ރައީސުލްޖުމްހޫރިއްޔާ ޑރ.މުހައްމަދު މުއިއްޒު މަސައްކަތް ކުރައްވަނީ ރައްޔިތުންނަށް ބިރު ދައްކައިގެން ވެރިކަން ކުރައްވަން ކަމަށް އެމްޑީޕީގެ ގަލޮޅު އުތުރު ދާއިރާގެ ރައީސް މާރިޔާ އަހުމަދު ދީދީ ވިދާޅުވެއްޖެ އެވެ.
ބުރާސްފަތި ދުވަހުގެ ރޭ ކުރިއަށް ގެންދިޔަ އެމްޑީޕީ ހަރުގެ ޖަލްސާގައި މާރިޔާ ވިދާޅުވީ ރައީސް މުއިއްޒު ވެރިކަމަށް ވަޑައިގަންނަވާ މަސްވެރިކަމުގެ ސިނާއަތް މިހާރު ފުޑާލާފައިވާ ކަމަށާއި، މިހާރު މަސައްކަތް ކުރަމުންދަނީ ރާއްޖެއަށް ރަންބިސް އަޅާ ކުކުޅު، ފަތުރުވެރިކަމުގެ ސިނާއަތް ފުޑާލުމަށް ކަމަށެވެ.
ރައްޔިތުންގެ ހާލަތަށް އިޝާރާތް ކުރައްވައި މާރިޔާ ވިދާޅުވީ މިސަރުކާރަށް އެއްއަހަރު ވެގެންދިޔައިރު، ނުއަގުގައި ދެ ޑްރޯނެއް ގަތުން ފިޔަވައި އިތުރު ކަމެއް ކޮށްފައިނުވާ ކަމަށާއި، ރައްޔިތުންނަށް ފައިދާވާ އެއްވެސް ކަމެއް ކުރެވިފައިނުވާ ކަމަށެވެ. މުޅި ރާއްޖެ ފަގީރުވާނެ ގޮތަށް މިސަރުކާރުން މަސައްކަތް ކުރަމުންދާ ކަމަށެވެ.
އެގޮތުން ހުރިހާ އެއްޗެއް އަގު ބޮޑު ކޮށްފައިވާ ކަމަށާއި، މުދާ ނުލިބި ވިޔަފާރިތައް ބަގުރޫޓުވަމުންދާ ކަމަށް އޭނާ ވިދާޅުވިއެވެ. ޚިދުމަތްތައް ވެސް އަގު ބޮޑުކޮށްފައިވާ ކަމަށާއި، ކަރަންޓު ބިލާއި، ފެން ބިލު ވެސް ބޮޑުކޮށް، ރައްޔިތުންނަށް ލިބިފައިވާ ބޯހިޔާވަހިކަން ވެސް ނުދީ ހިފައްޓައި، ރައްޔިތުން ބިކަ ކުރުމަށް މަސައްކަތް ކުރަމުންދާ ކަމަށް މާރިޔާ ވިދާޅުވިއެވެ.
ރައީސް މުއިއްޒު ބޭނުންފުޅުވާ ގޮތަކަށް ވެރިކަން ކުރުމަށް ރައްޔިތުންނަށް މިސަރުކާރުން ދަތިކުރަމުންދާކަން ފާހަގަކުރައްވައި މާރިޔާ ވިދާޅުވީ ރައްޔިތުންނަށް ބިރު ދެއްކުމަށް ވެސް މަސައްކަތް ކުރާ ކަމަށާއި، ރައްޔިތުންގެ ބާރު ކެނޑޭ ގޮތަށް ގާނޫނު އަސާސީއަށް ބޮޑެތި ބަދަލުތައް ގެންނަމުންދަނީ އެ އުސޫލުން ވެރިކަން ކުރުމަށް ކަމަށެވެ.
ރައީސް މުއިއްޒުގެ ވެރިކަމަށް އެއް އަހަރާއި 11 ދުވަސް ވީއިރު އަޅުގަނޑުމެން އެންމެނަށް މި އިވެނީ ރައްޖޭގެ އަޑުތައް އަޑު ގަދަވަމުންދާތަން. ވެރިކަމަށް ވަޑައިގެންނެވީ މަސްވެރިންނަށް އެމީހުންގެ ހައްގު ލާރި 48 ގަޑިއިރު ދެއްވޭނެ ކަމަށް ވިދާޅުވެ. މަސްވެރިންގެ އިހުސާސްތައް އަޑު އަހާ ގޮތެއް ނުވި. މަސްވެރިކަމަކީ އަޅުގަނޑުމެންގެ ދިވެހިންގެ ލޭނާރޭ ކިޔަމުންދިޔައީ. އެ ސިނާއަތު އެދަނީ ފުޑަމުން. ދެން އޮތީ ރަންބިސް އަޅާ ކުކުޅު. ފިއު ރިޗްސް މެން. ފިއު ރިޗްސް ބޯއީސް ނުކުމެ ވަޑައިގެން ވިދާޅުވީ އެ ސިނާއަތް މިހިސާބަށް ގެނެސްދެއްވި ހުރިހާ ބޭފުޅުންނަށް ގޮން ޖައްސަވައި ދައްކަންށޭ ޖެހޭނީ. ގާނޫނެއްގެ ގެނެސްގެން ވިޔަސް ދައްކާށޭ ޖެހޭނީ. ގޮން ޖައްސަވަމުން އެ ވަޑައިގަންނަވާނީ. ނުހެދި ހުރި 64 އެތައް ރިސޯޓެއް މިރާއްޖޭގައި އެބައޮތް. އެކަމަކު ގާނޫނީ އިމުގެ ތެރެއިން އެ ނުހެދި އޮތްއިރު އެތަންތަނާމެދު ގޮތެއް ނުނިންމިގެން އުޅޭއިރު، ހެދިފައި އޮތް ރިސޯޓުތައް އެސިނާއަތު ފުޑާ ލުމަށް އެގޮތަށް އެބަސް މޮށުންތެރިކަން ބައްޓަން ކުރައްވައިގެން އެއުޅުއްވަނީ. މިކަމުގަ މުޅި ރާއްޖެއަށް ގެއްލުންވާނެއެމްޑީޕީގެ ގަލޮޅު އުތުރު ދާއިރާގެ ރައީސް މާރިޔާ އަހުމަދު ދީދީ
މާރިޔާ ވިދާޅުވީ މިސަރުކާރުގައި ގައުމު ގެންގޮސްފައިވާ ހިސާބުން ހުއްޓިތިބެގެން ނެތް ކަމަށެވެ. އެހެންކަމުން ރައްޔިތުން މިއަދު ނުކުމެ ސަރުކާރު ޖަވާބުދާރީ ކުރުވަންޖެހޭ ކަމަށް މާރިޔާ ވިދާޅުވިއެވެ.
