އާރސެނަލް އިން ފޮރެސްޓް ބަލިކޮށްފި

އިނގިރޭސި ޕްރިމިއަރ ލީގުގައި ނޮޓިންހަމް ފޮރެސްޓް އާއި ދެކޮޅަށް ކުޅުނު މެޗުން މޮޅުވެ، އާރސެނަލް އިން ހަމަޖެހުމެއް ހޯދައިފި އެވެ.

އާރސެނަލްގެ އަމިއްލަ ދަނޑުގައި ހޮނިހިރު ދުވަހުގެ ރޭ ކުޅުނު މެޗުގައި އެ ޓީމުން ވަނީ 3-0 އިން ފޮރެސްޓް ގެ މައްޗަށް ކުރި ހޯދައިފަ އެވެ. މެޗުގެ ފުރަތަމަ ހާފުގައި ވެސް އާރސެނަލް އިން ވަނީ އެއް ލަނޑު ޖަހައިފަ އެވެ. އަދި ދެ ވަަނަ ހާފުގައި އެ ޓީމުން ވަނީ އިތުރު ދެ ލަނޑު ޖަހައިފަ އެވެ.

މެޗުގެ ފުރަތަމަ ހާފުގެ 15 ވަނަ މިނެޓުގައި އާރސެނަލަށް ލީޑު ނަގައިދިނީ ބުކަޔޯ ސަކާ އެވެ. އޭނާ އެ ލަނޑު ޖަހަން ފުރުސަތު ތަނަވަސްކޮށްދިނީ މާޓިން އޮޑެގާޑް އެވެ. އޭގެ ފަހުން މެޗުގެ ފުރަތަމަ ހާފުގައި އާރސެނަލަށް ވަނީ އިތުރު ލަނޑު ޖަހާނެ ފުރުސަތު ވެސް ލިބިފަ އެވެ. މެޗުގެ ދެ ވަނަ ހާފު ފަށައިގެން ހަތް ވަނަ މިނެޓުގައި އާރސެނަލްގެ ދެ ވަނަ ލަނޑު ޖެހީ ތޯމަސް ޕާޓޭ އެވެ. އޭނާ އެ ލަނޑު ޖެހީ ސަކާ ތަނަވަސްކޮށްދިން ފުރުސަތެއްްގަ އެވެ. މެޗުގައި ޕާޓޭ ކުޅެން ނިކުތީ ވެސް ބަދަލު ކުޅުންތެރިޔެއްގެ ގޮތުގަ އެވެ. އޭގެ ފަހުން މެޗުގެ 86 ވަނަ މިނެޓުގައި އާރސެނަލްގެ ތިން ވަނަ ލަނޑު ޖެހީ އީތަން އެންވަނޭރީ އެވެ. އެއީ ރަހީމް ސްޓާލިން ތަނަވަސްކޮށްދިން ފުރުސަތެއްގަ އެވެ، މެޗުގައި އެންވަނޭރީ ވެސް ކުޅެން ނިކުތީ ބަދަލު ކުޅުންތެރިޔެއްގެ ގޮތުގަ އެވެ.

މޮޅާއެކު އާރސެނަލް އޮތީ ލީގު ތާވަލްގެ ހަތަރު ވަނައިގަ އެވެ. އެއީ މިހާތަނަށް ކުޅުނު 12 މެޗުން 22 ޕޮއިންޓާ އެކު އެވެ. އާރސެނަލް ފަހަތަށް ޖައްސާލުމަށްފަހު ތިން ވަނައިގައި ޗެލްސީ 22 ޕޮއިންޓާ އެކު އޮތްއިރު، ލަނޑުގެ ގޮތުން އެ ޓީމު ކުރި ހޯދަނީ އެވެ. ބައިނަލްއަޤުވާމީ ބްރޭކުގެ ކުރިން އެންމެ ފަހުން ލީގުގައި ޗެލްސީއާ ދެކޮޅަށް އާރސެނަލް ކުޅުނު މެޗު ނިމުނީ ދެ ޓީމު އެއްވަރުވެގެންނެވެ.