އެކުއެޑޯ ރައީސްގެ ކާރު ކޮޅަށް އަމާޒުކޮށް ދިން ހަމަލާ އަކީ އަވަހާރަ ކޮށްލަން ދިން ހަމަލާއެއް: ޑިފެންސް މިނިސްޓަރު

އެކުއެޑޯގެ ރައީސް ޑެނިއަލް ނޮބޯއާގެ ކާރު ކޮޅަށް އަމާޒުކޮށް ދިން ހަމަލާ އަކީ، ރައީސް އަވަހާރަ ކޮށްލަން ރާވައިގެން ދިން ހަމަލާއެއް ކަމަށް އެ ޤައުމުގެ ޑިފެންސް މިނިސްޓަރު ޖިއާން ކާލޯ ލޮފްރެޑޯ ވިދާޅުވެއްޖެ އެވެ.

އެކުއެޑޯގެ މެދުތެރޭގެ ސަރަހައްދެއްގައި ހުރި ފެން ޕްލާންޓެއް އިފްތިތާހު ކޮށްދެއްވަށް ވަޑައިގެން އުޅުއްވަނިކޮށް، ތެލުގެ އަގު މައްޗަށް ދިޔުމާ ގުޅިގެން މުޒާހަރާ ކުރަމުން ގެންދިޔަ ބަޔަކު ވަނީ ރައީސްގެ ކާރު ކޮޅަށް އަމާޒުކޮށް ހަމަލާ ދީފަ އެވެ.

މި ހަމާލަގައި ރައީސްގެ އިތުރުން، އެހެން އެއްވެސް މީހަކަށް ގެއްލުމެއް ލިބިފައި ނުވެ އެވެ. އެކަމާ ގުޅިގެން ދިފާއީ ވަޒީރު ވިދާޅުވެފައި ވަނީ، ކާރު ކޮޅަށް ހަމަލާ ދިން ގޮތަށް ބަލާއިރު، އެއީ ރައީސް އަވަހާރަކޮށްލަން ދިން ހަމަލާއެއް ކަމަށާއި، އެއީ ޓެރަރިޒަމްގެ އަމަލެއް ކަމަށެވެ.

އެކުއެޑޯގެ އެންވަޔަރަމަންޓް މިނިސްޓަރު އިނެސް މަންޒާނޯ ވިދާޅުވެފައިވާ ގޮތުގައި، ރައީސް ކާރު ކޮޅުގައި ވަޒަން އަރާފައިވާ ކަމުގެ ނިޝާން ވެސް ފެންނަން ހުއްޓެވެ. ސަރުކާރުން ހާމަ ކޮށްފައިވާ ވީޑިއޯ ފުޓޭޖުން ފެންނަ ގޮތުގައި، ދިދަ ތަކެއް ހިފައިގެން ތިބެ މުޒާހަރާ ކުރަމުން ގެންދިޔަ މީހުން މަގު މަތީގައި ތިބެ ބޮޑެތި ހިލަތަކާއި، ބައެއް ތަކެތި ނަގައި އުކާ މަންޒަރު ވެސް ފެނެ އެވެ.

މަންޒަރު ތަކުން ފެންނަ ގޮތުގައި ރައީސް ކާރު ކޮޅު އަދި ސެކިއުރިޓީ ކާރުތައް ދުއްވާފައި ދިޔައިރު އެއްލި ތަކެތި ކާރުގައި ޖެހި، ބިއްލޫރިގަނޑުގައި ރެނދު އެޅިފައިވާ މަންޒަރު ފެނެ އެވެ. އަދި ރައީސްގެ ސެކިއުރިޓީ އޮފިސަރުން ބޯ ތިރި ކުރުމަށް ހަޅޭލަވާ އަޑު ވެސް އިވެ އެވެ. އެއާއެކު ކާރު ކޮޅުތައް ވަރަށް ބާރު ސްޕީޑުގައި ދުއްވާފައި ދިޔަ މަންޒަރު ވެސް ފެެނެ އެވެ.

ރައީސް އަށް އަމާޒުކޮށް މި ހަމަލާ ދީފައި ވަނީ ތެލުގެ ސަބްސިޑީ ކަނޑާލުމާ ގުޅިގެން ޑީސަލްގެ އަގު މައްޗަށް ދިޔުމާ ގުޅިގެން ބައެއް މީހުން ކުރަމުން ދިޔަ މުޒާހަރާގެ ތެރެއިންނެވެ.