އިނގިރޭސި ޕްރިމިއާ ލީގުގައި ނޮޓިންހަމް ފޮރެސްޓާ ދެކޮޅަށް ކުޅުނު މެޗުން މޮޅުވެ، ހަތް މެޗަށްފަހު ޗެމްޕިއަން މެންޗެސްޓަރ ސިޓީ މޮޅުވެއްޖެ އެވެ.

ސިޓީގެ އަމިއްލަ ދަނޑުގައި ބުދަ ދުވަހުގެ ރޭ ކުޅުނު މެޗު އެ ޓީމުން ކާމިޔާބު ކުރީ 3-0 އިންނެވެ. މެޗުގެ ފުރަތަމަ ހާފުގައި ސިޓީން ވަނީ ދެ ލަނޑު ޖަހައި ލީޑު ހޯދައިފަ އެވެ. އަދި ފަހު ހާފުގައި އެ ޓީމުން ވަނީ ތިން ވަނަ ލަނޑެއް ވެސް ޖަހައިފަ އެވެ.

މެޗު ފަށައިގެން އަށް ވަނަ މިނެޓުގައި ސިޓީ އަށް ކުރި ހޯދައިދިނީ ބެނާޑޯ ސިލްވާ އެވެ. އޭނާ އެ ލަނޑު ޖަހަން ފުރުސަތު ތަނަވަސްކޮށްދިނީ ބެލްޖިއަމްގެ މިޑްފީލްޑަރު ކެވިން ޑި ބްރޭނާ އެވެ. އޭގެ ފަހުން މެޗުގެ 31 ވަނަ މިނެޓުގައި ޑި ބްރޭނާ ވަނީ ސިޓީގެ ދެ ވަނަ ލަނޑު ޖަހައިފަ އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ ޖެރެމީ ޑޮކޫ އެވެ. މެޗުގައި ސިޓީގެ ތިން ވަނަ ލަނޑު، ދެ ވަނަ ހާފުގައި ޖެހީ ޑޮކޫ އެވެ. ދެ ވަނަ ހާފު ފަށައިގެން 12 ވަނަ މިނެޓުގައި އޭނާ އެ ލަނޑު ޖެހީ އާލިން ހާލަންޑު ތަނަވަސްކޮށްދިން ފުރުސަތެއްގަ އެވެ.

މޮޅާއެކު ސިޓީ އޮތީ ލީގު ތާވަލްގެ ހަތަރު ވަނަ މަގާމުގަ އެވެ. އެއީ މިހާތަނަށް އެ ޓީމު ކުޅެފައިވާ 14 މެޗުން 26 ޕޮއިންޓާ އެކު އެވެ. ފޮރެސްޓު މެޗުގެ ކުރިން ލީގުގައި އެންމެ ފަހުން ސިޓީން ކުޅުނު ހަތަރު މެޗުން ވެސް އެ ޓީމު ވަނީ ބަލިވެފަ އެވެ. ކަރަބޯ ކަޕްގައި ސިޓީން ކުޅުނު މެޗުން ބަލިވީއިރު، ޔުއެފާ ޗެމްޕިއަންސް ލީގުގައި ކުޅުނު ދެ މެޗުގެ ތެރެއިން އެއްް މެޗުން ބަލިވެ، އަނެއް މެޗުން ވަނީ އެއްވަރުވެފަ އެވެ.