ވެރިކަން ވެއްޓުނު ފަހުން އަސަދުގެ ފުރަތަމަ ބަޔާން - ފިއްލަވައިގެން ވަޑައިގެންނެވި ގޮތާއި ސަބަބު ހާމަ ކުރައްވައިފި

ހޯމަ ދުވަހު ސޫރިޔާގެ ރިޔާސީ ޓެލެގްރާމް ޗެނަލްގައި ޝާއިޢުކޮށްފައިވާ އަލް-އަސަދު ލިޔުއްވި ކަމަށް ބުނާ ބަޔާނެއްގައި، ކުރީގެ ރައީސް ސީރިޔާ އިން ފިއްލަވައިގެން ވަޑައިގެންނެވި ގޮތާއި ސަބަބު ހާމަ ކުރައްވައިފިއެވެ.

"އެންމެ ފުރަތަމަ، އަޅުގަނޑު ސޫރިޔާ އިން ފުރައިގެން ދިއުމަކީ ރޭވިގެން ހިނގި ކަމެއް ނޫން، އަދި ބައެއް މީހުން ބުނާ ގޮތަށް ހަނގުރާމައިގެ އެންމެ ފަހު ވަގުތު ހިނގި ކަމެއްވެސް ނޫން،" ބަޔާނުގައި ބުނެފައިވެއެވެ.

"އޭގެ ބަދަލުގައި، އަޅުގަނޑު ދިމިޝްޤުގައި ހުރެ، 2024 ވަނަ އަހަރުގެ ޑިސެމްބަރު 8 ވަނަ ދުވަހުގެ އާދީއްތަ ދުވަހުގެ ފަތިހުގެ ވަގުތުތަކާ ހަމައަށް ޒިންމާތައް އަދާކުރަމުން ގެންދިޔައީމެވެ."

ބަޔާނުގައި އިތުރަށް ބުނެފައިވަނީ، "ޓެރަރިސްޓް" އިން ކަމަށް އަލް-އަސަދު ސިފަކުރައްވަމުން ގެންދެވި އިދިކޮޅު ހަނގުރާމަވެރިން ވެރި ރަށަށް އެރުމުން، ހަނގުރާމައިގެ ކަންކަން ބެލެހެއްޓުމަށްޓަކައި ލާޒިކިއްޔާ ގައި ހުންނަ ރަޝިޔާގެ އަސްކަރީ މަރުކަޒަކަށް އޭނާ ބަދަލުވެވަޑައިގަތް ކަމަށެވެ.

އެ ބަޔާނުގައި ބުނެފައިވާ ގޮތުގައި، ހަތިޔާރުއެޅި އިދިކޮޅު ފަރާތްތަކުން އެ މަރުކަޒަށް ވެސް ޑްރޯން ހަމަލާތައް ވަނީ ދީފައެވެ.

"މަރުކަޒުން ނުކުމެގެން ދެވޭނެ އެއްވެސް ގޮތެއް ނެތުމާއެކު، މޮސްކޯ އިން އެންގީ ޑިސެމްބަރު 8 ވީ އާދީއްތަ ދުވަހުގެ ރޭ ވަގުތުން ރަޝިޔާއަށް ގެންދިއުމަށް މަރުކަޒުގެ ކޮމާންޑުން އިންތިޒާމު ކޮށްދިނުމަށެވެ." ބަޔާނުގައި ބުނެފައިވެއެވެ.

"މިކަން ހިނގީ އެންމެ ފަހުން ހަރަކާތްތެރިވަމުން އައި އަސްކަރީ މަޤާމުތައް ފެއިލް ވެ، އޭގެ ސަބަބުން ދައުލަތުގެ މުއައްސަސާ ތަކަށް މަސައްކަތް ނުކުރެވޭ ހާލަތަށް ދިޔުމާ އެކު ދިމިޝްގު ހަނގުރާމަވެރިންގެ ބާރުގެ ދަށަށް ގެންދިޔަ ދުވަހުގެ އަނެއް ދުވަހު."

ރަޝިޔާއިން އަލް-އަސަދު އާއި އޭނާގެ އާއިލާ އަށް ހިމާޔަތް ދިން ފަހުން އޭނާ މީޑިއާ އިން އެއްވެސް ވަރަކަށް ފެނިފައި ނުވާކަން ފާހަގަ ކުރެވެއެވެ.

އަސަދުގެ ވެރިކަން ވެއްޓުނީ ހަޔަތު ތަޙްރީރު އައް-ޝާމް (އެޗްޓީއެސް) އިން އިސްވެ އޮވެ އިދިކޮޅު ބާރުތަކުން ނޮވެމްބަރު މަހު ފަހުކޮޅު ކުއްލި ހަމަލާތަކެއް ދޭން ފަށާ އިދްލިބު ޕްރޮވިންސުން ފެށިގެން ސިޓީ އަކަށް ފަހު ސިޓީއެއް ހިފަމުން ގެންދިއުމުގެ ތެރެއިންނެވެ. އިދިކޮޅު ފަރާތްތަކުން ދިން ހަމަލާތަކަށް ސަރުކާރުގެ ބާރުތަކުން މާބޮޑު ދެކޮޅުވެރިކަމެއް ދައްކާފައި ނުވާކަން ފާހަގަ ކުރެވެއެވެ.

އިދިކޮޅު ބާރުތަކުން ޑިސެމްބަރު 8 ވަނަ ދުވަހުގެ ފަތިހުގެ ވަގުތުތަކުގައި ދިމިޝްޤަށް ވަދެ، ސޫރިޔާގައި އޮތް އަލް-އަސަދު ޢާއިލާގެ 50 އަހަރަށް ވުރެ ދިގުލައިގެން ދިޔަ އަނިޔާވެރި ވެރިކަން ނިމުމަކަށް އައިސްފައިވާކަން އިޢުލާނު ކުރިއެވެ.

ބައްޝާރު އަލް-އަސަދުގެ ވެރިކަން ފެށުނީ 2000 ވަނަ އަހަރު އޭނާގެ ބައްޕަ ހާފިޒު އަވަހާރަ ވުމާ ގުޅިގެންނެވެ.

"ދައުލަތް ޓެރަރިޒަމްގެ އަތްމައްޗަށް ވެއްޓި، މާނަހުރި ދައުރެއް އަދާކުރުމުގެ ޤާބިލުކަން ގެއްލުމުން، ކޮންމެ މަޤާމެއް ވެސް ބޭނުމެއް ނެތް އެއްޗަކަށް ވެ، އެ މަޤާމެއްގައި ހުރުމަކީ މާނައެއް ނެތް ކަމަކަށް ވެގެންދެއެވެ." އަސަދުގެ ބަޔާނުގައި އޭނާ ގައުމު ދޫކުރައްވާ ވަޑައިގެންނެވި ސަބަބު ހާމަ ކުރައްވަމުން ވިދާޅުވެފައިވެއެވެ.