ބަހަށް ދިން ހަމަލާއާއެކު ޑޯޓްމަންޑު ޗެމްޕިއަންސް ލީގުން ވަކިވަނީ!

މިދިޔަ އަންގާރަ ދުވަހުގެ ރޭ ޔުއެފާ ޗެމްޕިއަންސް ލީގުގެ ކުއާޓާ ފައިނަލްގައި ބްރޫޝިއާ ޑޯޓްމަންޑް އަދި އޭއެސް މޮނާކޯ ބައްދަލުކުރަން ހަމަޖެހިފައިވާ މެޗަށް ސްޓޭޑިއަމަށް ދިއުމަށް، ޑޯޓްމަންޑް ޓީމު ދަތުރުކުރަނިކޮށް، އެޓީމު ދަތުރުކުރި ބަހަށް އަމާޒުވި ހަމަލާއާއެކު، މުބާރާތުން ވަކިވުމަށް ވިސްނަމުން ދާކަމަށް އެ ކްލަބުގެ ސީއީއޯ ހެންޒް ޖޯކިމް ވިދާޅުވެއްޖެއެވެ.

ނޫސްވެރިންނަށް މައުލޫމާތު ދެއްވަމުން ޖޯކިމް ވިދާޅުވީ މުބާރާތް ދޫކޮށްލުމަށް އޭނާ ހުށަހަޅާ ކަމަށާއި، އެހެންނަމަވެސް އެ ނިންމުމާއެކު ހަމަލާދިން ފަރާތްތަކަށް ކާމިޔާބީ ލިބުނު ކަމަށް ދެކޭ ކަމަށެވެ. އެގޮތުން އެކަމަށް އަދި ވަކިގޮތެއް ނުނިންމާކަމަށްވެސް އޭނާ ވިދާޅުވިއެވެ.

ހަމަލާ އަމާޒުވިތާ 24 ގަޑިއިރު ތެރޭގައި އަލުން މެޗު ކުޅެން ޖެހުމުން ޔުއެފާއަށް ޑޯޓްމަންޑުގެ ކޯޗު ތޯމަސް ޓުޗެލްވެސް ވަނީ ފާޑުކިޔާފައެވެ. އެހެންނަމަވެސް އެ މެޗު 24 ގަޑިއިރުތެރޭގައި އަލުން ކުޅެން ނިންމީ ދެ ކްލަބުން އެއްބަސްވެގެންނެވެ.

ޑޯޓްމަންޑް އަދި މޮނާކޯ ބައްދަލުކުރި މެޗު ބުރާސްފަތި ދުވަހު ކުޅެފައިވާއިރު، އެ މެޗު 2-3 ގެ ނަތީޖާއަކުން ކާމިޔާބުކުރީ މޮނާކޯ އެވެ. މި މެޗު ކުޅެފައިވަނީ ޑޯޓްމަންޑްގެ ދަނޑުގައެވެ.

ޑޯޓްމަންޑް ދަތުރުކުރި ބަހަށް ދިން ހަމަލާއާއެކު އެންމެ ބޮޑަށް އަނިޔާވެފައިވަނީ އެޓީމުގެ ޑިފެންޑަރު މާކް ބާޓްރާ އަށެވެ. އެގޮތުން އޭނާގެ އަތަށް ޒަޚަމްތަކެއް ލިބިފައިވާއިރު، ކުޅުމުގެ ތެރެއަށް އެނބުރި އާދެވޭނީ ހަތަރު ހަފްތާތެރޭގައި ކަމަށް ރިޕޯޓްތައް ބުނެއެވެ.