އެއްވެސް މީހަކު ވަޒީފާ އިން ވަކި ނުކުރާނެ ކަމުގެ ވައުދުވި މުއިއްޒުގެ ސަރުކާރުން ރައީސް އޮފީހުގައި ދިގު މުއްދަތަކަށް ޚިދުމަތްކުރަމުން ގެންދިޔަ ދެ އަންހެން މުވައްޒަފަކު، އެއްވެސް އިންޒާރެއް ނުދީ، ކުއްލިއަކަށް ވަޒީފާއިން ވަކިކޮށް ގެއަށް ފޮނުވާލައިފިއެވެ.

ރައީސް އޮފީހުގައި ދިގު މުއްދަތަކަށް ޚިދުމަތްކޮށްފައިވާ ދެ އަންހެން މުވައްޒަފުން ކުއްލިއަކަށް ވަޒީފާއިން ވަކިކުރުމާ ގުޅިގެން، އަންހެނުންގެ ޙައްޤުތައް "ބާރުވެރިކުރުވުމާއި" އަދި "ރައްކާތެރިކުރުމުގެ" ވަޢުދުތަކުގެ އިތުބާރު ގެއްލި، ފާޑުކިޔުންތަކާ މި ސަރުކާރަށް ވަނީ އަމާޒުވެފައެވެ.

ރާއްޖެއެމްވީއަށް މަޢުލޫމާތު ލިބިފައިވާ ގޮތުގައި، މި ދެ އަންހެން މުވައްޒަފުން ގެ ތެރެއިން އެކަކު 17 އަހަރު ރައީސް އޮފީހުގައި ޚިދުމަތް ކޮށްފައިވާއިރު، އަނެއް މުވައްޒަފުގެ ޚިދުމަތައް 18 އަހަރު ވަނީ ވެފައެވެ.

މައުލޫމާތު ލިބިފައިވާ ގޮތުގައި އެމީހުން ވަޒީފާ އިން ކަނޑާލާ ގެއަށް ފޮނުވާލި އިރު އެއްވެސް އިނާޔަތެއް ވެސް ދީފައެއް ނުވެއެވެ.

ރާއްޖެ އެމްވީއަށް ނަން ހާމަނުކުރުމުގެ ޝަރުތުގެ މަތިން ވާހަކަދެއްކި އެ ދެ މީހުންގެ ތެރެއިން އެކަކު ބުނިގޮތުގައި، ނޮވެމްބަރު 27 ވަނަ ދުވަހުގެ މެންދުރުފަހު ރައީސް އޮފީހުން އެ މީހުންނަށް އެނގީ އިސްތިއުފާ ދިނުމަށެވެ.

ކުއްލިއަކަށް ވަޒީފާ އިން ވަކިވާާން ޖެހޭ ސަބަބު ކަމާ ބެހޭ ޑިޕާޓްމަންޓުން ސާފު ކުރަން މަސައްކަތް ކުރި ނަމަވެސް އެކަންވެސް އޮޅުން ފިލުވައިދީފައި ނުވާ ކަމަށާއި ބުނިހާވެސް އެއްޗަކީ ރައީސް އޮފީހުން "މީހުން މަދުކުރުމަށް" ނިންމާފައިވާ ނިންމުމެއް ކަމަށް ބުނި ކަމަށެވެ.

މި ދެ އަންހެން މުވައްޒަފުންނަށް ވަޒީފާއިން ވަކިކުރުމުގެ ކުރިން އެއްވެސް ނަސޭހަތެއް ނުވަތަ އިންޒާރެއް ދީފައެއް ނުވެއެވެ.

ވަޒީފާއިން ވަކިވާން ޖެހޭ ގަބޫލު ކުރެވޭ ސަބަބެއް ދެއްކިފައި ނުވާތީ، އެ ދެ މުވައްޒަފުންވެސް އިސްތިއުފާ ދިނުމަށް އިންކާރު ކުރުމުން، އިސްތިއުފާ ދޭން އެންގިތާ ދެ ދުވަސް ފަހުން، ނޮވެމްބަރު 30 ވަނަ ދުވަހުގެ ރޭ، އެމީހުންނަށް ގެއަށް ލިބުނީ ވަޒީފާއިން ވަކިކުރިކަމުގެ ލިޔުން ކަމަށް މައުލޫމާތު ލިބިފައިވެއެވެ.

މިކަން މިހެން ހިނގުމާ ގުޅިގެން ކުރީގެ ރައީސް އަދި އެމްޑީޕީގެ އިސް އެޑްވައިޒަރ އިބްރާހިމް މުޙައްމަދު ސާލިޙުގެ އަނބިކަނބަލުން ފަޒްނާ އަޙްމަދު ފޭސްބުކްގައި ކުރެއްވި ޕޯސްޓެއް ގައި، މި ޚަބަރު އެނގިވަޑައިގަތުމުން ވަރަށް ބޮޑަށް ހައިރާންވެ ހިތާމަކުރައްވާ ކަމަށް ވިދާޅުވިއެވެ. ފަޒްނާ ވަނީ އެ މުވައްޒަފުން ކުރީގެ ރައީސް މައުމޫން ޢަބްދުލްޤައްޔޫމްގެ ވެރިކަމުން ފެށިގެން އެކި ސަރުކާރުތަކުގައި 17 އަހަރަށްވުރެ ގިނަ ދުވަހު ވަފާތެރިކަމާއެކު މަސައްކަތްކޮށްފައިވާ ކަން ވަނީ ފާހަގަ ކުރައްވާފައެވެ.

އެކަށީގެންވާ ސަބަބެއް ނުދައްކާ މުވައްޒަފުން ވަކިކުރުމަކީ އިތުބާރު ގެއްލޭ ކަމެއް ކަމަށާއި، ޚާއްޞަކޮށް މަސައްކަތުގެ މާޙައުލުގައި އަންހެނުންނަށް ނުރަނގަޅު މިސާލެއް ދައްކައިދޭ ކަމެއް ކަމަށް ފަޒްނާ ވިދާޅުވިއެވެ. މިފަދަ ޢަމަލުތަކަކީ ރާއްޖެއިން ކުރިއަރުވަން މަސައްކަތްކުރާ އަންހެނުން ބާރުވެރިކުރުވުމާއި ހަމަހަމަކަމުގެ އުސޫލުތަކާ ފުށުއަރާ ކަންކަން ކަމަށް ވިދާޅުވިއެވެ.

ކުރީގެ ޖެންޑަރ މިނިސްޓަރ ޢައިޝަތު މުޙައްމަދު ދީދީ ފާހަގަކުރެއްވި ގޮތުގައި މިފަދަ "ދެރަ" ގޮތަކަށް އެމީހުން ވަޒީފާއިން ވަކިކުރުމަކީ ސަރުކާރުގެ ސިޔާސަތުތަކުގެ ނުބައި ސިފަ ދައްކުވައިދޭ ކަމެކެވެ.

ރައީސް އޮފީހުގެ ގިނަ ދުވަސްވީ ދެ މުވައްޒަފުންނަށް ފޮނުވި ވަޒީފާއިން ވަކިކުރިކަމުގެ ލިޔުމުގައި އެމީހުން ވަޒީފާއިން ވަކިކުރި ސަބަބެއްގެ ގޮތުގައި ބަޔާންކޮށްފައިވަނީ ދިވެހިރާއްޖޭގެ ޤާނޫނުއަސާސީގެ 115 (ޅ) ވަނަ މާއްދާގެ ދަށުން ރައީސުލްޖުމްހޫރިއްޔާއަށް ލިބިދޭ ބާރުގެ ދަށުން ކަމަށެވެ.

ޤާނޫނުއަސާސީގެ 115 (ޅ) ވަނަ މާއްދާގައި ބަޔާންކޮށްފައިވަނީ "ޤާނޫނުއަސާސީއާއި ޤާނޫނުގައި ކަނޑައެޅިގެން ރައީސުލްޖުމްހޫރިއްޔާއަށް ލިބިދީފައިވާ ބާރުތަކާއި، މަސްއޫލިއްޔަތުތަކުގެ އިތުރުން، ޤާނޫނުއަސާސީގެ ދަށުން ރައީސުލްޖުމްހޫރިއްޔާ އަށް ލިބިދޭ ވަކި މަސްއޫލިއްޔަތުތަކެއް އަދާކުރުމަށްޓަކައި، ވަޒީރުންގެ މަޖިލީހުގެ މެންބަރުންނާއި، އޭނާގެ މަޤާމުގެ މަސްއޫލިއްޔަތު އަދާކުރުމަށް ބޭނުންވާ އެހެނިހެން އިސް މަޤާމުތަކަށް މީހުން ޢައްޔަންކުރުމާއި، ވަކިކުރުމާއި، އިސްތިޢުފާ ޤަބޫލުކުރުމުގެ ބާރު ލިބިގެންވެއެވެ" މިފަދައިންނެވެ.