މެންޗެސްޓަރ ސިޓީ އަށް އިރުޝާދު ދެމުން އަންނަ ސްޕެއިންގެ ޕެޕް ގާޑިއޯލާ، އެ ކުލަބާ އެކު ސޮއި ކޮށްފައިވާ އެއްބަސްވުން އައު ކުރަން ނިންމައިފި އެވެ.

އެންމެ ފަހުން ސިޓީ އާއެކު ގާޑިއޯލާ ސޮއި ކޮށްފައިވާ އެއްބަސްވުމުގެ މުއްދަތު ހަމަވާނީ 2025 ވަނަ އަހަރުގެ ޖޫން މަހުގެ ނިޔަލަށެވެ. އެ އެއްބަސްވުމުގެ މުއްދަތު ހަމަވާން އެއް އަހަރަށްވުރެ ކުޑަތަން ވެފައިވާއިރު، ސިޓީން އޮތީ އޭނާގެ އެއްބަސްވުން އައު ކުރަން ބޭނުންވެފަ އެވެ. ނަމަވެސް އެކަމުގައި ފައިނަލް ނިންމުމެއް ނުނިމި އޮތީ ގާޑިއޯލާ ގޮތެއް ނިންމަންދެނެވެ.

ސިޓީ އާއެކު ސޮއި ކޮށްފައިވާ އެއްބަސްވުން، އިތުރު އެއް އަހަރަށް އައު ކުރުމަށް ގާޑިއޯލާ މިހާރު ވަނީ އެއްބަސްވެފަ އެވެ. އެހެންކަމުން ދެން އެ ކުލަބާ އެކު އޭނާ ސޮއި ކުރާ އެއްބަސްވުމުގެ މުއްދަތު ހަމަވާނީ 2026 ވަނަ އަހަރުގެ ޖޫން މަހުގެ ނިޔަލަށެވެ. އެ މުއްދަތު ހަމަވުމުން، އިތުރު އެއް އަހަރަށް އެއްބަސްވުން އައު ކުރެވޭނެ ފުރުސަތު ވެސް އެ އެއްބަސްވުމުގެ ދަށުން އޮންނާނެ އެވެ.

ޖަރުމަނުގެ ބަޔާން މިއުނިކް ދޫކޮށްލުމަށްފަހު، އުމުރުން 43 އަހަރުގެ ގާޑިއޯލާ ސިޓީއާ ހަވާލުވީ 2016 ވަނަ އަހަރު އެވެ. އޭގެ ފަހުން އޭނާ ވަނީ މިހާތަނަށް 490 މެޗުގައި ސިޓީ އަށް އިރުޝާދު ދީފަ އެވެ. އޭގެ ތެރެއިން ސިޓީ ވަނީ 353 މެޗުން މޮޅުވެފަ އެވެ. 70 މެޗު އެއްވަރުވެފައިވާއިރު 67 މެޗުން ވަނީ ބަލިވެފަ އެވެ. ގާޑިއޯލާގެ އިރުޝާދުގެ ދަށުން ސިޓީން ވަނީ 18 ތައްޓެއް ކާމިޔާބު ކޮށްފަ އެވެ.

އޭގެ ތެރޭގައި އިނގިރޭސި ޕްރިމިއާ ލީގު، އެފްއޭ ކަޕް، ކަރަބޯ ކަޕް، އެފްއޭ ކޮމިއުނިޓީ ޝީލްޑު، ޔުއެފާ ޗެމްޕިއަންސް ލީގު، ޔުއެފާ ސުޕަ ކަޕް އަދި ފީފާ ކުލަބު ވޯލްޑް ކަޕް ކާމިޔާބު ކުރުން ހިމެނެ އެވެ. ގާޑިއޯލާގެ އިރުޝާދުގެ ދަށުން ސިޓީން ވަނީ ހަ ފަހަރު ޕްރިމިއާ ލީގު ކާމިޔާބު ކޮށްފަ އެވެ. އެންމެ ފަހުން ހަތަރު ސީޒަންގައި ވެސް ޕްރިމިއާ ލީގު ކާމިޔާބު ކުރީ ސިޓީންނެވެ. ގާޑިއޯލާގެ އިރުޝާުދުގެ ދަށުން ސިޓީން ވަނީ ފުރަތަމަ ފަހަރަށް ޗެމްޕިއަންސް ލީގު ވެސް ކާމިޔާބު ކޮށްފަ އެވެ.