ބައްޝާރު ކޮބާ؟ ވީ ތަނެއް ނޭނގޭ، އެންމެ ފަހުން ގުޅުނީ ހޮނިހިރު ދުވަހު: ބޮޑު ވަޒީރު
އިދިކޮޅު ހަނގުރާމަވެރިން ދިމިޝްގުގެ ބައިނަލް އަގްވާމީ ވައިގެ ބަނދަރު ކޮންޓްރޯލް ކުރުމުގެ ކުރިން، އޯޕަން-ސޯސް ފްލައިޓް ޓްރެކަރ ތަކުން ސޫރިޔާ އިން އުދުހުނު ކަމަށް އެންމެ މަތިންދާބޯޓެއް ރެކޯޑުކޮށްފައިވެއެވެ.
ދިމިޝްގުގައި ހުރި ބައްޝާރުގެ ބުދެއް އިދިކޮޅު ފަރާތްތަކުން ވައްޓާލާ އޭގެ މައްޗަށް އަރަ އުފާކުރަނީ
ބައްޝާރު އަލް-އަސަދު ވީތަނެއް އެނގިވަޑައި ނުގަންނަވާ ކަމަށް ސޫރިޔާގެ ބޮޑުވަޒީރު މުޙައްމަދު އަލް-ޖަލާލީ އާދިއްތަ ދުވަހު އަލް އަރަބިއްޔާއަށް ދެއްވި ބަސްދީގަތުމެއްގައި ވިދާޅުވެއްޖެއެވެ.
ބޮޑުވަޒީރު ވިދާޅުވި ގޮތުގައި އޭނާ އެންމެ ފަހުން އަލް-އަސަދާ ގުޅުއްވީ ހޮނިހިރު ދުވަހުގެ ހަވީރުގައެވެ. އަދި އަލް-އަސަދު މިހާރު ހުންނެވި ތަނެއްގެ މަޢުލޫމާތެއް އޭނާއަށް އެނގިވަޑައިނުގަންނަވާ ކަމަށް ވިދާޅުވިއެވެ.
ބައްޝާރުގެ ވެރިކަން ވެއްޓުނު ފަހުން އަލް-ޖަލާލީ ދެއްވި ބަސްދީގަތުމުގައި ވިދާޅުވި ގޮތުގައި އަލް-އަސަދާ އެކު އެންމެ ފަހުން ކުރެއްވި ފޯނު ކޯލުގައި ހިނގަމުންދާ ކަންކަމުގެ މަޢުލޫމާތު ދެންނެވިއެވެ. އަދި އަލް-އަސަދު ވިދާޅުވީ 'މާދަމާ ވާ ގޮތް ބަލަމާ ހިނގާށޭ' އެވެ.
އަދި އިދިކޮޅު ހަނގުރާމަވެރިން ދިމިޝްގުގެ ބައިނަލް އަގްވާމީ ވައިގެ ބަނދަރު ކޮންޓްރޯލް ކުރުމުގެ ކުރިން، އޯޕަން-ސޯސް ފްލައިޓް ޓްރެކަރ ތަކުން ސޫރިޔާ އިން އުދުހުނު ކަމަށް އެންމެ މަތިންދާބޯޓެއް ރެކޯޑުކޮށްފައިވެއެވެ. އިލްޔޫޝިން 76 މަރުކާގެ މަތިންދާބޯޓް، ފްލައިޓް ނަންބަރު ސީރިޔަން އެއަރ 9218 އަކީ ދިމިޝްޤުން ފުރި އެންމެ ފަހުގެ ފްލައިޓެވެ. ފުރަތަމަ އެބޯޓު އުދުހުނީ އިރުމަތި ފަރާތަށެވެ. ދެން އުތުރަށް އެނބުރުނެވެ. މިނެޓުތަކެއްގެ ފަހުން، ހުމްސް ގެ މަތީގައި ބުރުޖަހަމުން ދަނިކޮށް ބޯޓުގެ ސިގްނަލް ގެއްލުނެވެ.
އެއްވެސް ފަރާތަކުން ބައްޝާރު އާ ބެހޭ އެއްވެސް މައުލޫމާތެއް މިހާތަނަށް ހާމަ ކޮށްފައެއް ނުވެއެވެ.
އަނެއްކޮޅުން އަސަދު ވަޑައިގަތީ ޔުނައިޓެޑް އަރަބް އެމިރޭޓްސް (ޔޫއޭއީ) އަށް ކަމަށް ވާހަކަ ދެކެވޭތީ އެ ގައުމުގެ ރައީސްގެ ސިޔާސީ މުޝީރު ވިދާޅުވީ އަސަދު ޔޫއޭއީގައި ހުންނެވިކަން ޔަޤީންނުވާ ކަމަށެވެ.
ބަޙްރައިންގައި ބޭއްވުނު މަނާމާ ޑައިލޮގްގައި ނޫސްވެރިންނާ ވާހަކަދައްކަވަމުން، އަންވަރު ގަރުގާޝް ވިދާޅުވީ އަސަދު ޔޫއޭއީގައި ހިމާޔަތް ހޯދަފާނެ ކަމަށް ދެކެވޭ ވާހަކަތަކާ ގުޅޭގޮތުން އެއްވެސް ކޮމެންޓެއް ނުކުރައްވާނެ ކަމަށެވެ.
