އިޒްރޭލުން ސޫރިޔާގެ އަސްކަރިއްޔާގެ ކަނޑުމަތީ ވަސީލަތްތަކަށް ބޮން އަޅައިފި

އަސަދުގެ ވެރިކަން ވެއްޓުމާއެކު ސޫރިޔާގެ އަސްކަރީ ވަސީލަތްތައް ނައްތާލުމަށް އިސްރާއީލުން ދެމުންދާ ހަމަލާތަކުގެ ތެރެއިން، އެ ގައުމުގެ ކަނޑުމަތީގެ އަސްކަރީ ވަސީލަތްތަކަށް ބޮން އަޅާ ބޮޑެތި ގެއްލުންތަކެއް ދީފިއެވެ.

އެ ހަމަލާތައް ދިން ކަމަށް އިސްރާއީލުން ވެސް އެއްބަސްވެފައެވެ.

އިސްރާއީލު ޑިފެންސް ފޯސަސް (އައިޑީއެފް) އިން ނެރުނު ބަޔާނެއްގައި ބުނެފައިވަނީ ހޯމަ ދުވަހުގެ ރޭ އެމީހުންގެ ހަނގުރާމަމަތީ ބޯޓުތަކުން އަލް-ބައިދާ އަދި ލަޒާކިއާގެ ބަނދަރުތަކަށް ހަމަލާދީފައިވާ ކަމަށެވެ. ހަމަލާ ދިން އިރު މި ބަނދަރުތަކުގައި 15 އުޅަނދު އޮތެވެ.

ލަޒާކިއާ ބަނދަރުގައި ހިނގި ގޮވުންތައް ދައްކުވައިދޭ ވީޑިއޯތަކެއް ސޯޝަލް މީޑިއާގައިވެސް ވަނީ އާންމުވެފައެވެ. މި ފުޓޭޖްތަކުން އުޅަނދުތަކަށާއި ބަނދަރުގެ ބައެއް ސަރަޙައްދުތަކަށް ލިބުނު ބޮޑެތި ގެއްލުންތައް ފެންނަން ހުއްޓެވެ.

އައިޑީއެފްއިން އިތުރަށް ބުނެފައިވަނީ އެމީހުންގެ ހަނގުރާމަމަތީ މަތިންދާބޯޓުތަކުން ސޫރިޔާގެ އެކި ސަރަޙައްދުތަކުގައި ހުރި އަމާޒުތަކަށް 350 އަށްވުރެ ގިނަ ވައިގެ ހަމަލާ ދީފައިވާ ކަމަށާއި، އަދި ސޫރިޔާ އާއި އިސްރާއީލުން ހިފާފައިވާ ގޯލާން ހައިޓްސް އާ ދެމެދު އޮންނަ ހަތިޔާރު ގެންގުޅުން މަނާ ސަރަޙައްދަށް އިސްރާއީލުގެ އެއްގަމު ބާރުތައް ވަދެފައިވާ ކަމަށެވެ.

އިނގިރޭސިވިލާތުގައި މައި އޮފީސް ހުންނަ ސިރިއަން އޮބްޒަވޭޓަރީ ފޮރ ހިއުމަން ރައިޓްސް (އެސްއޯއެޗްއާރު) އިން މީގެ ކުރިން، ބުނެފައިވަނީ އާދިއްތަ ދުވަހު ސޫރިޔާގެ ސަރުކާރު ހަތިޔާރު އެޅި ޖަމާއަތްތަކުން ވައްޓާލިފަހުން އައިޑީއެފްއިން 310 އަށް ވުރެ ގިނަ ހަމަލާ ދީފައިވާކަން ލިޔެކިޔުމުން ފެންނަން ހުރި ކަމަށެވެ.

އިސްރާއީލުގެ ދިފާއީ ވަޒީރު އިސްރާއީލް ކަޓްޒް ނެރުއްވި ބަޔާނެއްގައި ބުނެފައިވަނީ ސޫރިޔާ އަށް ދޭ ހަމަލާތަކުގައި އައިޑީއެފް ގެ މަޤްޞަދަކީ "އިސްރާއީލަށް ނުރައްކާވާ ފަދަ ސްޓްރެޓެޖިކް ޤާބިލުކަން ނައްތާލުން" ކަމަށެވެ.

އޭނާ އިތުރަށް ވިދާޅުވީ ސޫރިޔާގެ ކަނޑުގެ ބާރުތައް ނައްތާލުމުގެ އޮޕަރޭޝަން "ވަރަށް ބޮޑު ކާމިޔާބީއަކަށް" ވި ކަމުގައެވެ.

އައިޑީއެފްއިން ބުނެފައިވަނީ ސޫރިޔާގެ ވެރިރަށް ދިމިޝްގުގެ އިތުރުން ހުމްސް، ޠަރަޠޫސް އަދި ޕަލްމީރާގައި ހުރި ތަފާތު އެތައް އަމާޒުތަކަކަށް ހަމަލާދީފައިވާ ކަމަށެވެ. މީގެ ތެރޭގައި ވައިގެ ބަނދަރުތަކާއި، އަސްކަރީ އުޅަނދުތަކާއި، މަތިންދާބޯޓު ތަކާއި، ހަތިޔާރު އުފައްދާ ތަންތަން ހިމެނެއެވެ.