ފީފާ ވޯލްޑް ކަޕް ކޮލިފިކޭޝަންގެ ދެކުނު އެމެރިކާ ސަރަހައްދުގައި އެކުއެޑޯއާ ދެކޮޅަށް ކުޅުނު މެޗުން ބަލިވެ، ކޮލަމްބިއާ އިން ތާވަލްގެ ހަތަރު ވަނަ އަށް ވެއްޓިއްޖެ އެވެ.

ބުދަ ދުވަހުގެ ހެނދުނު އެކުއެޑޯއާ ދެކޮޅަށް ކުޅުނު މެޗުން ކޮލަމްބިއާ ބަލިވީ 1-0ންނެވެ. އެއީ މެޗުގެ ފުރަތަމަ ހާފުގައި އެކުއެޑޯ އިން ޖެހި ލަނޑުންނެވެ. އެކުއެޑޯ މެޗުގެ ކުރިން އުރުގުއޭއާ ދެކޮޅަށް ކުޅުނު މެޗުން ވެސް ކޮލަމްބިއާ ވަނީ ބަލިވެފަ އެވެ. އެ މެޗުގައި އުރުގުއޭ އަތުން މޮޅުވެ، އެއް ވަަނައިގައި އޮތް އާޖެންޓީނާއާ ހަމަ ކުރުމުގެ ފުރުސަތު ވެސް ކޮލަމްބިއާ އަށް އޮތެވެ.

މެޗު ފަށައިގެން ހަތް ވަނަ މިނެޓުގައި އެކުއެޑޯ އިން ވަނީ ކޮލަމްބިއާ ކޮޅަށް ލަނޑު ޖަހައި ލީޑު ނަގައިފަ އެވެ. އެ ލަނޑު އެކުއެޑޯ އަށް ޖަހައިދިނީ އެނާ ވެލެންސިއާ އެވެ. އޭނާ އެ ލަނޑު ޖަހަން ފުރުސަތު ތަނަވަސްކޮށްދިނީ އަލަން ފްރަންކޯ އެވެ. މެޗުގައި އެކުއެޑޯ އަށް އެންމެ ބޮޑު ގެއްލުމެއް ދެއްކީ، މެޗުގެ ފުރަތަމަ ހާފުގެ 34 ވަނަ މިނެޓުގައި އެކުއެޑޯގެ ޕިއެރީ ހިކަންޕީ އަށް ސީދާ ރަތް ކާޑު ދައްކައި ދަނޑުން ފޮނުވާލުމުންނެވެ.

މެޗުގެ ބާކީ ބައި 10 ކުޅުންތެރިންނާ އެކު ކުޅެމުން ދިޔަ އެކުއެޑޯ ކޮޅަށް ލަނޑު ޖެހުމަށް ކޮލަމްބިއާ އިން ވަނީ ވަރަށް ބޮޑަށް މަސައްކަތް ކޮށްފަ އެވެ. އެގޮތުން އެ ޓީމުގެ ހަމޭސް ރޮޑްރިގޭޒް އަށް ލަނޑު ޖަހާނެ ފުރުސަތު ލިބުނުއިރު، ލުއިސް ޑިއާޒް އަށް ވެސް ވަނީ ލަނޑު ޖަހަން ވެސް ފުރުސަތު ލިބިފަ އެވެ. ނަމަވެސް އެއްވެސް ފުރުސަތެއްގެ ބޭނުން އެ ކުޅުންތެރިންނަށް ކުރެވޭ ގޮތެެއް ނުވި އެވެ.

ބައްޔާ އެކު ކޮލަމްބިއާ އޮތީ ކޮލިފިކޭޝަންގެ ހަތަރު ވަނައިގަ އެވެ. އެއީ މިހާތަނަށް ކުޅުނު 12 މެޗުން 19 ޕޮއިންޓާ އެކު އެވެ. ހަމަ އެ އަދަދަށް މެޗު ކުޅެގެން ތިން ވަަނައިގައި އޮތް އެކުއެޑޯ އަށް ވެސް ލިބެނީ 19 ޕޮއިންޓެވެ. ނަމަވެސް އެކުއެޑޯ އިން ކުރި ހޯދަނީ ލަނޑުގެ ގޮތުންނެވެ.