އަމޯރިމް އިރުޝާދު ދިން ފުރަތަމަ މެޗު ޔުނައިޓެޑުން ނިންމާލަން ޖެހުނީ ޕޮއިންޓަކުން

އިނގިރޭސި ޕްރިމިއާ ލީގުގައި އިޕްސްވިޗް ޓައުންއާ ދެކޮޅަށް ކުޅުނު މެޗުން މެންޗެސްޓަރ ޔުނައިޓެޑު އެއްވަރުވެއްޖެ އެވެ.

އިޕްސްވިޗް ޓައުންގެ އަމިއްލަ ދަނޑު ޕޯޓްމެން ރޯޑުގައި ކުޅުނު މެޗު ނިމުނީ ދެ ޓީމު 1-1ން އެއްވަރުވެގެންނެވެ. މެޗުގައި އެންމެ ފުރަތަމަ ލަނޑު ޖަހައި ކުރި ހޯދީ ވެސް ޔުނައިޓެޑުންނެވެ. ނަމަވެސް އިޕްސްވިޗް ޓައުން އިން ވަނީ ފަހަތުން އަރައި ލަނޑު ޖަހައި ނަތީޖާ ހަމަހަމަ ކޮށްފަ އެވެ.

މިއީ ދާދި ފަހުން ޔުނައިޓެޑުގެ ކޯޗުކަމާ ހަވާލުވި ޕޯޗުގަލްގެ ރުބެން އަމޯރިމްގެ އިރުޝާދުގެ ދަށުން އެ ޓީމު ކުޅުނު ފުރަތަމަ މެޗެވެ. ޔުނައިޓެޑުގެ ނަތީޖާ އިންތިހާ އަށް ދަށްވުމުގެ ސަބަބުން އެ ޓީމުގެ ކޯޗަކަށް ހުރި ނެދަލެންޑްސްގެ އެރިކް ޓެން ހާގް މަގާމުން ވަކި ކުރުމަށްފަހު، އެ މަގާމަށް އަމޯރިމް ހަމަޖެއްސީ ވެސް ޔުނައިޓެޑުގެ ނަތީޖާތައް ރަނގަޅު ކުރުމަށެވެ.

މެޗު ފަށައިގެން ދެ ވަނަ މިނެޓުގައި ޔުނައިޓެޑުން ވަނީ ލަނޑު ޖަހައި ލީޑު ނަގައިފަ އެވެ. އަމަދު ޑިއާލޯ ތަނަވަސްކޮށްދިން ފުރުސަތެއްގައި ޔުނައިޓެޑަށް ލީޑު ނަގައިދިނީ މާކަސް ރަޝްފޯޑު އެވެ. ނަމަވެސް މެޗުގެ ފުރަތަމަ ހާފުގެ ފުރިހަމަ ވަގުތު ހަމަވާން ދެ މިނެޓަށް ވެފައި ވަނިކޮށް، އިޕްސްވިޗް ޓައުން އިން ވަނީ ލަނޑު ޖަހައި ނަތީޖާ ހަމަހަމަ ކޮށްފަ އެވެ. ވެސް ބާންސް ތަނަވަސްކޮށްދިން ފުރުސަތެއްގައި އެ ލަނޑު އެ ޓީމަށް ޖަހައިދިނީ އޮމާރު ހަޗިންސަން އެވެ.

މެޗު އެއްވަރުވެ ލިބުނު އެއް ޕޮއިންޓާއެކު ޔުނައިޓެޑު އޮތީ ލީގު ތާވަލްގެ 12 ވަނަ މަގާމުގަ އެވެ. އެއީ މިހާތަނަށް ކުޅުނު 12 މެޗުން 16 ޕޮއިންޓާ އެކު އެވެ. ހަތަރު މެޗުން ޔުނައިޓެޑު މޮޅުވެފައިވާއިރު، ހަތަރު މެޗުން ބަލިވެ އަދި ހަތަރު މެޗުން ވަނީ ބަލިވެފަ އެވެ. އަމޯރިމްގެ އިރުޝާދުގެ ދަށުން މި މަހުގެ 29 ވަނަ ދުވަހު ޔުނައިޓެޑު ނިކުންނާނީ ޔޫރޮޕާ ލީގުގެ މެޗަށެވެ. އޭގެ ފަހުން ޑިސެމްބަރު މަހުގެ އެއް ވަނަ ދުވަހު ޕްރިމިއާ ލީގުގައި ނިކުންނާނީ އެވަންޓަންއާ ދެކޮޅަށެވެ.