ޑޯޓްމަންޑު ކައިރިން ބަޔާން ސަލާމަތްކޮށްދިނީ މުސިއާލާ

ޖަރުމަނު ލީގުގައި ވާދަވެރި ބޮރޫޝިއާ ޑޯޓްމަންޑާ ދެކޮޅަށް ކުޅުނު މެޗުން ބަޔާން މިއުނިކް އެއްވަރުވެއްޖެ އެވެ.

ޑޯޓްމަންޑުގެ އަމިއްލަ ދަނޑުގައި ކުޅުނު މެޗު ނިމުނީ ދެ ޓީމު 1-1 އިން އެއްވަރުވެގެންނެވެ. މެޗުގައި ފުރަތަމަ ލަނޑު ޖަހައި ކުރި ހޯދީ ވެސް ޑޯޓްމަންޑުންނެވެ. ނަމަވެސް މެޗުގެ ދެ ވަނަ ހާފުގައި ލަނޑު ޖަހައިގެން ބަޔާން ވަނީ މެޗު އެއްވަރު ކޮށްފަ އެވެ.

މެޗުގެ ފުރަތަމަ ހާފުގެ 27 ވަނަ މިނެޓުގައި ޑޯޓްމަންޑަށް ލީޑު ނަގައިދިނީ ޖޭމީ ގިޓެން އެވެ. އޭގެ ފަހުން ވެސް މެޗުގައި ޑޯޓްމަންޑުން ވަނީ ލަނޑު ޖަހާނެ ފުރުސަތުތަކެއް ތަނަވަސްކޮށްފަ އެވެ. މެޗުގައި ބަޔާނުން ނަތީޖާ ހަމަހަމަ ކުރުމަށް ކުރި މަސައްކަތް ކާމިޔާބު ކުރެވުނީ ދެ ވަނަ ހާފުގަ އެވެ. މެޗުގެ ފަހު ދިހަ މިނެޓުގެ ތެރޭގައި ބަޔާނަށް ނަތީޖާ ހަމަހަމަ ކޮށްދިނީ ޖަރުމަނުގެ ޒުވާން ކުޅުންތެރިޔާ ޖަމާލް މުސިއާލާ އެވެ. އޭނާ އެ ލަނޑު ޖަހަން ފުރުސަތު ތަނަވަސްކޮށްދިނީ މިކޭލް އޮލައިސް އެވެ.

ނަތީޖާ އާއެކު ބަޔާން އެއް ވަނައިގައި އޮތީ މިހާތަނަށް ކުޅުނު 12 މެޗުން 30 ޕޮއިންޓާ އެކު އެވެ. މި ސީޒަންގެ ޖަރުމަނު ލީގުގައި ބަޔާން ވަނީ ނުވަ މެޗުން މޮޅުވެފަ އެވެ. ތިން މެޗުން އެއްވަރުވެފައިވާއިރު، އެއްވެސް މެޗަކުން އެ ޓީމު ބަލިވެފައެއް ނުވެ އެވެ.