށް ކެމިކަލް ހަތިޔާރު ބޭނުންކުރުމާއި، ކުރުދީންނަށް ބޮޑެތި އަނިޔާ ދިނުމާއި، މީހުން މަޖުބޫރުން ގެއްލުވާލުން ހިމެނެއެވެ.