ބައްޝާރު އަލް-އަސަދު ހުންނެވީ ރަޝިޔާ ގައި

ސޫރިޔާގެ ވެރިކަމުން ކުއްލި ގޮތަކަށް ވެއްޓުނު ބައްޝާރު އަލް-އަސަދު ހުންނެވީ ރަޝިޔާގައި ކަމަށް އިންޓަރފެކްސް ނިއުސް އޭޖެންސީން ބުނެފިއެވެ.

އަސަދުގެ ވެރިކަމުގެ މުހިންމު އެކުވެރިއެއް ކަމުގައިވާ ރަޝިޔާގެ ސަރުކާރުގެ މީޑިއާއިން އާދިއްތަ ދުވަހު ބުނެފައިވަނީ އޭނާ އާއި އޭނާގެ ޢާއިލާ މޮސްކޯއަށް ވަޑައިގެންފައިވާ ކަމަށާއި "އިންސާނިއްޔަތު ކަމުގެ ގޮތުން" ރަޝިޔާގެ ސިޔާސީ ހިމާޔަތް ލިބިވަޑައިގެންފައިވާ ކަމަށެވެ.

އޭނާ ފިއްލަވައިގެން ގައުމުން ބޭރަށް ވަޑައިގަތީ އާދިއްތަ ދުވަހު އިދިކޮޅު ހަނގުރާމަވެރިން ކުއްލި ގޮތަކަށް ވެރިރަށް ދިމިޝްގް އަށް އަށް އަރާ ވެރިރަށް ހިފުމާއެކުގައެވެ.

އިދިކޮޅު ފަރާތްތަކަށް ލިބުނު ކާމިޔާބާ ގުޅިގެން ހަނގުރާމަވެރިންގެ ލީޑަރު އަބޫ މުޙައްމަދު އަލް-ޖައުލާނީ ދިމިޝްގު ގެ މިސްކިތެއްގައި ވާހަކަ ދައްކަމުން ބުނެފައިވަނީ "މި ކާމިޔާބީއަކީ ސޫރިޔާގެ ހުރިހާ ރައްޔިތުންނަށް ލިބުނު ކާމިޔާބީއެއް" ކަމަށެވެ.

ވެރި ރަށުގައި ކާފިޔު ހިންގާފައިވަނިކޮށް ސަރުކާރު ވެއްޓުނު ފަހުން އާދީއްތަ ދުވަހުގެ ރޭ ދިމިޝްގު ގައި ގޮވުންތަކެއްގެ އަ އަޑުތަކެއް އިވިފައިވެއެވެ. ބައެއް ރިޕޯޓުތަކުގައި ބުނެފައިވަނީ އާދިއްތަ ދުވަހުގެ ރޭ އިސްރާއީލުން ދިމިޝްގުގައި ހުރި މުހިންމު ސެކިއުރިޓީ ކޮމްޕްލެކްސް އަކަށް ވައިގެ މަގުން ތިން ހަމަލާ ދީފައިވާ ކަމަށެވެ. އިޒްރޭލުން މިކަމާ ގުޅޭގޮތުން އެއްވެސް އެއްޗެއް ބުނެފައެއް ނުވެއެވެ.

އަސަދުގެ ވެރިކަން ވެއްޓުމާއެކު ދިމިޝްގް އަދި އަދި ސޫރިޔާގެ އެހެން ސަރަހައްދުތަކުގައި ގިނަ ބަޔަކު އަންނަނީ އުފާ ފާޅު ކުރަމުންނެވެ. އުފާފާޅު ކުރި ބައެއް މީހުން ބުނެފައިވަނީ މިހާރު އެމީހުންނަށް "ހަމަ ނޭވާ ލެވޭ" ކަމަށެވެ.

އަނެއްކޮޅުން ހަނގުރާމަވެރި ބާރުތަކުން ވަނީ ސަރުކާރުގެ ޖަލުތަކުން ބަންދުގައި ތިބި އެތައް ހާސް މީހުން ދޫކޮށްލާފައެވެ. 2011 އާއި 2018 އާ ދެމެދު މި ޖަލުތަކުގައި އެތައް ހާސް ބަޔަކު މަރައިލާފައިވާ ކަމަށް ނުވަތަ އަނިޔާގެ ސަބަބުންނާއި ބަނޑުހައި ހޫނު ކަމުގައި މަރުވެފައިވާ ކަމަށް ރިޕޯޓުތައް ބުނެއެވެ.

ސޫރިޔާގައި ހިނގަމުންދާ ކަންތައްތަކާ ބެހޭ ގޮތުން އެމެރިކާގެ ސްޓޭޓް ސެކްރެޓަރީ އެންތަނީ ބްލިންކެން ވިދާޅުވެފައިވަނީ އެ ޤައުމުން ސީރިއާގެ ކަންތައްތައް ގާތުން ބަލަމުންދާނެ ކަމަށާއި، ހަނގުރާމަވެރިންގެ ލީޑަރުން ވަޒަންކުރާނީ އެ މީހުންގެ ބަހަކުން ނޫން ކަމަށާއި އެ މީހުންގެ ޢަމަލުތަކުން ކަމަށެވެ.