ޣައްޒާގައި އަނެއްކާވެސް ލޭގެ ކޯރެއް – އިޒްރޭލުން އިމާރާތަކަށް ބޮން އަޅާ 40 މީހުން ޝަހީދުކޮށްފި
މެޑިކަލް މަޞްދަރުތަކުން ރިޕޯޓުކުރި ގޮތުގައި، ހޮނިހިރު ދުވަހުގެ ފަތިހުން ފެށިގެން ޣައްޒާގެ އެކި ސަރަޙައްދުތަކުގައި އިސްރާއީލުން ބޮންއެޅުމުގެ ސަބަބުން 100 ށް ވުރެ ގިނަ ފަލަސްޠީނު މީހުން ޝަހީދު ވެފައިވެއެވެ.
އިޒްރޭލުގެ ހަމަލާއެއްގައި ޝަހީދުވެފައިވާ މީހުންގެ ކައިރީގައި އާއިލާގެ މެންބަރުން ހިތާމައިގައި
އިސްރާއީލުގެ ބާރުތަކުން ހޮނިހިރު ދުވަހުގެ ރޭ އުތުރު ޣައްޒާގައި އަނެއްކާވެސް އާ ގަތުލުއާންމެއް ހިންގައިފިއެވެ.
މިފަހަރު އަމާޒުކޮށްފައިވަނީ ތާލް އަލް-ޒައާތަރު ސަރަޙައްދުގައި ހުރި އާއިލާތައް ދިރިއުޅޭ ރެސިޑެންޝަލް އިމާރާތަކަށެވެ. މި ހަމަލާގައި މަދުވެގެން 40 ފަލަސްޠީނު ރައްޔިތުން ޝަހީދުވެފައިވާއިރު، އޭގެތެރޭގައި އަންހެނުންނާއި ކުޑަކުދިން ހިމެނޭ ކަމަށް ވަފާ ނިއުސް އިން ބުނެފައިވެއެވެ. އަދި އެތައް ބަޔަކު އިމާރާތުގެ ދަށުވެފައިވެއެވެ.
ސަރަހައްދުގެ މަޞްދަރުތަކުން ވާފާއަށް މައުލޫމާތު ދިންގޮތުގައި އިސްރާއީލީ ފައިޓަރ ޖެޓްތަކުން އިމާރާތަށް ހަމަލާދީފައިވެއެވެ. މި އިމާރާތަކީ އަލް-އަރާޖް ޢާއިލާއަށް ނިސްބަތްވާ މީހުން ދިރިއުޅޭ އިމާރާތެއް ކަމަށާއި، އަދި މިހާރު މި އިމާރާތް ބޭނުންކުރަމުން އައީ ރިހާބިލިޓޭޓް ކުރެވިފައިވާ އާއިލާތައް ބޭތިއްބުމަށް ކަމަށް ބުނެފައިވެއެވެ. އެމަރޖެންސީ ރެސްޕޮންސް ޓީމްތައް ނެތުމާއި، އިމާރާތް ފުނޑުފުނޑު ވެފައިވާތީ، އިމާރާތުގެ ދަށުވެފައިވާ މީހުން ސަލާމަތްކުރުމަކީ ވަރަށް އުނދަގޫ ކަމަކަށް ވެފައިވެއެވެ.
މެޑިކަލް މަޞްދަރުތަކުން ރިޕޯޓުކުރި ގޮތުގައި، ހޮނިހިރު ދުވަހުގެ ފަތިހުން ފެށިގެން ޣައްޒާގެ އެކި ސަރަޙައްދުތަކުގައި އިސްރާއީލުން ބޮންއެޅުމުގެ ސަބަބުން 100 ށް ވުރެ ގިނަ ފަލަސްޠީނު މީހުން ޝަހީދު ވެފައިވެއެވެ. އަދި ހަމަ އެ މަސްދަރުތަކުން ފާހަގަކުރިގޮތުގައި، ވޭތުވެދިޔަ ދެ ދުވަހުގެ ތެރޭގައި އުތުރު ޣައްޒާގެ ޖަބާލިޔާ އަދި ބައިތު ލަހިޔާގައި އިސްރާއީލީ ބާރުތަކުން ބޮންއެޅި އިމާރާތްތަކުގެ ދަށުވެފައި އެތައް ބަޔަކު ވާނެ ކަމަށް ވަނީ ބެލެވިފައެވެ.
މީގެ އިތުރުން، އިސްރާއީލީ ބާރުތަކުން ބައިތު ލަހިޔާގައި ހުރި އެތައް ރެސިޑެންޝަލް އިމާރާތްތަކަކާއި ގެތަކެއް ވަނީ ގޮއްވާލާފައެވެ. މީގެ ކުރިން، ޣައްޒާ ސިޓީގެ ހުޅަނގު ފަރާތުގައި ހުންނަ އިޓަލިއަން ކޮމްޕްލެކްސް ކައިރީގައި ހުރި އަލް-ބަޠްރާން ޢާއިލާގެ ގެއަކަށް އިސްރާއީލީ ހަނގުރާމަ މަތިންދާބޯޓުތަކުން ބޮންއެޅުމުގެ ސަބަބުން ތިން ފަލަސްޠީނު މީހުން އިތުރު ބަޔަކަށް އަނިޔާވެފައިވެއެވެ.
ވައިގެ މަގުން ދިން އެހެން ހަމަލާއެއްގައި، ޣައްޒާގެ މެދުތެރޭގެ ނުސައިރާތު ރެފިއުޖީ ކޭމްޕުގައި ހުރި ގެއަކަށް އިސްރާއީލީ ޖެޓްތަކުން ހަމަލާދިނުމުގެ ސަބަބުން 6 ފަލަސްޠީނު މީހުން މަރުވެ، އެތައް ބަޔަކަށް އަނިޔާވެފައިވެއެވެ. އަދި ހަމައެއާއެކު، ދެކުނު ޣައްޒާގެ ޚާން ޔޫނިސްގެ ޤިޒާން އަލް-ނައްޖާރު ސަރަޙައްދުގައި ކާޑު ހޯދަން ކިއޫގައި ތިބި އާންމުންގެ ބަޔަކަށް އިސްރާއީލީ ބާރުތަކުން ބޮންއެޅުމުގެ ސަބަބުން 12 ފަލަސްޠީނު މީހުން މަރުވެ، އެތައް ބަޔަކަށް އަނިޔާވެފައިވެއެވެ.
2023 ވަނަ އަހަރުގެ އޮކްޓޯބަރު މަހުން ފެށިގެން ޣައްޒާގައި ހިނގަމުންދާ އިސްރާއީލީ އަނިޔާވެރިކަމުގެ ސަބަބުން މިހާތަނަށް މަދުވެގެން 44,363 ފަލަސްޠީނު މީހުން ޝަހީދުވެފައިވާކަން ރެކޯޑް ތަކުން އެނގެއެވެ. އަދި 105,070 ށް ވުރެ ގިނަ މީހުންނަށް އަނިޔާވެފައިވެއެވެ.
އދ. ގެ ސެކިއުރިޓީ ކައުންސިލުން ވަގުތުން ހަނގުރާމަ ހުއްޓާލުމަށް ގޮވާލުމާއި، އިންޓަރނޭޝަނަލް ކޯޓް އޮފް ޖަސްޓިސް އިން ގަތުލުއާންމު ހުއްޓުވުމަށާއި ޣައްޒާގެ ނާޒުކު އިންސާނީ ޙާލަތު ރަނގަޅުކުރުމަށް ފިޔަވަޅު އެޅުމަށް އަންގާފައިވީ ނަމަވެސް، އިސްރާއީލުން ހިންގާ ނަސްލު ނައްތާލުމުގެ ހަމަލާތައް ދަނީ މެދުނުކެނޑި ކުރިއަށެވެ.
